မြန်မာနိုင်ငံတော်ဗဟိုဘဏ်ဥက္ကဋ္ဌအဖြစ် ဒေါက်တာခင်နိုင်ဦး၊ ဒုတိယဥက္ကဋ္ဌနှင့် ဒါရိုက်တာအဖွဲ့ဝင်များ၏ အမည်စာရင်းတင်သွင်းမှုကို ယနေ့ (ဧပြီ ၇ ရက်) တွင် ကျင်းပသည့် ပြည်ထောင်စုလွှတ်တော်တွင် ပြုလုပ်ခဲ့သည်။
နိုင်ငံတော်သမ္မတအဖြစ် ရွေးချယ်တင်မြှောက်ခံထားရသူက အဆိုပြုတင်ပြသော မြန်မာနိုင်ငံတော်ဗဟိုဘဏ် ဥက္ကဋ္ဌ၊ ဒုတိယဥက္ကဋ္ဌနှင့် ဒါရိုက်တာအဖွဲ့ဝင်များအဖြစ် ခန့်အပ်တာဝန်ပေးလိုသည့် ဒေါက်တာခင်နိုင်ဦး၊ ဦးဇော်မြင့်နိုင်၊ ဦးသက်ထွန်းအောင်၊ ဒေါက်တာစန္ဒာဦး၊ ဒေါက်တာရီရီအေး၊ ဦးတင်မြင့်၊ ဒေါက်တာလှညွန့်၊ ဒေါက်တာဇော်ဦး၊ ဒေါက်တာဖြူဖြူအိတို့၏ အမည်စာရင်းများကို ပြည်ထောင်စုလွှတ်တော်နာယကက လွှတ်တော်သို့ တင်ပြခဲ့သည်။
အဆိုပါကိုးဦးအနက် ဒေါက်တာခင်နိုင်ဦးအား ဥက္ကဋ္ဌအဖြစ်လည်းကောင်း၊ ဒုတိယဥက္ကဋ္ဌများအဖြစ် ဦးဇော်မြင့်နိုင်၊ ဦးသက်ထွန်းအောင်၊ ဒေါက်တာစန္ဒာဦးတို့ကို တာဝန်ပေးအပ်မည်ဖြစ်ကြောင်း နိုင်ငံတော်သမ္မတအဖြစ် ရွေးချယ်တင်မြှောက်ခံထားရသူက အဆိုပြုထားကြောင်းသိရသည်။
ထိုသို့ နိုင်ငံတော်သမ္မတအဖြစ် ရွေးချယ်တင်မြှောက်ခံထားရသူက အဆိုပြုထားသည့် မြန်မာနိုင်ငံတော်ဗဟိုဘဏ် ဥက္ကဋ္ဌ၊ ဒုတိယဥက္ကဋ္ဌများနှင့် ဒါရိုက်တာအဖွဲ့ဝင်များအား ကန့်ကွက်လိုသူရှိက ဆွေးနွေးခြင်းနှင့် ကန့်ကွက်သူမရှိပါက ခန့်အပ်ရန်သဘောတူကြောင်း ကြေညာခြင်းတို့ကို ဧပြီ ၉ ရက်ပြည်ထောင်စုလွှတ်တော်အစည်းအဝေးတွင် ပြုလုပ်မည်ဖြစ်သည်။
လက်ရှိတွင် ဒေါက်တာခင်နိုင်ဦးသည် ပြည်ထောင်စုစာရင်းစစ်ချုပ်တာဝန် ထမ်းဆောင်နေသူဖြစ်သည်။
