ပရီးမီးယားလိဂ် ဒီဇင်ဘာလအတွက် အကောင်းဆုံးဆုများကို ဝက်ဖို့ဒ်အသင်းနည်းပြ ဆန်းချက်ဇ် ဖလောရက်စ်နှင့် တိုက်စစ်မှူး အီဂါလိုတို့ကို ဆွတ်ခူးခဲ့ကြောင်း သိရသည်။ဝက်ဖို့ဒ်အသင်းသည် ဒီဇင်ဘာလအတွင်း ယှဉ်ပြိုင်ခဲ့သော ပရီးမီးယားလိဂ်ပွဲစဉ်(၅) ပွဲတွင် (၃)ပွဲနိုင် (၁)ပွဲသရေ (၁)ပွဲရှုံးဖြင့် ရလဒ်ကောင်းများ ရရှိခဲ့သလို ဝက်ဖို့ဒ်အသင်းမှာလည်း အမှတ်ပေးဇယား အဆင့် (၁၀) နေရာအထိ တက်လှမ်းနိုင်ခဲ့သည်။အဆိုပါ (၅) ပွဲတွင် လီဗာပူးလ် အသင်းကို အိမ်ကွင်းတွင် (၃-ဝ) ဂိုးဖြင့် အနိုင်ရသော ပွဲစဉ်နှင့် ချယ်လ်ဆီးအသင်းကို အဝေးကွင်းတွင် (၂-၂)ဂိုးဖြင့် သရေကျသောပွဲများ ပါဝင်နေသည်။ထို့ကြောင့် ဝက်ဖို့ဒ်နည်းပြ ဖလောရက်စ်မှာ အကောင်းဆုံးနည်းပြဆုကို အာစင်ဝင်းဂါးကို ကျော်ဖြတ်ကာ ရရှိခဲ့ခြင်းဖြစ်သည်။အကောင်းဆုံး ကစားသမားဆုကိုလည်း လီဗာပူးလ်နှင့်ပွဲမှ (၂) ဂိုးအပါအဝင် အဆိုပါ (၅) ပွဲတွင် (၅)ဂိုးသွင်းယူနိုင်ခဲ့သော ဝက်ဖို့ဒ်တိုက်စစ်မှူး အီဂါလိုကပင် ရရှိခဲ့သည်။အီဂါလိုသည် ယခုနှစ် ပရီးမီးယားလိဂ်တွင် သွင်းဂိုး (၁၃)ဂိုးအထိ သွင်းယူကာ ခြေစွမ်းပြနေသူဖြစ်ပြီး သူ့အားခေါ်ယူရန်အတွက် မန်ယူအသင်း အပါအဝင် အသင်းကြီးများက စိတ်ဝင်စားနေကြကြောင်း သိရသည်။