ဆီဗီလာအသင်းမှ စပိန်ဝါရင့်နောက်ခံလူ ဆာဂျီယိုရာမို့စ်သည် ပြီးခဲ့သည့်အပတ်က ချန်ပီယံလိဂ်ပွဲ ကစားနေစဉ် နေအိမ်၌ကျန်ရှိသည့် သူ၏ကလေးများမှာ ဓားပြတိုက်ခံခဲ့ရကြောင်း သိရသည်။

ရာမို့စ်၏ကလေး(၄)ဦးသည် စပိန်နိုင်ငံတောင်ပိုင်း၊ Andalusia ရှိ နေအိမ်တွင် ကလေးထိန်းနှစ်ဦးနှင့်အတူ ကျန်ရှိခဲ့သည့်အချိန်၌ ဓားပြများက နေအိမ်အတွင်း သတိပေးစနစ်ကိုကျော်ဖြတ်ကာ ဝင်ရောက်လာခြင်းဖြစ်သည်။

ကလေးများသည် ခြိမ်းခြောက်ခံရသော်လည်း ထိခိုက်ဒဏ်ရာမရရှိခဲ့ကြောင်း သတင်းများက ဖော်ပြခဲ့သည်။

ယင်းအချိန်တွင် ရာမို့စ်၏ဇနီးဖြစ်သူ ပိုင်လာရူဘီယိုမှာလည်း အလုပ်ကိစ္စအတွက် အပြင်သို့ရောက်ရှိနေကြောင်း သိရသည်။

ဓားပြများသည် နေအိမ်အတွင်းမှ တန်ဖိုးမြင့်နာရီများ၊ လက်ဝတ်ရတနာများ၊ အဝတ်အစားများနှင့် ငွေသားများကို ယူဆောင်ခဲ့ပြီး ရဲတပ်ဖွဲ့က အဆိုပါဖြစ်စဉ်အပေါ် စုံစမ်းစစ်ဆေးမှုများ ပြုလုပ်လျက်ရှိသည်။

ရာမို့စ်နှင့် သူ၏မိသားစုသည် လက်ရှိတွင် ဆီဗီးလ်မြို့အနီး Bollullos de la Mitacion ရှိ နေအိမ်သို့ ပြောင်းရွှေ့နေထိုင်နေကြောင်း သိရသည်။