မြင်းပေါ်မှ လိမ့်ကျခဲ့သည့် PSG အသင်းမှ စပိန်ဂိုးသမား ဆာဂျီယိုရီကိုသည် ဆေးရုံတွင် အရေးပေါ်ကုသမှုခံယူနေရပြီး အသက်အန္တရာယ်စိုးရိမ်ရသည့်အခြေအနေတွင် ရှိကြောင်းသိရသည်။
အသက်(၂၉)နှစ်အရွယ်ရှိ ရီကိုသည် စပိန်နိုင်ငံ၊ ဟွယ်ဗာမြို့ရှိ El Rocio တွင် မြင်းစီးနေစဉ် မြင်းပေါ်မှ လိမ့်ကျခဲ့ကြောင်း ဒေသတွင်းမီဒီယာက ဖော်ပြခဲ့သည်။
ရီကိုအား ရဟတ်ယာဉ်ဖြင့် ခေါ်ဆောင်ခဲ့ပြီး ဆီဗီးလ်မြို့ရှိ ဆေးရုံတစ်ရုံသို့ ပို့ဆောင်ပေးခဲ့ကြောင်း BBC Sport က ရေးသားခဲ့သည်။
၎င်းသည် မေလ(၂၇)ရက်က ယှဉ်ပြိုင်ကစားခဲ့သော စထရာဘိုးနှင့် သရေကျပြီးနောက် အမှတ်ပေးချန်ပီယံဆု (၁၁)ကြိမ်မြောက် ရရှိခဲ့သည့်ပွဲတွင် အသင်းလူစာရင်း၌ အရန်ကစားသမားအဖြစ် ပါဝင်ခဲ့သည်။
PSG အသင်းသည် ယင်းပွဲပြီးနောက် ကစားသမားများကို အားလပ်ရက်ပေးခဲ့သဖြင့် မိခင်နိုင်ငံ စပိန်သို့ ပြန်သွားချိန်တွင် ယခုဖြစ်ရပ်ဆိုးနှင့် ကြုံတွေ့ခဲ့ရခြင်းဖြစ်သည်။
ရီကို၏အခြေအနေသည် စိုးရိမ်ရသည့်အနေအထားတွင်ရှိကြောင်း PSG အသင်း၏ပြောရေးဆိုခွင့်ရှိသူတစ်ဦးက ပြီးခဲ့သည့်တနင်္ဂနွေနေ့က ပြောကြားခဲ့သည်။
ဆီဗီလာ ဂိုးသမားဟောင်း ရီကိုသည် ၂၀၁၉ ခုနှစ်က PSG အသင်းသို့ အငှားဖြင့် ပြောင်းရွှေ့လာသူဖြစ်ပြီး နောက်တစ်နှစ်တွင် အပြီးသတ်စာချုပ် ချုပ်ဆိုခဲ့ခြင်းဖြစ်သည်။
ယင်းမတိုင်မီ ၂၀၁၈- ၁၉ ရာသီ၌မူ ဖူလ်ဟမ်အသင်းတွင် တစ်ရာသီအငှားဖြင့် သွားရောက်က စားခဲ့ကြောင်း သိရသည်။ ရီကိုအနေဖြင့် PSG အသင်းသို့ ရောက်ရှိနေသည်မှာ လေးရာသီတိုင်ခဲ့ပြီဖြစ်သော်လည်း အရန်ဂိုးသမားအဖြစ်သာ ရှိနေခဲ့ပြီး စုစုပေါင်း ပြိုင်ပွဲစုံ(၂၉)ပွဲသာ ကစားထားခဲ့ရသည်။
