ဝက်စ်ဟမ်းအသင်း တောင်ပံကစားသမား မိုဟာမက်ကူဒူစ်၏ ပွဲပယ်ပြစ်ဒဏ်ကို နှစ်ပွဲထပ်တိုးလိုက်သဖြင့် စုစုပေါင်း ငါးပွဲပယ်ခံရမည်ဖြစ်ကြောင်း သိရသည်။

ကူဒူစ်သည် အောက်တိုဘာ ၁၉ ရက်က စပါးအသင်းအား အဝေးကွင်းတွင် (၄-၁) ဂိုးဖြင့် ရှုံးနိမ့်သည့် ပရီးမီးယားလိဂ်ပွဲစဉ်တွင် အနီကတ်ဖြင့် ထုတ်ပယ်ခံခဲ့ရသည်။

၎င်းသည် ပြိုင်ဘက်အသင်းနောက်ခံလူ ဗန်ဒီဗန်ကို ပြစ်ဒဏ်ကျူးလွန်သဖြင့် အဝါကတ်သာပြခံရသော်လည်း ဗန်ဒီဗန်နှင့် ကွင်းလယ်လူ ပါပီမာတာဆားတို့နှစ်ဦး၏မျက်နှာကို လက်ဖြင့် တွန်းခဲ့သောကြောင့် အနီကတ်ပြခံရခြင်းဖြစ်သည်။

ကူဒူစ်အနေဖြင့် ကနဦးတွင် တိုက်ရိုက်အနီကတ်အတွက် သုံးပွဲပယ်ခံထားရပြီး ကိုယ်ထိလက်ရောက်ကျူးလွန်မှုကို ဝန်ခံခဲ့သောကြောင့် ထပ်တိုးနှစ်ပွဲပယ်ပြစ်ဒဏ်ချမှတ်ခံရခြင်းဖြစ်ရာ ဒီဇင်ဘာမှသာ ပြန်လည်ကစားခွင့်ရတော့မည်ဖြစ်သည်။