အစ္စရေး၏ လေကြောင်းမှတိုက်ခိုက်မှုကြောင့် လက်ဘနွန်လူငယ်အမျိုးသမီးဘောလုံးသမားတစ်ဦး သတိမေ့မျောနေပြီး ကိုမာအခြေအနေခံစားနေရကြောင်း လက်ဘနွန်ဘောလုံးအဖွဲ့ချုပ် (LFA) ၏ ထုတ်ပြန်မှုအရ သိရသည်။
နိုဝင်ဘာ ၁၆ ရက်က အစ္စရေး၏ လေကြောင်းတိုက်ခိုက်မှုကြောင့် လက်ဘနွန်နိုင်ငံ၊ ဘေရွတ်မြို့တောင်ပိုင်းရှိ အသက် ၁၉ နှစ်အရွယ် စီလင်းဟိုင်ဒါဟု အမည်ရသူ လူငယ်အမျိုးသမီးဘောလုံးသမားတစ်ဦး ဦးခေါင်းဒဏ်ရာရရှိခဲ့သည်။
၎င်း၏ဒဏ်ရာကို ချက်ချင်းခွဲစိတ်ခဲ့သော်လည်း လေးရက်အကြာတွင် ဦးနှောက်အတွင်းမှ သွေးယိုစိမ့်မှု ပြန်လည်ဖြစ်ပွားလာပြီး ကိုမာအခြေအနေသို့ ရောက်ရှိသွားကြောင်း LFA က နိုဝင်ဘာ ၁၉ ရက်တွင် ထုတ်ပြန်ခဲ့သည်။
''သူက ဒုံးကျည်ပစ်လွှတ်မှုကြောင့် ဦးခေါင်းဒဏ်ရာရရှိခဲ့တာပါ။ အဲဒီနေ့မှာပဲ ခွဲစိတ်မှုခံယူခဲ့ပါတယ်။ ဆရာဝန်တွေက သွေးယိုစိမ့်မှုကို အောင်မြင်စွာရပ်တန့်နိုင်ခဲ့ပြီး သူ့ရဲ့အခြေအနေကလည်း တည်ငြိမ်လာပါတယ်။ သူ့ကို အနီးကပ်စောင့်ကြည့်မှုအောက်မှာ ထားရှိတာပါ။ ဒါပေမဲ့ ဒီနေ့မှာ သူ့ရဲ့အခြေအနေက ဆိုးရွားလာပြီး သွေးယိုစိမ့်မှုလည်း ပြန်ဖြစ်လာပြီးတော့ ကိုမာဖြစ်သွားပါပြီ'' ဟု LFA ၏ ထုတ်ပြန်ချက်တွင် ဖော်ပြထားသည်။
ဂါဇာနှင့် လက်ဘနွန်စစ်ပွဲကြောင့် လက်ဘနွန်နှင့် ပါလက်စတိုင်းကစားသမားများ ဒဏ်ရာရရှိမှု၊ အသက်ဆုံးရှုံးမှုများအတွက် ပိုမိုရပ်တည်ပြောဆိုပေးရန် FIFA (ကမ္ဘာ့ဘောလုံးအဖွဲ့ချုပ်) နှင့် UEFA (ဥရောပဘောလုံးအဖွဲ့ချုပ်) တို့အပေါ် တောင်းဆိုမှုများ လူမှုမီဒီယာတွင် ပြုလုပ်လျက်ရှိသည်။
