မြန်မာနိုင်ငံဘောလုံးအဖွဲ့ချုပ် (MFF)သည် ဗီယက်နမ် ဖိတ်ခေါ်ပြိုင်ပွဲ ယှဉ်ပြိုင်မည့် မြန်မာ ယူ-၂၁ အသင်း၏ နည်းပြချုပ်အဖြစ် သြစတြေးလျလူမျိုး အဲရစ်ဝီလျံကို တာဝန် ပေးအပ်ခဲ့ကြောင်း သိရသည်။ MFF သည် မူလက မြန်မာ ယူ-၂၁ အသင်း နည်းပြချုပ်အဖြစ် ဂတ်ဖရိုင်းဒရစ်အား ခန့်အပ်ရန် စီစဉ်ခဲ့သော်လည်း ၎င်းမှာ မြန်မာ့ လက်ရွေးစင်အသင်း နည်းပြချုပ် ဖြစ်လာခဲ့သောကြောင့် အဲရစ်ဝီလျံအား ပြောင်းလဲ တာဝန်ပေးအပ်ခဲ့ခြင်း ဖြစ်သည်။
MFF သည် မြန်မာ ယူ-၂၁ အသင်းကို ပြည်တွင်းနည်းပြများအား ကိုင်တွယ်စေရန် စီစဉ်ခဲ့သော်လည်း နောက်ပိုင်းတွင် နိုင်ငံခြားသား နည်းပြကိုသာ တာဝန် ပေးအပ်ခဲ့ခြင်းဖြစ်ပြီး ယင်းပြိုင်ပွဲကို လာမည့် နိုဝင်ဘာ ၂၂ ရက်မှ ၂၉ ရက်အထိ ကျင်းပ သွားမည်ဖြစ်သည်။ ဗီယက်နမ်ဖိတ်ခေါ်ပြိုင်ပွဲ ယှဉ်ပြိုင်မည့် မြန်မာ ယူ-၂၁ အသင်းကို ယူ-၂၀ ကမ္ဘာ့ဖလားပြိုင်ပွဲ ယှဉ်ပြိုင်ခဲ့သည့် မြန်မာ ယူ-၂၀ အသင်း၊ ၂၀၁၆ အာရှ ယူ-၁၉ ခြေစစ်ပွဲယှဉ်ပြိုင်ခဲ့သည့် မြန်မာ ယူ-၁၉ အသင်းတို့မှ ကစားသမားအများစုဖြင့် ဖွဲ့စည်းသွားမည်ဖြစ်ပြီး (၂၈) ကြိမ်မြောက် စင်ကာပူ ဆီးဂိမ်းစ်ပြိုင်ပွဲတွင် ငွေတံဆိပ်ရရှိခဲ့သည့် မြန်မာ ယူ-၂၃ အသင်းမှ အသက်မီသည့် ကစားသမားများလည်း ပါဝင်လာဖွယ်ရှိနေသည်။ အဲရစ်ဝီလျံသည် မြန်မာ ယူ-၁၆ အသင်း၏ နည်းပြချုပ်အဖြစ် ၂၀၁၅ ခုနှစ် နှစ်လယ်ပိုင်းက ခန့်အပ်ခံခဲ့ရပြီး ၎င်းလက်ထက်တွင် မြန်မာ ယူ-၁၆ အသင်းမှာ အာဆီယံ ယူ-၁၆ ချန်ပီယံရှစ်ပြိုင်ပွဲ၌ ဒုတိယနေရာရရှိခဲ့ပြီး အာရှ ယူ-၁၆ ခြေစစ်ပွဲတွင်မူ ခြေစစ်ပွဲ အောင်မြင်ခဲ့ခြင်းမရှိပေ။ ထို့ပြင် အဲရစ်ဝီလျံသည် ရန်ကုန်အသင်းအား ပြည်တွင်းချန်ပီယံဆုများ ရရှိစေရန် စွမ်းဆောင်ပေးခဲ့သည့် နည်းပြ တစ်ဦးဖြစ်ပြီး ၎င်းင်းလက်ထက်တွင် ရန်ကုန်အသင်းမှာ တစ်ရာသီအတွင်း အမှတ်ပေးချန်ပီယံဆုနှင့် ရှုံးထွက် ချန်ပီယံဆုတို့ကို ဆွတ်ခူး ရရှိခဲ့ကြောင်း သိရသည်။
မြန်မာ ယူ-၂၁ အသင်း ဝင်ရောက် ယှဉ်ပြိုင်မည့် ဗီယက်နမ် ဖိတ်ခေါ်ပြိုင်ပွဲကို အိမ်ရှင် ဗီယက်နမ်အသင်း အပါအဝင် ထိုင်း၊ မြန်မာ၊ စင်ကာပူ၊ တောင်ကိုရီးယားတို့မှ လူငယ် လက်ရွေးစင်အသင်းများ၊ ဗီယက်နမ်မှ ဟောင်အန်းဂယ်လိုင်အသင်းတို့ ယှဉ်ပြိုင်မည်ဖြစ်သည်။