ဘာစီလိုနာအသင်းသည် ရာထူးမှထုတ်ပယ်ထားသည့် နည်းပြဟောင်း ဆယ်တီယန်နှင့် လျော်ကြေးအတွက် သဘောတူညီမှုမရသေးသဖြင့် နည်းပြသစ် ရော်နယ်လ်ကိုးမန်းမှာ အသင်း၏ တရားဝင်ပွဲစဉ်များတွင် ကိုင်တွယ်ခွင့်မရသေးကြောင်း သိရသည်။
ဘာစီလိုနာအသင်းသည် ချန်ပီယံလိဂ်ပြိုင်ပွဲ၌ ဘိုင်ယန်မြူးနစ်အသင်းအား (၂-၈) ဂိုးဖြင့် အရှက်တကွဲရှုံးနိမ့်ပြီးနောက် (၃)ရက်အကြာ ဩဂုတ် (၁၇) ရက်တွင် နည်းပြ ဆယ်တီယန်ကို ရာထူးမှထုတ်ပယ်ခဲ့ပြီး ဩဂုတ် (၁၉) ရက်မှာပင် ရော်နယ်လ်ကိုးမန်းကို နည်းပြသစ်အဖြစ် ခန့်အပ်ခဲ့သည်။
သို့သော် ဘာစီလိုနာအသင်းအနေဖြင့် ဆယ်တီယန်အား ထုတ်ပယ်ခြင်းအတွက် နှစ်ဦးနှစ်ဖက် သဘောတူညီမှု မရသေးဘဲ ရုံးလုပ်ငန်းဆိုင်ရာ စာရွက်စာတမ်းကိစ္စများ ဆောင်ရွက်ရန် ကျန်ရှိနေသေးကြောင်း Cadena Cope ရေဒီယိုက ဗုဒ္ဓဟူးနေ့ညပိုင်းတွင် ထုတ်လွှင့်ကြေညာခဲ့သည်။
သို့ဖြစ်ရာ ဆယ်တီယန်အား ထုတ်ပယ်ခြင်းမှာ တရားမဝင်သေးသလို ရော်နယ်လ်ကိုးမန်းကို နည်းပြသစ်အဖြစ် ခန့်အပ်ခြင်းမှာလည်း စပိန်ဘောလုံးအဖွဲ့ချုပ် (RFEF)၏ တရားဝင်အသိအမှတ်ပြုမှုမရသေးခြင်းဖြစ်ကြောင်း သိရသည်။
ရော်နယ်လ်ကိုးမန်းသည် ဘာစီလိုနာအသင်း၏ ခြေစမ်းပွဲနှစ်ပွဲတွင် ကွင်းဘေးစည်း၌ ကြီးကြပ်ခွင့်ရထားသော်လည်း ယင်းအခြေအနေကို ဖြေရှင်းနိုင်ခြင်းမရှိပါက လာလီဂါပထမဆုံးပွဲကို တာဝန်ယူကိုင်တွယ်ခွင့်ရမည်မဟုတ်ကြောင်း Cadena Cope ရေဒီယိုက ကြေညာခဲ့သည်။
