မော်လမြိုင်မြို့နယ်၊ ရိုးဂိုးကျေးရွာ မော်လမြိုင် - မုဒုံကားလမ်းဘေးရှိ "မင်းသန့်" စက်သုံးဆီ အရောင်းဆိုင် တွင် ယနေ့ နိုဝင်ဘာ ၇ ရက် ညနေ ၅ နာရီ မှ စတင်ကာ မီးလောင်ကျွမ်းမှုဖြစ်ပွားလျှက်ရှိကြောင်း သိရသည်။
အဆိုပါ မင်းသန့်စက်သုံးဆီ အရောင်းဆိုင်အနောက်ဘက်ရှိ ဆီလှောင်ကန်ပေါက်ကွဲရာမှ မီးစတင်လောင်ကျွမ်းသည် ကနဦးသိရကြောင်း နှင့် လက်ရှိ ည (၆) နာရီ (၄၅) မီနစ်အချိန်အထိ မီးလောင်ကျွမ်းနေဆဲဖြစ်ကြောင်း လူမှုကူညီကယ်ဆယ်ရေးအဖွဲ့မှ တာဝန်ရှိသူတစ်ဦးကပြောကြားသည်။
၎င်းကဆက်လက်ပြီး "ဆီကန်ပေါက်ကွဲမီးလောင်မှုဖြစ်တာလို့ကနဥိး သိရပါတယ်။ မီးကအရမ်းများနေတယ်။ လောလောဆယ် တခြားနေရာတွေကို ကူးစက်လောင်ကျွမ်းမှုမရှိအောင် လုပ်ဆောင်နေကြပါတယ်။ လောလောဆယ်အထိ လူထိခိုက်မှုတော့ မရှိသေးဘူး" ဟု ပြောကြားသည်။
ထိုမီးလောင်မှုအား မြန်မာနိုင်ငံမီးသတ်တပ်ဖွဲ့ (မွန်ပြည်နယ်) ၊ မော်လမြိုင်ခရိုင် နှင့် မော်လမြိုင်မြိုနယ်အတွင်းရှိ မီးသတ်စခန်းများမှ မီးငြှိမ်းသတ်ယာဉ်များအပြင် မုဒုံမြို့နယ်မီးသတ်ဥိးစီးဌာနနှင့် လူမှုကူညီကယ်ဆယ်ရေးအသင်းများမှ မီးသတ်ယာဉ်များ၊ လူမှုကူညီကယ်ဆယ်ရေးအသင်းများမှ ရေသယ်ယာဉ်များဖြင့် ဝိုင်းဝန်းငြှိမ်းသတ်ဆဲဖြစ်ကြောင်း သိရသည်
