တနင်္သာရီတိုင်းဒေသကြီး အစိုးရအဖွဲ့ရုံးကို တွေ့ရစဉ်
အဂတိလိုက်စားမှု တိုက်ဖျက်ရေးကော်မရှင်က အဂတိလိုက်စားမှု ကျူးလွန်သည့် နိုင်ငံ့ဝန်ထမ်းကို အရေးယူရန် ဖမ်းဆီးခွင့်တောင်းခံလာပါက ခွင့်ပြုချက်အမြန်ပေးသွားရန် တိုင်းဒေသကြီးအစိုးရအဖွဲ့မှ တနင်္သာရီတိုင်းဒေသကြီးအဆင့် ဌာနဆိုင်ရာများအားလုံးသို့ မေ ၁၀ ရက်က ညွှန်ကြားထားကြောင်း သိရသည်။
နိုင်ငံတော်သမ္မတရုံး၏ ဧပြီ ၉ ရက် ရက်စွဲပါ စာအမှတ် ၅ (၁) (၀၀၅)/၆/သမ္မတရုံးဖြင့် ပေးပို့လာသည့်စာအရ အဂတိလိုက်စားမှု တိုက်ဖျက်ရေးကော်မရှင်အနေဖြင့် တိုင်ကြားခံရသူများအား စုံစမ်းစစ်ဆေးရေးအဖွဲ့ဖြင့် စစ်ဆေးချိန်မှ တရားရုံးသို့ တရားစွဲဆို တင်ပို့ချိန်အတွင်း ကြိုတင်သိရှိပြီး ထွက်ပြေးတိမ်းရှောင်ခြင်းကြောင့် တရားခံပြေးမှုဖြစ်စဉ်များ များပြားလျက်ရှိကြောင်း၊ နိုင်ငံ့ဝန်ထမ်းတစ်ဦးကို တရားစွဲဆိုအရေးယူရန်နှင့် ဖမ်းဆီးချုပ်နှောင်မှု ခွင့်ပြုရန်ကိစ္စတို့နှင့်စပ်လျဉ်း၍ သက်ဆိုင်ရာဝန်ထမ်းအဖွဲ့အစည်း အကြီးအမှူးထံ အဂတိလိုက်စားမှု တိုက်ဖျက်ရေးကော်မရှင်မှ ခွင့်ပြုချက်တောင်းလာပါက ခွင့်ပြုချက်ကို အမြန်ပေးသွားရန် အကြောင်းကြားလာသဖြင့် သိရှိလိုက်နာ ဆောင်ရွက်သွားရန် အကြောင်းကြားပါသည်ဟု တိုင်းဒေသကြီးအစိုးရအဖွဲ့ အတွင်းရေးမှူး ဦးကောင်းစံဦး လက်မှတ်ဖြင့် ထုတ်ပြန်ခဲ့သည့် ညွှန်ကြားစာတွင် ဖော်ပြထားသည်။
“အခုက အဂတိလိုက်စားမှုကော်မရှင်က တစ်ခုခုဖြစ်တယ်ဆိုရင် ထွက်ပြေးသွားကြတယ်။ ဌာနဆိုင်ရာတချို့ပေါ့။ ဥပမာ-တမူးခရိုင်မှာ ခရိုင်အုပ်ချုပ်ရေးမှူးကို လွှတ်တော်ကိုယ်စားလှယ်တစ်ယောက်က တိုင်တယ်။ အမှုစစ်နေရင်း တန်းလန်းမှာ သူ့ကို အဂတိလိုက်စားမှုကော်မတီက လာဖြေရှင်းဖို့ ဆင့်ခေါ်တော့ မဖြေရှင်းဘဲ ထွက်ပြေးသွားတယ်။ အဲဒီလိုကိစ္စမျိုးတွေ လာတယ်ထင်တယ်။ အဲဒီလိုမျိုးမဖြစ်ဖို့အတွက် အဂတိလိုက်စားမှုကော်မရှင်က စစ်ဆေးတွေ့ရှိလို့ အမှန်တကယ် အရေးယူဖို့လိုတယ်ဆိုရင် သက်ဆိုင်ရာဌာနက ကြန့်ကြာအောင်မလုပ်ဖို့၊ ဖမ်းတဲ့ဟာကို ခွင့်ပြုတယ်ဆိုပြီး သက်ဆိုင်ရာဌာနက မြန်မြန်ဆန်ဆန် အမိန့်ထုတ်ပေးဖို့ ဒီစာကိုထုတ်ရတာ” ဟု တိုင်းဒေသကြီးအစိုးရအဖွဲ့ အတွင်းရေးမှူး ဦးကောင်စံဦးက ပြောကြားသည်။
အဂတိလိုက်စားမှု တိုက်ဖျက်ရေးကော်မရှင်က တိုင်ကြားလာမှုများအရ စစ်ဆေးရန်လိုအပ်၍ ဆင့်ခေါ်လာပါက သက်ဆိုင်ရာဌာန အကြီးအကဲက အထက်အဆင့်ဆင့်သို့ တင်ပြ၍ ခွင့်ပြုချက်ရယူနေမည်ဆိုပါက အချိန်ကြန့်ကြာမှုများ ဖြစ်ပေါ်လာမည်ဖြစ်ကြောင်း၊ ထို့ကြောင့် အဂတိလိုက်စားမှု တိုက်ဖျက်ရေးကော်မရှင်မှ စစ်ဆေးမှုတွင် မတားဆီးရန်နှင့် ၎င်းတို့၏ လုပ်ငန်းအောင်မြင်စေရန်အတွက် နှောင့်နှေးကြန့်ကြာမှုမရှိဘဲ လျင်မြန်စွာဆောင်ရွက်နိုင်ရန် နိုင်ငံတော်သမ္မတရုံးထံမှ ညွှန်ကြားလာခြင်းဖြစ်ပြီး တနင်္သာရီတိုင်းဒေသကြီးအတွင်းတွင် အဂတိလိုက်စားမှု တိုက်ဖျက်ရေးကော်မရှင်မှ ခေါ်ယူစစ်ဆေးသည့်အမှု မရှိသေးကြောင်း ဦးကောင်းစံဦးက ပြောကြားသည်။
