ကတ်ရှ်မီးယားဒေသ ပါဟယ်လ်ဂမ်ကျေးရွာတွင် ဖြစ်ပွားခဲ့သည့် အကြမ်းဖက်တိုက်ခိုက်မှုကြောင့် ထိခိုက်သေဆုံးခဲ့ရသူများအား အောက်မေ့သတိရ ဂါရဝပြုခြင်းအခမ်းအနားအား ရန်ကုန်မြို့၊ ရွှေဘုံသားလမ်းရှိ အိန္ဒိယစင်တာ၌ ဧပြီ ၃၀ ရက်တွင် ကျင်းပခဲ့သည်။
အဆိုပါအခမ်းအနားသို့ မြန်မာနိုင်ငံဆိုင်ရာ အိန္ဒိယသံအမတ်ကြီး၊ မြန်မာနိုင်ငံခြားရေးဝန်ကြီးဌာနတာဝန်ရှိသူများ၊ မြန်မာနိုင်ငံလုံးဆိုင်ရာ ဟိန္ဒူဘာသာရေးဗဟိုအဖွဲ့ချုပ်မှတာဝန်ရှိသူများ၊မြန်မာ-အိန္ဒိယ ချစ်ကြည်ရေးအသင်းမှတာဝန်ရှိသူများ၊ မြန်မာနိုင်ငံရေး ပါတီများမှ ခေါင်းဆောင်များနှင့် ကိုယ်စားလှယ်များ၊ တတ်သိပညာရှင်များ၊ အိန္ဒိယနွယ်ဖွားများနှင့် မြန်မာသတင်းမီဒီယာများ တင်ရောက်ခဲ့သည်။
ယင်းအခမ်းအနားတွင် ပါဟယ်လ်ဂမ် အကြမ်းဖက်တိုက်ခိုက်မှုကြောင့် ထိခိုက်နစ်နာခဲ့သူများ၏ ထုတ်ဖော်ပြောဆိုမှုများအကြောင်းကို ဖော်ပြသည့် ၁၅ မိနစ်ကြာ ဗီဒီယိုကို ဦးစွာပြသခဲ့ပြီး ပါဟယ်လ်ဂမ် အကြမ်းဖက်တိုက်ခိုက်မှုကြောင့် ထိခိုက်သေဆုံးခဲ့သူများအား အောက်မေ့သတိရခြင်း ပန်းခွေချအစီအစဉ်ကိုပြုလုပ်ခဲ့သည်။
အောက်မေ့သတိရပန်းခွေချအစီအစဉ်တွင် သံအမတ်ကြီး Abhay Thakur၊ နိုင်ငံခြားရေးဝန်ကြီးဌာန၊ မဟာဗျူဟာလေ့လာရေးနှင့် လေ့ကျင့်ရေးဦးစီးဌာနမှ ညွှန်ကြားရေးမှူးချုပ် ဦးဇော်ဖြိုးဝင်း၊ မြန်မာနိုင်ငံလုံးဆိုင်ရာ ဟိန္ဒူဘာသာရေးဗဟိုအဖွဲ့ချုပ် ဥက္ကဋ္ဌ ဦးတင်မြင့်နှင့် မြန်မာ-အိန္ဒိယ ချစ်ကြည်ရေးအသင်း အကြံပေး ဦးဝင်းနိုင်တို့က
ပါဟယ်လ်ဂမ် အကြမ်းဖက်တိုက်ခိုက်မှုကြောင့် သေဆုံးခဲ့သူများအား ပန်းခွေချခြင်းနှင့် ပန်းများကြဲဖြန့်ကာ အောက်မေ့သတိရကြောင်း ဖော်ပြခဲ့သည်။
ထို့နောက် အခမ်းအနားတက်ရောက်လာသူများက ပါဟယ်လ်ဂမ် အကြမ်းဖက်တိုက်ခိုက်မှုကြောင့် သေဆုံးခဲ့သူများအတွက် အောက်မေ့သတိရခြင်း တစ်မိနစ်ငြိမ်သက် ဆုတောင်းခြင်းပြုလုပ်ခဲ့သည်။
အိန္ဒိယသံသံအမတ်ကြီးက အကြမ်းဖက်မှုကျူးလွန်သူများ၊ စီစဉ်သူများနှင့်ကျောထောက်နောက်ခံပြုသူများကို တရားမျှတမှုရရှိစေရန် အိန္ဒိယ၏ သန္နိဋ္ဌာန်ကို ထပ်လောင်းအတည်ပြုခဲ့ပြီး အိန္ဒိယနိုင်ငံနှင့် စည်းလုံးညီညွှတ်စွာရပ်တည်ပြီး ခိုင်မြဲသော ပံ့ပိုးကူညီမှုအတွက် မြန်မာအစိုးရနှင့် ပြည်သူများကို ကျေးဇူးတင်ကြောင်းလည်း ပြောကြားခဲ့သည်။
ပါဟယ်လ်ဂမ်အကြမ်းဖက်တိုက်ခိုက်မှု ဖြစ်စဉ်၌ အိန္ဒိယနိုင်ငံပြည်နယ်အသီးသီးမှ အိန္ဒိယနိုင်ငံသား ၂၅ ဦးနှင့် နီပေါနိုင်ငံသား တစ်ဦးစုစုပေါင်း ခရီးသွား ၂၆ ဦး သေဆုံးခဲ့သည်။
ကတ်ရှ်မီးယားဒေသ ပါဟယ်လ်ဂမ်ကျေးရွာတွင် ဖြစ်ပွားခဲ့သည့် အကြမ်းဖက်တိုက်ခိုက်မှုနှင့်ပတ်သက်၍ ပါကစ္စတန်နိုင်ငံက တာဝန်ယူရမည်ဟု အိန္ဒိယနိုင်ငံက ထုတ်ဖော်ပြောကြားထားပြီး ယခုဖြစ်စဉ်အပေါ် အိန္ဒိယနှင့် ပါကစ္စတန်အကြား တင်းမာမှုဖြစ်ပေါ်လျက်ရှိသည်။
