ယာယီပိတ်သိမ်းထားသည့် မန္တလေးမြို့မှ နာမည်ရ ပုဂ္ဂလိကဆေးရုံငါးရုံအနက်မှ ဆေးရုံသုံးရုံအား ဆေးရုံလုပ်ငန်းလိုင်စင်များကို ပယ်ဖျက်လိုက်ကြောင်း သိရှိရသည်။

ဆေးရုံလုပ်ငန်းလိုင်စင်​ ပယ်​ဖျက်​ ပိတ်သိမ်းလိုက်သည့် ဆေးရုံသုံးရုံမှာ နန်းတော်၊ မြို့တော်နှင့် ကံ့ကော်ဆေးရုံတို့ ဖြစ်​ပြီး အဆိုပါ ​ဆေးရုံသုံးခု၏ လုပ်​ငန်းလိုင်​စင်​ပယ်​ဖျက်ခြင်​းကို ပုဂ္ဂလိကဆိုင်ရာကျန်းမာရေးဗဟိုအဖွဲ့မှ ​မေလ ၁၅ ရက်​​နေ့ ရက်​စွဲဖြင်​့ ထုတ်​ပြန်ခဲ့ခြင်​းဖြစ်​သည်​ ။

ယင်းထုတ်ပြန်ချက်တွင် မန္တလေးတိုင်းဒေသကြီး မဟာအောင်မြေခရိုင်စီမံအုပ်ချုပ်ရေးအဖွဲ့ ညွှန်ကြားချက်နှင့်အညီ လုပ်ငန်းပိတ်သိမ်းထားရှိသည့် နန်းတော်ဆေးရုံ၊ ကံ့ကော်ဆေးရုံ၊ မြို့တော်ဆေးရုံ လိုင်စင်ရရှိသူတို့သည် ကျန်းမာရေးဆိုင်ရာ လုပ်ငန်းဥပဒေ ပုဒ်မ ၁၉(က)ပါ လိုင်စင်စည်းကမ်းများကို လိုက်နာရန်ပျက်ကွက်ခြင်းကြောင့် ၁၃-၂-၂၀၂၃ ရက်နေ့တွင် ကျင်းပပြုလုပ်သည့် ပုဂ္ဂလိကကျန်းမာရေးလုပ်ငန်းဆိုင်ရာဗဟိုအဖွဲ့ (၁/၂၀၂၃) အစည်းအဝေးဆုံးဖြတ်ချက်အရ အဆိုပါဆေးရုံသုံးခု၏ လုပ်ငန်းလိုင်စင်ကို ၁-၁-၂၀၂၃ ရက်နေ့မှစတင် ပယ်ဖျက်လိုက်သည်ဟု တွေ့ရှိရသည် ။

ယာယီပိတ်ထားရန် ညွှန်ကြားခဲ့သည့် မန္တလေးမြို့ရှိ ပုဂ္ဂလိက ဆေးရုံငါးခုမှာ ၂၀၂၂ ခုနှစ် ဒီဇင်ဘာလ ၃၁ ရက်နေ့မှစတင်ကာ ဖွင့်လှစ်ခြင်းမရှိတော့ပဲ ယခုအခါ ဆေးရုံးသုံးခု၏ လုပ်ငန်းလိုင်စင်များကို အပြီးပယ်ဖျက်ပိတ်သိမ်းခဲ့ခြင်းဖြစ်သည် ။

"၁၅ ရက်နေ့ ရက်စွဲနဲ့ ဆေးရုံလိုင်စင်ပယ်ဖျက်တဲ့ထုတ်ပြန်ချက်ကို ၁၆ ရက်နေ့မှာ သိရတယ်။ အဲ့လို လိုင်စင်ပယ်ဖျက်တဲ့ အစည်းအဝေးက ၂ လပိုင်းကတည်းကဆိုပေမယ့် ဘယ်သူမှ မသိကြဘူး။ အခု မေလထဲမှာကို ဆေးရုံပြန်ဖွင့်ပေးဖို့ စာတင်ထားသေးတာ" ဟု ပုဂ္ဂလိကဆေရုံတစ်ခုမှ ဆရာဝန်တစ်ဦးက ပြောကြားသည် ။

ပုဂ္ဂလိကအထွေထွေရောဂါကုဆေးရုံ ၊ ပုဂ္ဂလိကအထူးကုဆေးရုံများတွင် လိုင်စင်ရရှိသူ တာဝန်ခံပုဂ္ဂိုလ်နှင့် ပြုစုကုသမှုပေးအပ်နေသော ဆရာဝန်များ သူနာပြုများ ဆေးဘက်ဆိုင်ရာကျွမ်းကျင်ပုဂ္ဂိုလ်များသည် ပုဂ္ဂလိကကျန်းမာရေးဆိုင်ရာဥပဒေများနှင့် နိုင်ငံတော်၏တည်ဆဲဥပဒေများကို လိုက်နာရန်လိုအပ်ကြောင်း ၊ ထို့ပြင် မန္တလေးမြို့ရှိ ပုဂ္ဂလိက ဆေးရုံဆေးခန်းများသည် ပြည်သူလူထု၏ကျန်းမာရေးလိုအပ်ချက်များကို သင့်တင့်မျှတသော စရိတ်ရယူ၍ တည်ဆဲဥပဒေများကို လိုက်နာလျက် ဘေးကင်းလုံခြုံ စိတ်ချရသောဆေးဝါးကုသမှုများကို  ဆောင်ရွက်ပေးရန်လိုအပ်ကြောင်း နိုင်ငံတော်စီမံအုပ်ချုပ်ရေးကောင်စီ သတင်းထုတ်ပြန်ရေးအဖွဲ့က ဖြေကြားထားသည် ။

ယင်းသို့ ဆေးဝါးကုသမှုနှင့် လုပ်ငန်းလည်ပတ်မှုများ ရပ်ဆိုင်းကာ လုပ်ငန်းလိုင်စင် ပယ်ဖျက်ခံရသည့် ပုဂ္ဂလိကဆေးရုံအချို့မှာ CDM ပြုလုပ်ထားသည့် ဆေးဝန်ထမ်းများ ခန့်အပ်ထားခြင်းကြောင့်ဖြစ်သည်ဟု ဆေးပညာအသိုင်းအဝိုင်းမှ စုံစမ်းသိရှိရပြီး ၂၀၂၂ ခုနှစ် ဒီဇင်ဘာလအတွင်းက ဆေးရုံအချို့တွင်  အထူးကုဆရာဝန်အချို့ အပါအဝင် သူနာပြုအချို့ ဖမ်းဆီးခံရသည့် သတင်းများ ထွက်ပေါ်ခဲ့သည် ။