စစ်ကိုင်းမြို့နယ်၊ ကြွယ်ပုံကျေးရွာတွင် ဒရုန်းဖြင့်ဗုံးပစ်ချ ဖောက်ခွဲခဲ့သဖြင့် အလကကျောင်းရှေ့၌ ရေကစားနေသည့် ကလေးငါးဦးအပါအဝင် ရှစ်ဦးသေဆုံးပြီး ကျေးရွာသား ၃၁ ဦး ဒဏ်ရာရရှိခဲ့ကြောင်း နိုင်ငံတော်စီမံအုပ်ချုပ်ရေးကောင်စီ သတင်းထုတ်ပြန်ရေးအဖွဲ့က ထုတ်ပြန်သည်။
သင်္ကြန်အကြိုနေ့ဖြစ်သည့် ဧပြီ ၁၃ ရက်က စစ်ကိုင်းမြို့နယ်၊ ကြွယ်ပုံကျေးရွာ အခြေခံပညာအလယ်တန်း ကျောင်းရှေ့၌ ကလေးငယ်များအပါအဝင် ကျေးရွာသူ၊ ကျေးရွာသားများ ရေကစား နေစဉ် ညနေ ၅ နာရီ ၄၀ မိနစ်ခန့်တွင် PDF များက ဒရုန်းဖြင့် Drop Bomb လေးလုံး လာရောက် ပစ်ချတိုက်ခိုက်ခဲ့သဖြင့် ကလေးငယ် ငါးဦးအပါအဝင် ရှစ်ဦး သေဆုံးခဲ့ပြီး ကျေးရွာသူ၊ ကျေးရွာသား ၃၁ ဦး ထိခိုက်ဒဏ်ရာရရှိခဲ့ကြောင်း ထုတ်ပြန်ချက်အရသိရသည်။
အဆိုပါဖြစ်စဉ်မှ ထိခိုက်ဒဏ်ရာရရှိသူများကို လုံခြုံရေးတပ်ဖွဲ့ဝင်များက စစ်ကိုင်းမြို့ရှိ ပြည်သူ့ဆေးရုံသို့ ပို့ဆောင်ဆေးကုသမှုခံယူစေလျက်ရှိကြောင်း သိရသည်။
