ကယားပြည် ဖားဆောင်းမြို့နယ် မော်ချီးဒေသတွင် အောက်တိုဘာ ၁၁ ရက်က မြေပြိုမှုများဖြစ်ပေါ်ကာ လူအများအပြား သေဆုံးမှုဖြစ်ပွားပြီးနောက် မြေပြိုမှုများ ဆက်လက်ဖြစ်ပေါ်နိုင်၍ မော်ချီးဒေသ သတ္တုတူးဖော်ရေးလုပ်ငန်းများကို အောက်တိုဘာ ၁၄ ရက်မှ စတင်ကာ အချိန်အကန့်အသတ်မရှိ ရပ်ဆိုင်းလိုက်ကြောင်း သတင်ရရှိသည်။မော်ချီးဒေသရှိ ဇီးပင်ကွေ့ ၊ ၁၃ ကုန်းနှင့် တောင်ပေါ်ရွာ စသည့်နေရာများ၌ မြေပြိုမှုကြောင့် အိမ်ခြေငါးဆယ်ကျော် မြေများဖုံးလွှမ်းခဲ့ရာ လူ ၂၀ ထက်မနည်း သေဆုံးခဲ့ပြီး မြေစာပုံများအောက်တွင် အများအပြားရှိနေနိုင်ကြောင်း ဒေသခံများက ပြောကြားသည်။
ကယားပြည်နယ် ဘောလခဲခရိုင် အုပ်ချုပ်ရေးမှူး ဦးသိန်းဇော်က “ စီမံကိန်းကတော့ မြေပြိုမှု အနေအထားနဲ့ သူက ဒီတောင်တွေရဲ့အောက်မှာ ကြွက်တွင်းတွေလိုဖြစ်နေတာ ဂလိုဏ်တွေ ဖြစ်နေတာ ။အဲဒီလို အနေအထားကြောင့် သတ္တုတွင်းဝန်ကြီးဌာနက ရပ်တာ။ မနေ့က စပြီးတော့ပေါ့၊၊ လတ်တလောမှာ လုပ်ကိုင်ဖို့ အခြေအနေမပေးဘူး လုပ်ရင်လည်း ဒီလိုထပ်ဖြစ်မှာ ၊၊ ဘယ်အချိန်ထိ ရပ်မယ်ဆိုတာ မှန်းလို့မရဘူး။ ဆက်ပြီးတော့ ပြန်လုပ်လို့ ရ မရဆိုတာ သူတို့ ဆာဗေးဆင်းအုံးမှာပေါ့ ” ဟု အောက်တိုဘာ ၁၅ရက်တွင် ပြောကြားသည်။
မော်ချီးဒေသတွင် သတ္တုတူးဖော်ရေး လုပ်ငန်းဆောင်ရွက်နေသည့် ကုမ္ပဏီ ၉ခု ရှိပြီး ယင်းကုမ္ပဏီများထံမှ တစ်ဆင့်ပြန်လည်ပြီး ကျင်းစားအဖြစ် ဆောင်ရွက်သူ ထောင်ချီရှိပြီး မြေပြိုမှုဖြစ်ပွားပြီးနောက် အများစုမှာ ၎င်းတို့နေရပ်ဒေသများသို့ ပြန်သွားပြီဖြစ်ပြီး အချို့မှာ မော်ချီးဒေသ လိုခါးလိုရွာရှိ ဒုက္ခသည်စခန်းတွင် စောင့်ဆိုင်းနေထိုင်ကာ လုပ်ငန်းလုပ်ကိုင်ခွင့်ရရှိရေးကို မျော်လင့်လျက်ရှိကြောင်း သိရသည်။
မကွေးတိုင်း နတ်မောက်မြို့နယ် မကျီးကျိုကျေးရွာမှ ကိုသန်းမင်းထိုက်က “ မြေပြိုတဲ့အထဲမှာ အသိတွေတော့ ပါသွားတယ်။ ဒီကိုရောက်တာ သုံးလေးနှစ်လောက်ရှိပြီ။ ပြန်ရင်ကောင်းမလား ဟိုဘက်လုပ်ကွက် ရွှေ့မလား မသိသေးဘူး။ လုပ်ငန်းတွေ ရပ်ပြီလို့တော့ ပြောသံကြားတယ်။ သူတို့နေခိုင်းရင်တော့ ဆက်လုပ်ရမှာပဲ။ ဒီမှာက ပုံမှန်ဝင်ငွေမရှိပေမယ့် ရွာဘက်နဲ့စာရင် ကိုက်တာပေါ့။ ဒီမှာ တစ်လကို တစ်လကို တစ်သိန်းခွဲ နှစ်သိန်းလောက် စုမိတယ်”  ဟု ပြောပြသည်။လိုခါးလိုကျေးရွာသား အသက် ၄၃နှစ် အရွယ် ဦးစောအားခွာက “ ဒီဒေသက ခဲလုပ်ငန်းနဲ့ လုပ်ကိုင်စားသောက်ကြတာ။ အန္တရာယ်များပေမယ့် ဟိုးရှေးကတည်းက လုပ်ခဲ့တာဆိုတော့ ဆက်လုပ်နေရအုံးမှာ။ ဒီဒေသခံတွေအပြင် မြန်မာပြည်အရပ်ရပ်က လာလုပ်ကြတာ ဦးစေသောင်းဂဏန်းထက် မနည်းဘူး။ အညာဘက်က ပိုများတယ်။ မြေပြိုလို့ သေတဲ့အထဲမှာ ဧည့်သည်တွေများတယ်” ဟု ပြောပြသည်။