ချယ်လ်ဆီးအသင်းနဲ့ပတ်သက်လို့ အသင်းပရိသတ်တွေရဲ့ နာကျင်ဝမ်းနည်းရခြင်းတွေ၊ စိတ်အလိုမကျရခြင်းတွေ၊ မျှော်လင့်ချက်မဲ့ရခြင်းတွေဟာ အချိန်တစ်ခု ကြာမြင့်ခဲ့ပါပြီ။ အသင်းရဲ့ ဘယ်အခြေအနေ၊ ဘယ်ရှုထောင့်ကိုကြည့်ကြည့် စိတ်ကျေနပ်အားရမှု တစ်စုံတစ်ရာမရှိသလို၊ မရေရာမသေချာမှုတွေ၊ ဝေဖေန်ပြစ်တင်မှုတွေပဲ ရာနှုန်းပြည့်နီးပါး ဖုံးလွှမ်းထားတာပါ။ အသင်းပိုင်ရှင်ဟောင်း ရိုမန်အေဘရာမိုဗစ်ချ်ရဲ့ ဦးဆောင်ပဲ့ကိုင်မှုအောက် ရိုမန်အင်ပါယာနဲ့အတူ ခြသေ့်တစ်ကောင်လို အားမာန်ပြည့်ခဲ့တဲ့ ချယ်လ်ဆီးအသင်းဟာ ပိုင်ရှင်သစ် တော့ဒ်ဘိုလီအုပ်စုလက်ထက်မှာတော့ အဆိပ်မရှိတဲ့ ရေမြွေတစ်ကောင်အဖြစ် အသွင်ပြောင်းသွားခဲ့တယ်။