လီဗာပူးလ်နဲ့ပွဲက ချယ်လ်ဆီးနည်းပြ မော်ရင်ဟိုအတွက် အဆုံးအဖြတ်ပွဲလို့ ဆိုကြပါတယ်။ ဒီပွဲကို ရှုံးနိမ့်ခဲ့ရင် မော်ရင်ဟိုရဲ့ ဒုတိယအကြိမ် ချယ်လ်ဆီးနည်းပြဘ၀ ချုပ်ငြိမ်း သွားနိုင်ပါတယ်။ အဆင့် ၁၅ နေရာရောက် ချယ်လ်ဆီးအသင်းကို မော်ရင်ဟို ဆွဲတင်နိုင်မလား ဒီပွဲမှာ ကြည့်ရမှာပါ။ တစ်ဖက်မှာလည်း လီဗာပူးလ်အသင်းက လန်ဒန်မြို့မှာ ပရီးမီးယားလိဂ် နိုင်ပွဲ ၅ ပွဲဆက် ပျောက်ဆုံးနေပြီး၊ နည်းပြ ယာဂန်ကလော့ပ်ကလည်း ပထမဆုံး ပရီးမီးယားလိဂ်နိုင်ပွဲ ရှာမတွေ့သေးပါဘူး။ ချယ်လ်ဆီးကိုလည်း လီဗာပူးလ်အသင်းက ပရီးမီးယားလိဂ်မှာ ခြောက်ပွဲဆက် အနိုင်မရခဲ့ဘဲ သုံးပွဲသရေ၊ သုံးပွဲ ရှုံးနိမ့်ခဲ့ပါတယ်။ နှစ်သင်းစလုံး ရုန်းကန်မယ့်အချိန်မှာ နိုင်ပွဲ ရှာတွေ့မှာက ချယ်လ်ဆီးနဲ့ မော်ရင်ဟိုလား၊ လီဗာပူးလ်နဲ့ ယာဂန်ကလော့ပ်လား . .။
■ ချယ်လ်ဆီး နှင့် လီဗာပူးလ်
(၃၁-၁၀-၁၅ စနေ ည ရး၁၅ )
ယမန်နှစ်ရလဒ် ချယ်လ်ဆီး ၁-၁ လီဗာပူးလ်
ချယ်လ်ဆီးခံစစ်က လူပဲပြောင်းပြောင်း၊ မူပဲပြောင်းပြောင်း တိုးတက်လာတာ မတွေ့ရသေးဘူး။ ဒါပေမဲ့ လီဗာပူးလ်ကလည်း အဓိက တိုက်စစ်မှူးတွေ ဒဏ်ရာနဲ့ ရုန်းကန်နေရတယ်။ ယာဂန်ကလော့ပ်က မော်ရင်ဟို အတွက် ခက်ခဲတဲ့ ပြိုင်ဘက် ဖြစ်ပေမယ့် လီဗာပူးလ်ရဲ့ စုဖွဲ့မှုက ဒဏ်ရာကြောင့် လျော့ရဲနေတယ်။ ချယ်လ်ဆီး ကပ်နိုင်ဖို့များပါတယ်။
■ဆွမ်ဆီး နှင့် အာဆင်နယ်
(၃၁-၁၀-၂၀၁၅ စနေ ည ၉း၃၀)
ယမန်နှစ်ရလဒ် ဆွမ်ဆီး ၂-၁ အာဆင်နယ်
အာဆင်နယ် လေးပွဲဆက်နိုင်ပြီး ခြေမှန်နေသလို၊ ပရီးမီးယားလိဂ် အဝေးကွင်း နောက်ဆုံး ၁၁ ပွဲမှာလည်း ကိုးပွဲအထိနိုင်ပြီး ရှုံးပွဲတစ်ပွဲသာ ရှိခဲ့တယ်။ ဝေါလ်ကော့၊ ရမ်ဆေးတို့ မကစားနိုင်လို့ အပြောင်းအလဲ ရှိနိုင်ပေမယ့် အာဆင်နယ် ထိုးကျသွားနိုင်တဲ့ အနေအထားမျိုး မဟုတ်ပါဘူး။ ဆွမ်ဆီးကလည်း ပုံမှန်ခြေ မရှိသေးလို့ အာဆင်နယ်ကိုပဲ ရွေးရမှာပါ။
■ဝက်စ်ဘရွန်း နှင့် လက်စတာ
(၃၁-၁၀-၂၀၁၅ စနေ ည ၉း၃၀)
 ယမန်နှစ်ရလဒ် ဝက်စ်ဘရွန်း ၂-၃ လက်စတာ
