မန္တလေးမြို့တွင် မေ ၃၁ ရက်က ဂက်(စ်)ဖလှယ်ထည့်ရာမှ ဂက်(စ်)ယိုစိမ့်မှုဖြစ်ပြီး မီးလောင်မှုဖြစ်စဉ်မှ အရန်မီးသတ်သမားတစ်ဦး ၂၀၂၄ ခုနှစ် မေ ၇ ရက် နံနက်အစောပိုင်း ၃ နာရီခန့်က ရရှိသောဒဏ်ရာများဖြင့် မန္တလေးပြည်သူဆေးရုံကြီးတွင် သေဆုံးခဲ့သောကြောင့် သေဆုံးသူ ခြောက်ဦးရှိလာကြောင်း သိရသည်။
အောင်နန်းရိပ်သာအရှေ့ အရန်မီးသတ်စခန်းမှ အရန်မီးသတ်တပ်သား ကိုတင့်ခိုင် (၄၈ နှစ်) သည် မီးငြိမ်းသတ်ရင်း မီးလောင်ဒဏ်ရာ၊ ခန္ဓာကိုယ်မီးလောင်ဒဏ်ရာ၊ ဝဲ/ယာ လက်ခြေထောက် မီးလောင်ဒဏ်ရာ(စိုးရိမ်ရ) ရရှိခဲ့ခြင်းဖြစ်ကြောင်း သိရသည်။
မီးလောင်မှုကြောင့် ဇွန် ၁ ရက်မှ ၅ ရက်အတွင်း (စိုးရိမ်ရ) လေးဦးနှင့် (မစိုးရိမ်ရ) တစ်ဦး သေဆုံးခဲ့ခြင်းဖြစ်ကြောင်း၊ ယခုအရန်မီးသတ်တပ်ဖွဲ့ဝင်တစ်ဦးသည် (စိုးရိမ်ရ) အခြေအနေဖြင့် မန္တလေးဆေးရုံကြီးမှ စောင့်ကြည့်နေဆဲအခြေအနေတွင် သေဆုံးခြင်းဖြစ်ကြောင်း သိရသည်။
မီးလောင်မှုသည် ၂၀၂၄ ခုနှစ် မေ ၃၁ ရက် နံနက် ၉ နာရီ ၄၀ မိနစ်အချိန်၊ မန္တလေးမြို့၊ ချမ်းအေးသာစံမြို့နယ်၊ အောင်နန်းရိပ်သာအရှေ့ရပ်ကွက်၊ ၈၁ လမ်းနှင့် ၈၂ လမ်းကြား၊ ၃၂ လမ်းနှင့် ၃၃ လမ်းကြား၊ (၁၅ × ၃၀) ပေ နံကပ် (၂) ထပ် အဆောက်အဦအောက်ထပ်တွင် 48 Kg ဆံ့ ဂက်(စ်)အိုးအကြီးမှ ဂက်(စ်)ဘူး အသေးသို့ ဂက်(စ်)ဖလှယ်ထည့်ရာမှ ဂက်(စ်)ယိုစိမ့်မှုဖြစ်ပြီး မီးလောင်မှုဖြစ်ပွားခဲ့ရာ မီးလောင်မှုကြောင့် အမျိုးသား ကိုးဦး၊ အမျိုးသမီး ခြောက်ဦး၊ စုစုပေါင်း ၁၅ ဦး ထိခိုက်ဒဏ်ရာရရှိခဲ့ကြောင်း၊ အမျိုးသား လေးဦးနှင့် အမျိုးသမီး တစ်ဦးသည် (စိုးရိမ်ရ) ဒဏ်ရာများရရှိခဲ့ကြောင်း သိရသည်။
မီးလောင်မှုဖြစ်စဉ်နှင့်ပတ်သက်ပြီး အမျိုးသား နှစ်ဦးအား အမှတ်(၈)မြို့မရဲစခန်းမှ အမှုဖွင့်အရေးယူဆောင်ရွက်ခဲ့ကြောင်း သိရသည်။
