ကော့သောင်းမြို့၊ အထက (၃) ကျောင်းမှ ကျောင်းသားတစ်ဦးက တစ်ခန်းထဲနေ ကျောင်းသားတစ်ဦးကို ပေါက်တူးရိုးဖြင့်ရိုက်ခဲ့မှု မြို့ခံများအကြား ဝေဖန်မှုမြင့်တက်နေကြောင်း သိရသည်။
ဖြစ်စဉ်မှာ ဇွန်လပထမအပတ်အတွင်း ဖြစ်ပွားခဲ့သော်လည်း ယခုရက်ပိုင်းတွင် မြို့ခံများနှင့် လူမှုကွန်ယက်တွင် ဝေဖန်မှုများ ပြန်လည်ဖြစ်ပေါ်လာခြင်းဖြစ်ကြောင်း သိရသည်။
“အရိုက်ခံရတဲ့ကျောင်းသားက Grade -9 အတန်းမှာ ပညာသင်ကြားနေတာပါ၊ အရိုက်ခံရပြီးတဲ့နောက်မှာ အာရုံကြောထိသွားလို့ ထိုင်းနိုင်ငံ၊ ရနောင်းမြို့ဆေးရုံကို ပို့လိုက်ရတယ်၊ ဖြစ်စဉ်ဖြစ်တဲ့အချိန်တုန်းက မျက်လုံးတွေမမြင်ရတော့တဲ့အထိ ဖြစ်သွားတယ်၊ ဆေးကုသမှုခံယူပြီးနောက်မှာတော့ ပြန်လည်သက်သာလာလို့ အမြင်အာရုံပြန်ရပြီလို့ကြားရတယ်၊ အခုဆေးရုံကဆင်းခွင့်ရလို့ ပြန်သက်သာနေပါပြီ” ဟု ကော့သောင်းမြို့ခံတစ်ဦးက ပြောကြားသည်။
ဖြစ်စဉ်မှာ ဇွန် ၅ ရက် နေ့လယ် ၃ နာရီခန့်တွင် အထက(၃)၊ အေးရိပ်ငြိမ်မှ ကျောင်းသားတစ်ဦးကို တစ်ခန်းထဲနေကျောင်းသားတစ်ဦးက ပေါက်တူးရိုးဖြင့် ရိုက်မှုဖြစ်ပွားခဲ့ခြင်းဖြစ်သည်။
အဆိုပါကျောင်းသားမှာ အရိုက်ခံရ၍ ကော့သောင်းပြည်သူ့ဆေးရုံ၌ ရောက်ရှိနေကြောင်း တာဝန်ကျဆရာဝန်ဒေါက်တာလင်းကျော်ကျော်မှ ဖုန်းဖြင့် အကြောင်းကြားလာသဖြင့် ရဲတပ်ဖွဲ့က သွားရောက်ကြည့်ရှုရာ မောင်ပြည့်ဖြိုးမောင်မောင်၊ ၁၄ နှစ်၊ (ဘ) ဦးအောင်အောင်လွင်၊ ၉ တန်း(G-9)၊ အေးရိပ်ငြိမ်ရပ်ကွက်၊ ကော့သောင်းမြို့နေသူဖြစ်ကြောင်း သိရှိရပြီး ဝဲနားသွေးထွက်၊ ဝဲနားနောက်ဖူးယောင်ဒဏ်ရာရရှိသဖြင့် မှုခင်းဆေးစာရေးသားခဲ့ကြောင်း သိရသည်။
အရိုက်ခံရသည့် မောင်ပြည့်ဖြိုးမောင်မောင်မှာ ရရှိဒဏ်ရာမသက်သာ၍ ကော့သောင်းမြို့၊ ဆေးရုံမှတဆင့် ထိုင်းနိုင်ငံ၊ ရနောင်းမြို့ဆေးရုံသို့ ပို့ဆောင်ပေးခဲ့ရကြောင်း သိရသည်။
ဖြစ်စဉ်အားစုံစမ်းခဲ့ရာတွင် ဇွန် ၅ ရက်က မောင်ပြည့်ဖြိုးမောင်မာင်ကို တစ်ခန်းတည်းစာသင်နေသည့် မောင်ကျော်မိုးဝင်း ၊(၁၆ နှစ်)က သမိုင်းစာသင်ချိန်နှင့် သိပ္ပံစာသင်ချိန် ဆရာမအကူးအပြောင်းအချိန်တွင် ပေါက်တူးရိုးဖြင့် ရိုက်ခဲ့ကြောင်း၊ မောင်ပြည့်ဖြိုးမောင်မောင်နှင့် မောင်ကျော်မိုးဝင်းမှာရန်စရှိကြောင်း မောင်ကျော်မိုးဝင်းမှ မခံနိုင်ဘဲပေါက်တူးရိုးအားယူ၍ ဦးခေါင်းအားရိုက်ခဲ့ရာ ဦးခေါင်းကွဲခြင်းမရှိဘဲ ဝဲနားသွေးထွက်၊ ဝဲနားနောက်ဖူးယောင်ဒဏ်ရာ(သတိမေ့)(စိုးရိမ်ရ) ဒဏ်ရာရရှိခဲ့ခြင်းဖြစ်ကြောင်း သိရသည်။
ရရှိသည့် ဒဏ်ရာများကို ထိုင်းနိုင်ငံ၊ ရနောင်းမြို့၊ ဆေးရုံတွင်ခွဲစိတ်ကုသမှုခံယူပြီးနောက် ဇွန် ၇ ရက်တွင် အနည်းငယ်ပြန်မြင်ခဲ့ရကြောင်း ယခုအခါသက်သာပြီး နောက်မျက်လုံးပြန်မြင်ရကြောင်း ဒေသခံများက ပြောကြားခဲ့သည်။
အဆိုပါဖြစ်စဉ်ဖြစ်ပွားပြီးနောက် နှစ်ဖက်မကျေလည်မှုများရှိနေခဲ့ရာမှ လူမှုကွန်ယက်တွင် ကျယ်ကျယ်ပြန့်ပြန်ဝေဖန်မှုများ ဖြစ်ပေါ်လာခြင်းဖြစ်ကြောင်း သိရသည်။