ဝက်စ်ဘရွန်းက မာကျောတဲ့ ခံစစ်ကစားပုံကို ပြန်ရှာတွေ့ထားတယ်။ ဗာဒီ ဂိုးမြူးနေတဲ့ လက်စတာ တိုက်စစ်နဲ့ ထိပ်တိုက်တွေ့မှာပါ။ ဝက်စ်ဘရွန်း ဂိုးသွင်းအား နည်းပေမယ့် နှစ်သင်း တွေ့ဆုံခဲ့တဲ့ နောက်ဆုံး ၁၄ ပွဲမှာ လက် စတာ Clean Sheet တစ်ပွဲမှ မရခဲ့တာ သတိပြုရမယ်။ အစဉ်အလာပိုင်းလည်း သာတဲ့ ဝက်စ်ဘရွန်းကို ရွေးထားချင်တယ်။ 
■ခရစ္စတယ်ပဲလေ့စ် နှင့် မန်ယူ
(၃၁-၁၀-၁၅ စနေ ည ၉း၃၀)
ယမန်နှစ်ရလဒ်  ပဲလေ့စ် ၁-၂ မန်ယူ
မန်ယူခံစစ်မှာ ဖီးလ်ဂျုံးစ် ဝင်လာတဲ့ နောက်ပိုင်း ဘလင်း ကစားခဲ့တဲ့အချိန်ကထက် တည်ငြိမ်လာတယ်။ နောက်ဆုံး လေးပွဲမှာ Clean Sheet သုံးပွဲ ရခဲ့ပါတယ်။ တိုက်စစ်ပိုင်းကတော့ နှစ်သင်းစလုံး ခြေစွမ်း ကျဆင်းနေတာချင်း တူတယ်။ ဒါပေမဲ့ ပဲလေ့စ်က ပရီးမီးယားလိဂ်မှာ မန်ယူကို မနိုင်ဖူးဘဲ ၁၂ ပွဲမှာ ၁၀ ပွဲရှုံးခဲ့တယ်။ မန်ယူကပ်နိုင်ဖို့ များပါတယ်။      
■မန်စီးတီး နှင့် နောဝစ်ချ်
(၃၁-၁၀-၂၀၁၅ စနေ ည ၉း၃၀)
နောက်ဆုံးတွေ့ဆုံမှု မန်စီးတီး ၇-၀ နောဝစ်ချ်
မန်စီးတီးက မန်ယူကွင်းမှာ ဂိုးပေါက်ပျောက်ခဲ့ပေမယ့် အိမ်ကွင်း နောက်ဆုံး နှစ်ပွဲမှာ ၁၁ ဂိုးအထိ သွင်းယူထားပါတယ်။ နောဝစ်ချ်ကလည်း ဒီရာသီ ပရီးမီးယားလိဂ်မှာ ပွဲတိုင်း ဂိုးပေးရတဲ့ အသင်းအဖြစ် တစ်သင်းတည်း ရပ်တည်နေပါတယ်။ မန်စီးတီးကွင်းမှာ အစဉ်အလာအတိုင်း နောဝစ်ချ် ဂိုးပြတ် ရှုံးဖို့များပါတယ်။   
■နယူးကာဆယ် နှင့် စတုတ်စီးတီး
(၃၁-၁၀-၂၀၁၅ စနေ ည ၉း၃၀)
ယမန်နှစ်ရလဒ်  နယူးကာဆယ် ၁-၁ စတုတ်စီးတီး
နောဝစ်ချ်ကို ဂိုးပြတ်နိုင်ပြီး တက်ရိပ်ပြခဲ့တဲ့ နယူးကာဆယ် ဆန်းဒါးလန်းကို ဂိုးပြတ် ပြန်ရှုံးပြီး ကျဆင်းသွားပါတယ်။ စတုတ်စီးတီးကတော့ အဝေးကွင်းမှာ ခြေပို စွာနေပါတယ်။ အဝေးကွင်း ငါးပွဲမှာ တစ်ပွဲပဲရှုံးခဲ့ပြီး နောက်ဆုံး အဝေးကွင်း နှစ်ပွဲကိုလည်း အနိုင် ကစားထားပါတယ်။ နယူးကာဆယ်ကွင်း ဆိုပေမယ့် စတုတ်စီးတီး မရှုံးနိုင်တဲ့ပွဲပါ။
■ဝက်ဖို့ဒ် နှင့် ဝက်စ်ဟမ်း
(၃၁-၁၀-၂၀၁၅ စနေ ည ၉း၃၀)
