ဝက်ဖို့ဒ်အသင်းသည် ပြီးခဲ့သည့် တနင်္ဂနွေနေ့ (ဇူလိုင် ၁၉ ရက်)က နည်းပြဖြစ်သူ နီဂျယ်ပီယာဆန်အား ရာထူးမှ ထုတ်ပယ်လိုက်ကြောင်း သိရှိရသည်။
သောကြာနေ့က ကစားခဲ့သော ပရီးမီးယားလိဂ်ပွဲစဉ်တွင် အဓိကပြိုင်ဘက်အသင်းဖြစ်သည့် ဝက်စ်ဟမ်းအသင်းအား (၁-၃)ဂိုးဖြင့် အရေးနိမ့်ခဲ့ပြီးနောက် ဝက်ဖို့ဒ်အသင်းတာဝန်ရှိသူများသည် ပီယာဆန်နှင့်လမ်းခွဲရန် ဆုံးဖြတ်ခဲ့ခြင်းဖြစ်သည်။
ပီယာဆန်သည် ပြီးခဲ့သည့် ၂၀၁၉၊ ဒီဇင်ဘာလတွင် ဝက်ဖို့ဒ်အသင်းအား စတင်တာဝန်ယူခဲ့သူဖြစ်ပြီး အသင်းကို ပရီးမီးယားလိဂ်ပွဲစဉ် (၂၀)ပွဲကိုင်တွယ်ခဲ့ရာ၌ (၇)ပွဲနိုင်၊ (၄)ပွဲသရေ၊ (၉)ပွဲရှုံးခဲ့သည်။
သူစတင်ကိုင်တွယ်ချိန်မှ ပရီးမီးယားလိဂ်ပြိုင်ပွဲသာ စတင်ခဲ့ပါက သူ၏ ဝက်ဖို့ဒ်အသင်းမှာ တန်းဆင်းအန္တရာယ်ရှိမည်မဟုတ်ဘဲ အဆင့် (၁၂)နေရာတွင် ရပ်တည်နေမည်ဖြစ်ကြောင်း ဗြိတိန်သတင်းစာ Daily Mail က တွက်ချက်ဖော်ပြခဲ့သည်။
နီဂျယ်ပီယာဆန်သည် ယခုရာ သီတွင် နိုင်ပွဲဆက်နေသော လီဗာပူးလ်အသင်းကို (၃-၀)ဂိုးဖြင့် အနိုင်ယူခဲ့ပြီး (၄၄)ပွဲဆက်တိုက် ရှုံးပွဲမရှိစံချိန်ရပ်တန့်သွားအောင် ပြုလုပ်နိုင်ခဲ့သူဖြစ်သည်။
သူ၏ဝက်ဖို့ဒ်အသင်းမှာ ရာသီလက်ကျန်(၂)ပွဲတွင် မန်စီးတီး၊ အာဆင်နယ် အစရှိသောအသင်းကြီးများနှင့် ရင်ဆိုင်ရမည်ဖြစ်သည်။
ဝက်ဖို့ဒ်အသင်း၏ လက်ကျန်(၂)ပွဲကို အသင်းနည်းပြအဖွဲ့ဝင်များဖြစ်သည် ဟေဒန်မူလင်စ်နှင့် ဂရေဟမ်စတက်ခ်တို့က ကိုင်တွယ်သွားမည်ဖြစ်ကြောင်း သိရသည်။
