၂၀၂၆ ခုနှစ် ဇန်နဝါရီ ၁၁ ရက်တွင် ကျင်းပမည့် ရွေးကောက်ပွဲအပိုင်း(၂)၌ ပါဝင်သည့် လှည်းကူးမြို့နယ်တွင် ပြည်ထောင်စုကြံ့ခိုင်ရေးနှင့် ဖွံ့ဖြိုးပါတီက မဲဆွယ်ဟောပြောပွဲကို လှည်းကူးမြို့နယ် ဒါးပိန်(မြောက်ပိုင်း)ကျေးရွာရှိ နေအိမ်ခြံဝန်းတစ်ခု၌ ယနေ့(ဇန်နဝါရီ ၈ ရက်)တွင် ပြုလုပ်ခဲ့သည်။
အဆိုပါ မဲဆွယ်ဟောပြောပွဲတွင် နိုင်ငံတော်အလံအား အလေးပြုခြင်း၊ နိုင်ငံတော်သီချင်းသီဆိုခြင်းတို့ပြုလုပ်ပြီး ကျော်ကျော်နန္ဒ၊ အုန်းသီး၊ နန်းဝေဝေမြင့်၊ ဆိုတေး၊ ဆုမြတ်ပိုင်စိုး၊ Brown စသည့်အနုပညာရှင်များက သီဆိုဖျော်ဖြေမှုများပြုလုပ်ခဲ့ကာ ပြည်ခိုင်ဖြိုးပါတီဝန်းရံထောက်ခံသူ အင်အား ၃၀၀၀ ခန့် တက်ရောက်ခဲ့သည်။
ထို့နောက် ရန်ကုန်တိုင်းဒေသကြီး ပြည်ခိုင်ဖြိုးပါတီဥက္ကဌ ပြည်သူ့လွှတ်တော်ကိုယ်စားလှယ်လောင်း ဦးခင်မောင်စိုးက မဲဆွယ်ဟောပြောခြင်းတို့ ပြုလုပ်ခဲ့သည်။
ထိုသို့ မဲဆွယ်ဟောပြောရာတွင် ပြည်သူ့လွှတ်တော်ကိုယ်စားလှယ်လောင်း ဦးခင်မောင်စိုးက ၎င်းအနေဖြင့် ယခင်သမ္မတဦးသိန်းစိန်အစိုးရလက်ထက်တွင် လျှပ်စစ်ဝန်ကြီးတာဝန်ရယူစဉ်က လှည်းကူးမြို့နယ်အတွင်း ဒေသဖွံ့ဖြိုးရေး ဆောင်ရွက်ပေးခဲ့သည့် အခြေအနေများနှင့် ထိုစဉ်က ပြည်ခိုင်ဖြိုးပါတီက အပြောင်းအလဲဆောင်ရွက်ခဲ့မှုအခြေအနေများ၊ လက်ရှိပြည်ခိုင်ဖြိုးပါတီ၏ ရွေးကောက်ပွဲကြေညာစာတမ်းပါ အလုပ်သမားအရေး၊ လယ်သမားအရေး၊ ကျန်းမာရေး၊ လျှပ်စစ်မီးရရှိရေး၊ စီးပွားရေး၊ ငြိမ်းချမ်းရေးဖော်ဆောင်သွားမည့်အခြေအနေများစသည့် ကိစ္စရပ်များကို ရှင်းလင်းဟောပြောခဲ့သည်။
ယင်းနောက် ပြည်ခိုင်ဖြိုးပါတီ တိုင်းဒေသကြီးလွှတ်တော်ကိုယ်စားလှယ်လောင်း ဦးအောင်မျိုးနိုင်က MEVM မဲပေးစက်အကြောင်း သရုပ်ပြရှင်းလင်း၍ မဲဆွယ်ဟောပြောခဲ့သည်။
လှည်းကူးမြို့နယ်တွင် ရွေးကောက်ပွဲယှဉ်ပြိုင်မည့်ပြည်ခိုင်ဖြိုးပါတီ ကိုယ်စားလှယ်လောင်းများမှာ ပြည်သူ့လွှတ်တော်မဲဆန္ဒနယ်တွင် ဦးခင်မောင်စိုး (သမ္မတဦးသိန်းစိန်အစိုးရလက်ထက် ပြည်ထောင်စုလျှပ်စစ်ဝန်ကြီး)၊ အမျိုးသားလွှတ်တော်မဲဆန္ဒနယ်(FPTP)တွင် ဦးခင်မောင်တင့်(ပါတီဗဟိုကော်မတီဝင်)၊ တိုင်းဒေသကြီးလွှတ်တော်မဲဆန္ဒနယ်တွင် ဦးအောင်မျိုးနိုင်(လှည်းကူးခရိုင်ပါတီဥက္ကဌ) တို့ဖြစ်သည်။
လှည်းကူးမြို့နယ်တွင် မဲပေးပိုင်ခွင့်ရှိသူ ၂၁၀,၀၀၀ ရှိပြီး ပြည်ခိုင်ဖြိုးပါတီ၊ တိုင်းရင်းသားစည်းလုံးညီညွတ်ရေးပါတီ၊ ပြည်သူ့ပါတီ၊ ပြည်သူ့ရှေ့ဆောင်ပါတီ၊ ရှမ်းနှင့် တိုင်းရင်းသားများဒီမိုကရက်တစ်ပါတီ(ကျားဖြူပါတီ)၊ မြန်မာနိုင်ငံတောင်သူလယ်သမားဖွံ့ဖြိုးတိုးတက်ရေးပါတီနှင့် တစ်သီးပုဂ္ဂလကိုယ်စားလှယ်လောင်းများ ဝင်ရောက်ယှဉ်ပြိုင်မည်ဖြစ်သည်။
