ဂါဇာတောင်ပိုင်းနှင့်အီဂျစ်အကြားရှိ နယ်စပ်ဒေသကို ပါလက်စတိုင်းစစ်သွေးကြွအုပ်စု ဟားမာ့စ်အတွက် အသက်သွေးကြော အဖြစ် ဘယ်တော့မှအသုံးမပြုနိုင်သည့် အာမခံချက်များရှိမှသာ အစ္စရေးသည် ဂါဇာတွင် အမြဲတမ်းအပစ်အခတ်ရပ်စဲရေးကို သဘောတူလိမ့်မည်ဟု စက်တင်ဘာ ၄ ရက်တွင် အစ္စရေးဝန်ကြီးချုပ် ဘင်ဂျမင်နေတန်ယာဟုက ပြောကြားခဲ့သည်။
“အဲ့ဒီအာမခံချက်တွေ မရမချင်း ကျွန်တော်တို့ အဲဒီနယ်စပ်ဒေသမှာရှိနေမှာပါ”ဟု ဂျေရုဆလင် သတင်းစာရှင်းလင်းပွဲတွင် ၎င်းက ပြောကြားခဲ့သည်။
၄၂ ရက် ကြာမြင့်မည်ဟု မျှော်လင့်ရသည့် သဘောတူညီချက် ပထမအဆင့်၌ ဖီလာဒယ်လ်ဖီလမ်းကြောင်းဟု ခေါ်သည့်နေရာမှ တပ်များရုပ်သိမ်းရေးကို ပြတ်ပြတ်သားသား ပယ်ချသည်ဟု နေတန်ယာဟုက ထပ်လောင်းပြောကြားခဲ့ပြီး နိုင်ငံတကာဖိအား ပေးမှုက ယင်းနေရာကို ပြန်လာရန် မဖြစ်နိုင်သည့် အနေအထားကို ဖြစ်စေလိမ့်မည်ဟု ဆိုသည်။
ပထမအဆင့် သဘောတူညီချက်အပြီး သဘောတူရန်ရှိနေသည့် အမြဲတမ်းအပစ် အခတ်ရပ်စဲရေးအတွက် အစ္စရေးသည် အာ မခံချက်များရရှိရန် လိုအပ်လိမ့်မည်ဟု ဆိုသည်။ စစ်အပြီး ဂါဇာကို မည်သူအုပ်ချုပ်သည်ဖြစ်စေ အဆိုပါလမ်းကြောင်းကို ဟား မာ့စ်အတွက် လက်နက်များနှင့် ထောက်ပံ့ပစ္စည်းများ ခိုသွင်းရေးအတွက် အသုံးပြုခြင်းအား တားဆီးနိုင်စေရလိမ့်မည်ဟူသော အာမခံချက်များကို အစ္စရေး လိုအပ်နေသည်ဟု ဆိုသည်။
“တစ်ယောက်ယောက်ကတော့ အဲဒီမှာ ရှိနေရမှာပါ။ အရင်က အဲဒီမှာဖြစ်ပျက်ခဲ့တာ (အောက်တိုဘာ ၇ ရက် ဟားမာ့စ်တိုက်ခိုက် မှု)မျိုး ပြန်လည်ပေါ်ပေါက်လာတာကို တကယ်တားဆီးနိုင်မယ့်သူကို ကျွန်တော့်ဆီခေါ်လာပါ။ အဲဒါကို တားဆီးဖို့ စာရွက်ပေါ် မှာမဟုတ်ဘူး၊စကားလုံးတွေနဲ့မဟုတ်ဘူး၊ Slide Show တွေနဲ့မဟုတ်ဘူး တစ်ရက်ပြီး တစ်ရက်၊ တစ်ပတ်ပြီး တစ်ပတ်၊ တစ်လပြီး တစ်လတားဆီးပေးနိုင်မယ့်ပုဂ္ဂိုလ်ကို ခေါ်လာပါ”ဟု နေတန်ယာဟုက ပြောကြားခဲ့သည်။
“ကျွန်တော်တို့က အဲဒါကို ပွင့်ပွင့်လင်းလင်း စဉ်းစားနေတာဖြစ်ပါတယ်။ ဒါပေမဲ့ အခုလောလောဆယ်မှာတော့ အောက်တို ဘာ ၇ ရက်ဖြစ်ရပ်မျိုး ဖြစ်လာဖို့မရှိပါဘူး”ဟု ၎င်းက ဆက်လက်ပြောကြားခဲ့သည်။
အီဂျစ်နိုင်ငံနှင့်နယ်စပ်ထိနေသော ဂါဇာတောင်ပိုင်းအစွန်အဖျားတစ်လျှောက်ရှိ ဖီလာဒယ်လ်ဖီလမ်းကြောင်းသည် ဂါဇာစစ်ပွဲ အပစ်အခတ်ရပ်စဲရေးနှင့် ပါလက်စတိုင်း အကျဉ်းသားများဖြင့်ဖလှယ်ကာ အစ္စရေးဓားစာခံများကို နေရပ်ပြန်ခေါ်ရေးတို့ အတွက် အဓိက အဟန့်အတားတစ်ခုဖြစ်သည်။
ဟားမာ့စ်ကို လက်နက်၊ ခဲယမ်းများ ထောက်ပ့ံရာတွင် အသုံးပြုသည်ဟု တာဝန်ရှိသူများက ပြောကြားသော ဥမင်လိုဏ်ခေါင်း ဒါဇင်ပေါင်းများစွာကို အစ္စရေးစစ်သားများတွေ့ရှိခဲ့သောနေရာဖြစ်သည့် ဖီလာဒယ်လ်ဖီလမ်းကြောင်းကို ထိန်းချုပ်ထားမည်ဟု နေ တန်ယာဟုက ပြောကြားခဲ့သည်။
အဆိုပါလမ်းကြောင်းကိစ္စကို ကိုင်တွယ်ဆောင်ရွက်ပုံနှင့်ပတ်သက်၍ ဝန်ကြီးချုပ် နေတန်ယာဟုသည် အစ္စရေးတွင် လူအများ အပြား၏ပြင်းထန်သော ဝေဖန်မှုများကိုရင် ဆိုင်နေရသည်။
Ref: Reuters
