မြန်မာကြက်တောင်အားကစားမယ် သက်ထားသူဇာသည် နိုဝင်ဘာ ၁၂ ရက်မှ ၁၇ ရက်အထိကျင်းပသည့် ဗီယက်နမ် International Series ကြက်တောင်ပြိုင်ပွဲတွင် ဝင်ရောက်ယှဉ်ပြိုင်ရာ ကွာတားဖိုင်နယ်အဆင့်မှ ထွက်ခဲ့ရကြောင်း သိရသည်။

သက်ထားသူဇာသည် ယင်းပြိုင်ပွဲတွင် ပထမအဆင့်မှ စတင်ယှဉ်ပြိုင်ရသော်လည်း Bye ရသဖြင့် ဒုတိယအဆင့်မှ စတင်ယှဉ်ပြိုင်ခဲ့ရသည်။ သက်ထားသူဇာသည် ဒုတိယအဆင့်တွင် တရုတ်တိုင်ပေကြက်တောင်အားကစားမယ် ဟန်ယုချင်နှင့် ယှဉ်ပြိုင်ကစားရာ နှစ်ပွဲပြတ် အနိုင်ရခဲ့သည်။ 

သက်ထားသူဇာသည် ပထမပွဲငယ်တွင် ၂၁-၁၅ မှတ်၊ ဒုတိယပွဲငယ်တွင် ၂၁-၁၃ မှတ်ဖြင့် နှစ်ပွဲပြတ် အနိုင်ရခဲ့ခြင်းဖြစ်သည်။ သက်ထားသူဇာသည် ကွာတားဖိုင်နယ်တွင် အင်ဒိုနီးရှားနိုင်ငံသူ ပရာတီဝီနှင့် ယှဉ်ပြိုင်ကစားရာ နှစ်ပွဲပြတ်အရေးနိမ့်ပြီး ဆီမီးဖိုင်နယ်နှင့် လွဲချော်ခဲ့ခြင်းဖြစ်သည်။ သက်ထားသူဇာသည် ပထမပွဲငယ်တွင် ၂၁-၁၅ မှတ်၊ ဒုတိယပွဲငယ်တွင် ၂၁-၁၁ မှတ် ဖြင့် နှစ်ပွဲပြတ်အရေးနိမ့်ခဲ့သည်။

သက်ထားသူဇာသည် စက်တင်ဘာတွင် တရုတ်နှင့် နီးစပ်ရာနိုင်ငံများ၌ ကျင်းပသည့် BWF ပြိုင်ပွဲလေးခု ဝင်ရောက်ယှဉ်ပြိုင်ပြီး နောက် တစ်လကျော် ပြိုင်ပွဲယှဉ်ပြိုင်မှုရပ်နား ကာ နိုဝင်ဘာဒုတိယပတ်မှ ပြိုင်ပွဲများ ပြန်လည်ယှဉ်ပြိုင်ခြင်းဖြစ်သည်။ 

သက်ထားသူဇာ သည် အိုလံပစ်ပြိုင်ပွဲတွင် နှစ်ကြိမ်ဆက်တိုက် ဝင်ရောက်ယှဉ်ပြိုင်ခွင့်ရပြီးနောက် ၂၀၂၈ အိုလံပစ်ပြိုင်ပွဲတွင်လည်း ဆက်လက်ယှဉ် ပြိုင်ခွင့်ရရန် ပစ်မှတ်ထားနေသဖြင့် BWF ပြိုင်ပွဲများတွင် ပုံမှန်ယှဉ်ပြိုင်နေခြင်းဖြစ်သည်။ သက်ထားသူဇာသည် လက်ရှိကမ္ဘာ့ အဆင့်ရပ်တည်မှုတွင် အဆင့် ၅၆ နေရာ ရပ်တည်နေသည်။