ရီးယဲလ်နည်းပြ အန်ဆယ်လော့တီက အေစီမီလန်အသင်းကို ရှုံးနိမ့်ပြီးနောက် အသင်း၏ခြေစွမ်းပိုင်းအတွက် စိတ်ပူရတော့မည်ဖြစ်ကြောင်း ဝန်ခံပြောကြားခဲ့သည်။

ရီးယဲလ်အသင်းသည် လာလီဂါတွင် ခါးသီးပြိုင်ဘက် ဘာစီလိုနာအသင်းကို (၀-၄) ဂိုးဖြင့် အိမ်ကွင်းတွင် ရှုံးနိမ့်ခဲ့သလို၊ ချန်ပီယံလိဂ်ပြိုင်ပွဲတွင်လည်း အေစီမီလန်ကို အိမ်ကွင်းမှာပင် (၁-၃) ဂိုး ဖြင့် ရှုံးနိမ့်ခဲ့ရသည်။

ရီးယဲလ်အသင်းသည် ချန်ပီယံလိဂ်ပွဲစဉ် (၄) ပွဲအပြီး (၂) ပွဲနိုင်၊ (၂) ပွဲရှုံး ရလဒ်ထွက်ပေါ်ထားပြီး ရှုံးထွက် (၁၆)သင်းအဆင့်ကို တိုက်ရိုက်တက်ရောက်ခွင့်ရရန် ရုန်းကန်ရဖွယ်ရှိနေသည်။

အန်ဆယ်လော့တီက ''ကျွန်တော်တို့ စိတ်ပူရပါတော့မယ်။ ဘာဖြစ်လို့လဲဆိုတော့ ပြီးခဲ့တဲ့ပွဲတွေမှာ ကျွန်တော်တို့အသင်းဟာ အကောင်းဆုံးပုံစံ ရှိမနေခဲ့ပါဘူး။ အသင်းလိုက်စုစည်းမှုပိုင်းလည်း အားနည်းပါတယ်။ ခံစစ်ပိုင်းအားနည်းသလို တိုက်စစ်ကလည်း ဂိုးရဖို့ လိုပါတယ်''ဟု ပြောကြားခဲ့သည်။