၂ဝ၁၄ ခုနှစ်အတွင်း ထင်ရှားအောင်မြင်သည့် အနုပညာရှင်တစ်ဦးအဖြစ် ရုပ်ရှင်နှင့်ဗီဒီယိုဇာတ်ကားအများအပြား ရိုက်ကူးခွင့်ရရှိနေသူ ဆယ်ကျော်သက်သရုပ်ဆောင် မော်ဒယ်ရွှေမှုန်ရတီအား ရွေးချယ်ဖော်ပြအပ်ပါသည်။ မော်ဒယ်တစ်ဦးအဖြစ် အနုပညာလောကအတွင်း စတင်ဝင်ရောက်လာခဲ့သည့် သရုပ်ဆောင် ရွှေမှုန်ရတီသည် အနုပညာပျိုးခင်းနှင့် စာချုပ်ချုပ်ဆို၍ ဇာတ်ကားများ ဆက်တိုက်ရိုက်ကူးခွင့်ရရှိပြီးနောက် ဆယ်ကျော်သက်သရုပ်ဆောင်တစ်ဦးအဖြစ် ပရိသတ်များကြားတွင် ရေပန်းစားလာခြင်းဖြစ်သည်။ ရွှေမှုန်ရတီ ပါဝင်သရုပ်ဆောင်ခဲ့သည့် ဗီဒီယိုဇာတ်ကားအများအပြားမှာ ပရိသတ်လက်ခံအားပေးခဲ့ကြောင်း သိရသည်။ ထို့အပြင် ရုပ်ရှင်ဇာတ်ကားအများအပြားတွင်လည်း ရွှေမှုန်ရတီသည် ပါဝင်သရုပ်ဆောင်ခွင့်ရခဲ့သည်။“၂ဝ၁၄ ခုနှစ်အတွင်းမှာ ရွှေမှုန်အနုပညာအလုပ်တွေကို ပိုပြီးလုပ်ဖြစ်ခဲ့တယ်လို့ ဆိုရမှာပါ။ ကျန်းမာရေးကြောင့် အနုပညာအလုပ်တွေ ခဏနားခဲ့ရပေမယ့် ကျန်တဲ့အချိန်တွေအားလုံးကို အနုပညာအလုပ်တွေနဲ့ပဲ ရင်းနှီးမြှပ်နှံထား ဖြစ်ပါတယ်။ အခုနှစ်ထဲမှာထွက်လာတဲ့ ဇာတ်ကားလေးတွေကိုလည်း ပရိသတ်တွေက အားပေးခဲ့ကြတဲ့အတွက်ဝမ်းသာပါတယ်။ ၂ဝ၁၄ ခုနှစ်ကို ပြန်ကြည့်မယ်ဆိုရင်တော့ အနုပညာအလုပ်တွေ ပိုပြီးလုပ်ကိုင်ခွင့်ရခဲ့တယ်လို့ ဆိုရမှာပါ။ နောက်နှစ်မှာလည်း အခုထက်ပိုပြီး ကြိုးစားသွားပါမယ်။ ရွှေမှုန်မှာရှိနေတဲ့ လိုအပ်ချက်တွေ၊ အားနည်းချက်တွေကို ပြင်ဆင်ပြီး အကောင်းဆုံးရှေ့ဆက် ကြိုးစားသွားပါမယ်။ ပရိသတ်တွေလည်း အားပေးကြပါဦးလို့”ဟု ရွှေမှုန်ရတီက ဆိုသည်။သရုပ်ဆောင်ရွှေမှုန်ရတီသည် အနုပညာလောကသို့ ဝင်ရောက်ခဲ့သည့် အချိန်တိုအတွင်းမှာပင် ခေါင်းဆောင်မင်းသမီးတစ်ဦးအဖြစ် ဇာတ်ကားများလက်ခံရိုက်ကူးခွင့် ရရှိခဲ့ခြင်းဖြစ်သည်။ ကျရာဇာတ်ရုပ်တွင် ပီပြင်စွာသရုပ်ဆောင်နိုင်သည်ဟု ပရိသတ်လက်ခံ အသိအမှတ်ပြုမှုရရှိခြင်းနှင့်ပတ်သက်၍ သရုပ်ဆောင်ရွှေမှုန်ရတီက  “ရွှေမှုန်နဲ့လိုက်ဖက်တဲ့ ဇာတ်ကောင်စရိုက်မျိုးတွေပဲ လာပြောကြတာများပါတယ်။ ရွှေမှုန်ကလည်း လုပ်ရမယ့် ဇာတ်ကောင်စရိုက်အလိုက် ကြိုးစားပြီး သရုပ်ဆောင်ပါတယ်။ဇာတ်ကောင်စရိုက်နဲ့လိုက်ဖက်တဲ့ ဝတ်စားဆင်ယင်မှုအတွက် ကြိုတင်ပြင်ဆင်သလို ဇာတ်ကောင်စရိုက် mood  ဝင်အောင်လည်း ကြိုးစားပါတယ်။ ကိုယ့်ထက်စီနီယာတွေချည်းပဲဆိုတော့ ပါဝင်တဲ့သူတွေ အားလုံးဆီကလည်း လေ့လာသင်ယူဖြစ်ပါတယ်” ဟု ပြောပြခဲ့သည်။ဆယ်ကျော်သက် သရုပ်ဆောင်မော်ဒယ်လ်တစ်ဦးဖြစ်သူ သရုပ်ဆောင် ရွှေမှုန်ရတီသည် ယခုနှစ်အတွင်း တက္ကသိုလ်ဝင်တန်းစာမေးပွဲ ဖြေဆိုခဲ့သော်လည်း ကျရှုံးခဲ့ပြီး ၂ဝ၁၅ ခုနှစ်တွင်ပြုလုပ်မည့် စာမေးပွဲတွင်မူ ဝင်ရောက်ဖြေဆို ဖြစ်၊ မဖြစ်မသေချာသေးကြောင်း သိရသည်။ လတ်တလောတွင် ရွှေမှုန်ရတီသည် ရုပ်ရှင်၊ ဗီဒီယိုနှင့် ကြော်ငြာများကို လက်ခံရိုက်ကူးလျက်ရှိကြောင်း သိရသည်။