ကုလသမဂ္ဂလုံခြုံရေးကောင်စီသည် မြန်မာ့အရေးနှင့်ပတ်သက်ပြီး ယနေ့ နိုဝင်ဘာ ၂၀ ရက်တွင် သီးသန့် အစည်းအဝေးပြုလုပ်သွားမည်ဖြစ်ကြောင်း Security Council Report ဝက်ဘ်ဆိုက်တွင် ဖော်ပြထားသည်။

ယခုလအတွင်း လုံခြုံရေးကောင်စီ၏ အလှည့်ကျဥက္ကဋ္ဌနေရာ ရယူထားသည့် ဗြိတိန်နိုင်ငံက စီစဉ်ကျင်းပမည့် ထိုအစည်းအဝေးတွင် ကုလသမဂ္ဂ၏ မြန်မာနိုင်ငံဆိုင်ရာ အထူးသံတမန် ဂျူလီဘစ်ရှော့နှင့် အရှေ့တောင်အာရှနိုင်ငံများအသင်း (အာဆီယံ) ၏ ကုလသမဂ္ဂအထူးသံတမန် အာလွန်ကောင်း ကစ်တီကွန်းတို့ကလည်း နောက်ဆုံးရအချက်အလက်များကို တင်ပြဆွေးနွေးသွားမည်ဖြစ်သည်။

ထိုအစည်းအဝေးသည် ဘစ်ရှော့အတွက် ကုလသမဂ္ဂ၏ မြန်မာနိုင်ငံဆိုင်ရာအထူးသံတမန်တစ်ဦးအဖြစ် လုံခြုံရေးကောင်စီတွင် ပထမဆုံးအကြိမ် တင်ပြဆွေးနွေးမှုဖြစ်လာမည်ဖြစ်သည်။

ဘစ်ရှော့၏ အာရှခရီးစဉ်များအတွင်း နောက်ဆုံးရအချက်အလက်များကို ကြားသိရန် လုံခြုံရေးကောင်စီဝင်များက စိတ်အားထက်သန်နေကြကြောင်း Security Council Report တွင် ဖော်ပြခဲ့သည်။

ဘစ်ရှော့က သူသည် တရုတ်၊ အင်ဒိုနီးရှား၊ လာအို၊ မလေးရှားနှင့် ထိုင်းနိုင်ငံတို့မှ ကိုယ်စားလှယ်များနှင့်တွေ့ဆုံခဲ့ကြောင်း အောက်တိုဘာ ၂၉ ရက်က ပြုလုပ်ခဲ့သည့် အထွေထွေညီလာခံ တတိယမြောက်ကော်မတီအစည်းအဝေးတွင် ပြောကြားခဲ့သည်။

ထို့ပြင် သူသည် မြန်မာနိုင်ငံဆိုင်ရာ အထူးသံတမန်အဖြစ်စတင်တာဝန်ထမ်းဆောင်ခဲ့သည့် ဧပြီလနောက်ပိုင်း  နေပြည်တော်တွင် မြန်မာတပ်မတော်အစိုးရအကြီးအကဲ ဗိုလ်ချုပ်မှူးကြီး မင်းအောင်လှိုင်နှင့်တွေ့ဆုံခဲ့ကြောင်း ထိုအစည်းအဝေးတွင် ပြောကြားခဲ့သည်။

ထို့ပြင် ဘစ်ရှော့က သူသည် ဒေါ်အောင်ဆန်းစုကြည်၏ ပါတီ၊ NUG ၊ တိုင်းရင်းသားလက်နက်ကိုင်အဖွဲ့များ၊ အခြားသူများနှင့်လည်းတွေ့ဆုံခဲ့ပြီး ၎င်း၏တွေ့ဆုံမှုတွင် မျက်နှာလိုက်မှုမရှိဘဲ သက်ဆိုင်သူအားလုံးနှင့် ထိတွေ့ဆက်ဆံခဲ့ကြောင်း ပြောကြားခဲ့သည်။

Ref: Security Council Report/ Reuters