နောက်ဆုံးတွေ့ဆုံမှု ဝက်ဖို့ဒ် ၁-၁ ဝက်စ်ဟမ်း
ဝက်ဖို့ဒ်က အိမ်ကွင်း နောက်ဆုံးနှစ်ပွဲမှာ ပဲလေ့စ်နဲ့ အာဆင်နယ် လန်ဒန်မြို့ခံ နှစ်သင်းကို ရှုံးနိမ့်ခဲ့ပါတယ်။ ဝက်စ်ဟမ်းက အဲဒီ အသင်းတွေကို နိုင်ခဲ့တဲ့ လန်ဒန်အသင်းပါ အစဉ်အလာအရလည်း အမှတ်ပေးပွဲ ၂၂ ကြိမ်တွေ့ဆုံမှုမှာ ဝက်ဖို့ဒ် နိုင်ပွဲတစ်ပွဲပဲ ရှိခဲ့ပါတယ်။ မန်စီးတီးနောက်မှာ တိုက်စစ် ဒုတိယ အကောင်းဆုံး ဝက်စ်ဟမ်းကိုပဲ ကြိုက်တယ်။  
■အဲဗာတန် နှင့် ဆန်းဒါးလန်း
(၁-၁၁-၁၅ တနင်္ဂနွေ ည ၈း၀၀)
ယမန်နှစ်ရလဒ်  အဲဗာတန် ဝ-၂ ဆန်းဒါးလန်း
အာဆင်နယ်၊ မန်ယူတို့နဲ့ နှစ်ပွဲဆက် တွေ့ခဲ့လို့ အဲဗာတန် ရှုံးပွဲဆက်သွားတယ်။ ဆန်းဒါးလန်းကတော့ ဒီရာသီ ပထမဆုံးနိုင်ပွဲကို ရှာတွေ့ထားပါတယ်။ ဆန်းဒါးလန်းက အဲဗာတန်နဲ့ ကစားခဲ့တဲ့ နောက်ဆုံး ငါးပွဲမှာ သုံးပွဲနိုင်ပြီး တစ်ပွဲပဲရှုံးခဲ့ပါတယ်။ ဒါပေမဲ့ လက်ရှိ စုဖွဲ့မှုနဲ့ ဆန်းဒါးလန်းရဲ့ အဝေးကွင်း ခြေစွမ်းတွေကြောင့် အဲဗာတန်ပဲ အနိုင်ရဖို့များတယ်။
■ဆောက်သမ်တန် နှင့် ဘုန်းမောက်
(၁-၁၁-၁၅ တနင်္ဂနွေ ည ၁၀း၃၀)
နောက်ဆုံးတွေ့ဆုံမှု  မရှိ
ဘုန်းမောက်က နည်းပြ ဟိုဝီကို သက်တမ်းတိုးပြီး နောက်ပိုင်း ရလဒ်တွေ ဆက်တိုက် ကျဆင်းနေတယ်။ နောက်ဆုံးနှစ်ပွဲမှာ မန်စီးတီးနဲ့ စပါးကို တစ်ပွဲ ငါးဂိုးပေးပြီး ရှုံးနိမ့်ခဲ့ပါတယ်။ ဆောက်သမ်တန် အားနည်းတဲ့ ခံစစ်ပိုင်းကိုလည်း ဘုန်းမောက် အခွင့်အရေး ယူနိုင်တဲ့ အနေအထားမျိုး မရှိဘူး။ ဆောက်သမ်တန်ကိုပဲ ရွေးချယ်ရမှာပါ။
■စပါး နှင့် အက်စတွန်ဗီလာ
(၃-၁၁-၁၅ အင်္ဂါ နံနက် ၂း၃၀)
ယမန်နှစ်ရလဒ်  စပါး ဝ-၁ ဗီလာ
စပါးတိုက်စစ်မှူး ဟာရီကိန်း ဂိုးသွင်း ခြေပြန်တွေ့နေတာက ဒီရာသီ ပရီးမီးယား လိဂ် ရှုံးပွဲအများဆုံး (ရှစ်ပွဲ) ဖြစ်နေတဲ့ ဗီလာအတွက် သတင်းဆိုးပါပဲ။ နည်းပြ တင်မ်ရှားဝုဒ်ကို ထုတ်ပယ်ထားပြီး ယာယီနည်းပြ ကီဗင်မက်ဒေါ်နယ်နဲ့ လာမယ့် ဗီလာက ဝှိုက်ဟတ်လိန်းမှာ ထူးထူးခြားခြား လုပ်ပြနိုင်စရာ မရှိပါဘူး။ စပါး ဂိုးပြတ်နိုင်မှာပါ။