အက်သလက်တီကိုအသင်းသည် အသင်းနည်းပြ ဆီမြွန်နီ ကိုင်တွယ်ခဲ့သည့် ၂၀၁၁- ၁၂ ရာသီမှ စတင်ကာ ကစားသမားရောင်းချမှုမှ ယူရိုသန်း (၈၆၀)ကျော် ရရှိထားကြောင်း စပိန်အားကစားသတင်းစာ Marca က ဖော်ပြခဲ့သည်။
အသက် (၅၀)နှစ်အရွယ်ရှိ အာဂျင်တီးနားလူမျိုးနည်းပြ ဆီမြွန်နီသည် အက်သလက်တီကိုအသင်းကို ၂၀၁၁ ခုနှစ်၊ ဒီဇင်ဘာ (၂၃)ရက်တွင် စတင်ကိုင်တွယ်ခဲ့ပြီး (၉)နှစ်တာကာလအတွင်း အသင်းရှိကစားသမားများကို ရောင်းချမှုမှ ယူရို (၈၆၀.၉)သန်းအထိ ရရှိထားသည်။
အက်သလက်တီကိုအသင်းအနေဖြင့် ၂၀၁၁-၁၂ ရာသီမှ စတင်ကာ ကစားသမားရောင်းချမှုမှ ဝင်ငွေအများဆုံးရ အသင်းများစာရင်းတွင် ချယ်လ်ဆီး (ယူရို ၉၇၉.၁ သန်း)၊ မိုနာကို (ယူရို ၉၅၀.၃၇ သန်း)၊ ဂျူဗင်တပ်စ် (၉၃၈.၆၅ သန်း)၊ ဘင်ဖီကာ (ယူရို ၉၂၁.၄၂ သန်း) တို့နောက် အဆင့် (၅)နေရာတွင် ရပ်တည်ခဲ့သည်။
အက်သလက်တီကိုအသင်းသည် ယခုနွေရာသီအပြောင်းအရွှေ့တွင် ကပ်ဘေးကြောင့် ဘဏ္ဍာရေးအကျပ်အတည်းနှင့်ရင်ဆိုင်နေရပြီး အသင်းကစားသမားအချို့ကို ရောင်းချရန်စီစဉ်နေသည်။
