ထားဝယ်မြို့တွင်ပြုလုပ်သော မြန်မာ့တပ်မတော်နှင့် နိုင်ငံ့ဝန်ထမ်းကောင်းများထောက်ခံပွဲသို့ လူဦးရေသောင်းဂဏန်းမျှ တက်ရောက်လာသည်ကို တွေ့ရစဉ်
တနင်္သာရီတိုင်းဒေသကြီး ထားဝယ်မြို့တွင် မြန်မာ့တပ်မတော်နှင့် နိုင်ငံ့ဝန်ထမ်းကောင်းများထောက်ခံပွဲကို ဇန်နဝါရီ ၃ ရက်မွန်းလွဲပိုင်းက ပြုလုပ်ခဲ့ပြီး ဒေသအသီးသီးမှ လူဦးရေ ၁၀၀၀၀ ဝန်းကျင်ခန့် တက်ရောက်ခဲ့ကြကြောင်း သိရသည်။
ယင်းထောက်ခံပွဲကို ထားဝယ်မြို့ရှိ ပန်းသုံးဝကျောင်းတိုက်၌ မွန်းလွဲ ၁ နာရီတွင် စတင်ကျင်းပခဲ့ပြီး ဘူးလက်လှဆွေအပါအဝင် သံဃာတော်နှင့်လူပုဂ္ဂိုလ်အချို့က ဟောပြောမှုများပြုလုပ်ခဲ့ကြောင်း၊ ဟောပြောမှုများပြီး နောက်အချက်ရှစ်ချက်ပါဝင်သည့် ကြေညာချက်တစ်စောင် ထုတ်ပြန်ခဲ့ပြီး ညနေ ၃ နာရီတွင် ဟောပြောပွဲကျင်းပရာ ပန်းသုံးဝကျောင်းတိုက်မှတစ်ဆင့် ထားဝယ်မြို့တွင်းသို့ အလံကိုင်တပ်ဖွဲ့များဖြင့် ချီတက်ခဲ့ကြပြီး ညနေ ၅ နာရီတွင် ဘုန်းကြီးပျံကုန်းစုရပ်သို့ဝင်ရောက်ကာ ချီတက်ပွဲပြီးဆုံးခဲ့သည်ဟု သိရသည်။
ထားဝယ်မြို့သို့ ချီတက်ရာတွင် တပ်မတော်အပေါ်ကျရောက်နေသော နိုင်ငံတကာဖိအားများဖယ်ရှားကြ၊ တပ်မတော်ကိုဖိအားပေးနေသော နိုင်ငံတကာအဖွဲ့အစည်းများအား ဆန့်ကျင်ကြ၊ နိုင်ငံ့အချုပ်အခြာအာဏာ ကာကွယ်နေသော တပ်မတော်သားများအား ထောက်ခံကြ၊ နိုင်ငံဝန်ထမ်းကောင်းများအား အားပေးကြစသည့် ကြွေးကြော်သံ ၁၂ ချက်ဖြင့် ကြွေးကြော်ချီတက်ခဲ့ပြီး ဒေသအသီးသီးမှထောက်ခံပွဲသို့ လာရောက်ကြသူများနှင့် ရဟန်းသံဃာတော်စုစုပေါင်း ၁၀၀၀၀ ဝန်းကျင်ခန့်က အလံများကိုင်ဆောင်ကာ ချီတက်ခဲ့ကြသည်။
ချီတက်ပွဲမစတင်ခင် ဟောပြောပွဲပြောလုပ်ရာ၌ ဟောပြောသူများက ဒီမိုကရေစီဆိုသည်မှာ ပြည်သူ့ဆန္ဒဖြင့်အုပ်ချုပ်ရသည့် အစိုးရကို ဖော်ဆောင်သည့်စနစ်ကိုပြောကြောင်း၊ မြန်မာနိုင်ငံ၏ပြည်သူအများစုမှာ ဗုဒ္ဓဘာသာ မြန်မာတိုင်းရင်းသားများဖြစ်သည့်အတွက် ၎င်းတို့၏အကျိုးစီးပွားဘာသာ သာသနာကိုစောင့်ရှောက်ပေးသည့် အစိုးရတစ်ရပ်ပေါ်ပေါက်လာရန် ယင်းစနစ်ကအထောက်အကူပြုဖို့လိုအပ်ပြီး ၎င်းလမ်းစဉ်အား သွေဖည်မည်ဆိုပါက သစ္စာဖောက်အစိုးရဖြစ်သွားမည်ဖြစ်ပြီး ထိုသို့ဖြစ်သွားပါက တို့တာဝန်အရေးသုံးပါးအရ တပ်မတော်က တာဝန်ယူသွားမည်ဖြစ်ကြောင်း၊ တပ်မတော်ကာကွယ်ရေးဦးစီးချုပ်က တပ်မတော်အနေဖြင့် နိုင်ငံတော်နှင့်နယ်မြေကို ကာကွယ်ရုံဖြင့်မပြီးဘဲ အမျိုးဘာသာသာသနာကိုပါ စောင့်ရှောက်ရလိမ့်မည်ဟု ပြောကြားထားသောကြောင့် အမျိုးဘာသာသာသနာမပျောက်စေရန် တပ်မတော်ကိုထောက်ခံပေးရန်လိုအပ်ပြီး ထိုသို့ထောက်ခံပေးမှသာ အမျိုးဘာသာသာသနာကို စောင့်ရှောက်ထိန်းသိမ်းနိုင်လိမ့်မည်ဟု ပြောကြားမှုများရှိခဲ့သည်။
ထို့အပြင် ၂၀၀၈ ဖွဲ့စည်းပုံအခြေခံဥပဒေကို ကာကွယ်စောင့်ရှောက်ရန် တပ်မတော်က တာဝန်ယူထားပြီး ယင်းဥပဒေအား ဖျက်သိမ်းလိုသည့်သူများအနေဖြင့် ၂၀၀၈ အခြေခံဥပဒေကို ဖျက်သိမ်းမည်ဆိုပါက ၁၉၆၂ ခုနှစ်ကကဲ့သို့ တပ်မတော်မှ နိုင်ငံတာဝန်အရပ်ရပ်ကိုပြန်လည်ရယူ၍ ကျင့်သုံးရုံမှလွဲပြီး အခြားမရှိနိုင်ကြောင်း၊ တပ်မတော်မှာ နိုင်ငံတော်ကို ကာကွယ်စောင့်ရှောက်ပေးသည့် ကျေးဇူးရှိသည့် တပ်မတော်ကြီးဖြစ်သောကြောင့် ပြည်သူများအနေဖြင့် ထောက်ခံရမည်ဖြစ်ကြောင်း ဟောပြောခဲ့ကြသည်။
ယင်းဟောပြောပွဲအပြီး၌ ထုတ်ပြန်ခဲ့သည့်အချက် ရှစ်ချက်ပါ ကြေညာချက်တွင် ၂၀၀၈ ဖွဲ့စည်းပုံအခြေခံဥပဒေနှင့် တို့တာဝန်အရေးသုံးပါးကို ကာကွယ်စောင့်ရှောက်လျက်ရှိသာ မြန်မာ့တပ်မတော်အား အပြည့်အဝထောက်ခံကြောင်း၊ မြန်မာနိုင်ငံ၏ အနောက်တံခါးဖြစ်သည့် ရခိုင်ပြည်နယ်တွင် တာဝန်ထမ်းဆောင်လျက်ရှိသော လုံခြုံရေးတပ်ဖွဲ့များ၏အသက်ပေး၍ စွန့်လွှတ်စွန့်စားစွာ တာဝန်ထမ်းဆောင်မှုကို လေးလေးနက်နက်ဂုဏ်ယူကြောင်းနှင့် နိုင်ငံတော်အချုပ်အခြာအာဏာနှင့် နိုင်ငံတော်ပြိုကွဲရန် ကြံစည်လုပ်ဆောင်သူမှန်သမျှကို ပြင်းပြင်းထန်ထန် ဆန့်ကျင်ရှုတ်ချကြောင်း စသည့်အချက်များပါရှိသည်။
