နိုင်ငံတကာ ရက်သတ္တပတ်တွေအလွန်မှာ ဥရောပထိပ်တန်းလိဂ်တွေ ပြန်စတယ်။ Super Saturday မှာ လက်စတာ-ချယ်လ်ဆီး၊လီဗာပူးလ် -အာဆင်နယ်တို့လို ပွဲကြီးပွဲကောင်းတွေ ကြည့် ခဲ့ရသလို ရာနီရေးရီရဲ့ ဝက်ဒ်ဖို့ဒ်ကလည်း အိမ်ကွင်းမှာ မန်ချက်စတာယူနိုက်တက်ကို ဂိုးပြတ် အနိုင်ယူပြီး ဖျော်ဖြေမှုပေးခဲ့တယ်။ နောက်ထပ် စိတ်ဝင်စားစရာကတော့ နည်းပြသစ်(၃)ဦးရဲ့ ပရီးမီးယားလိဂ် အဖွင့်ပွဲ(၃)ပွဲ။ အက်စတွန်ဗီလာနည်းပြ စတီဗင်ဂျရတ်၊ နယူးကာဆယ်နည်းပြ အက်ဒီဟောင်း၊ နောဝစ်ချ်နည်းပြဒင်းန်စမစ်တို့က အသင်းသစ်တွေနဲ့ ပထမဆုံးပွဲထွက်ခဲ့တယ်။ နယူးကာဆယ်က ဘရန့်ဖို့ဒ်နဲ့ အကြိတ်အနယ်ကစားကာ (၃)ဂိုးစီသရေကျခဲ့ပြီး ဗီလာက ဘရိုက်တန်ကို (၂-၀)၊ နောဝစ်ချ်က ဆောက်သမ်တန်ကို (၂-၁) ဂိုးတွေနဲ့ အနိုင်ရခဲ့လို့ နည်းပြသစ်(၃)ဦးရဲ့ တာထွက်ကလှခဲ့တယ်လို့ ဆိုရမယ်။ ဒါကြောင့် ဂျရတ်၊ အက်ဒီဟောင်းနဲ့ ဒင်းန်စမစ်တို့ရဲ့ ပထမဆုံး ပွဲစဉ်တွေ အကြောင်း အကျဉ်းချုပ် သုံးသပ်သွားပါမယ်။