အိန္ဒိယအုပ်ချုပ်ခံ ကက်ရှ်မီးယားဒေသ၏ အထူးကိုယ်ပိုင်အုပ်ချုပ်ခွင့်ရ အဆင့်အတန်း ရုပ်သိမ်းခံရပြီးနောက်ပိုင်း ပထမဆုံးကျင်းပသည့် ဒေသန္တရရွေးကောက်ပွဲအတွက် စက်တင်ဘာ ၁၈ ရက်က မဲပေးမှုများ စတင်ပြုလုပ်ခဲ့သည်။
ပါကစ္စတန်နှင့် ပိုင်နက်အငြင်းပွားနေသော မွတ်စလင်အများစုနေထိုင်ရာ ကက်ရှ်မီးယားဒေသရှိ ဒေသခံအများအပြားက အိန္ဒိယဝန်ကြီးချုပ် နရင်ဒရာမိုဒီ၏ ဟိန္ဒူအမျိုးသားရေးဝါဒီ အစိုးရ၏ ၂၀၁၉ ခုနှစ် အမိန့်ညွှန်ကြားချက်အပေါ် ခါးခါးသီးသီး မကျေမနပ်ဖြစ်နေဆဲဖြစ်သည်။ လက်ရှိတွင် ကက်ရှ်မီးယားဒေသမှာ ဗဟိုအစိုးရ၏ တိုက်ရိုက်အုပ်ချုပ်မှုအောက်တွင်ရှိကာ ဗဟိုမှခန့်အပ်ထားသော အုပ်ချုပ်ရေးမှူးက ယင်းဒေသကို အုပ်ချုပ်လျက်ရှိသည်။
၂၀၁၄ ခုနှစ်နောက်ပိုင်း ကက်ရှ်မီးယားဒေသ၏ လွှတ်တော်အတွက် ပထမဆုံးပြုလုပ်သည့် အဆိုပါ ရွေးကောက်ပွဲအား ပထဝီဝင်အနေအထား ကြမ်းတမ်းမှုနှင့် ထောက်ပံ့ပို့ဆောင်ရေးဆိုင်ရာ စိန်ခေါ်မှုများကြောင့် လုံခြုံရေးတင်းကျပ်စွာ ချထားလျက် အဆင့်သုံးဆင့်ဖြင့် ကျင်းပမည်ဖြစ်ကာ စက်တင်ဘာ ၁၈ ရက်တွင် မဲဆန္ဒရှင်များက မဲပေးရန် တန်းစီစောင့်ဆိုင်းခဲ့ကြသည်။
"၁၀ နှစ်အကြာမှာ ကျွန်တော်တို့အသံတွေကို ကြားခွင့်ရတော့မှာပါ။ ကျွန်တော့်ရဲ့အသံတွေကို ကိုယ်စားပြုခံရချင်ပါတယ်" ဟု ဆရီနာဂါမြို့အနီးရှိ ပူလ်ဝါမာဒေသ၌ နံနက်ခင်း လာရောက်မဲပေးသူတစ်ဦးဖြစ်သည့် အသက် ၃၁ နှစ်အရွယ် နာဗစ်ပါရာက ဆိုသည်။
ကက်ရှ်မီးယားဒေသတွင် ရဲတပ်ဖွဲ့ဝင် ၅၀၀,၀၀၀ ခန့် ဖြန့်ကြက်ထားသည်။ ၎င်းဒေသတွင် ၃၅ နှစ်ကြာ ပုန်ကန်ထကြွမှုများ ဖြစ်ပွားခဲ့သည့်အတွက် အရပ်သားများ၊ တပ်ဖွဲ့ဝင်များနှင့် ခွဲထွက်ရေးသူပုန်များ အပါအဝင် လူသောင်းနှင့်ချီ သေဆုံးခဲ့ကာ ယခုနှစ်အတွင်း သေဆုံးသူဦးရေမှာလည်း ဒါဇင်ပေါင်းများစွာရှိခဲ့ကြောင်း သိရသည်။ Ref: AFP
