ပြည်ကြီးတံခွန်မြို့နယ် ရွှေဆိုင်တစ်ဆိုင်ကို အမျိုးသားနှစ်ဦးက သေနတ်ဖြင့်ပစ်ခတ် ဓားပြတိုက်ပြီး သိန်း ၂၅၀၀ ခန့်တန်ဖိုးရှိ ရွှေထည်ပစ္စည်းများယူဆောင်သွား
မန္တလေးမြို့ ပြည်ကြီးတံခွန်မြို့နယ်၊(ဇ)ရပ်ကွက်၊စက်မှု(၁) ၊၆၂လမ်း၊၁၃၃လမ်းနှင့် ၁၃၄လမ်းကြားရှိ ထက်ဝေယံရွှေဆိုင်တွင် အမျိုးသားနှစ်ဦးက ယနေ့(ဧပြီ ၂၈ ရက်) မွန်းတည့် ၁၂ နာရီခန့်က သေနတ်ပစ်ခတ်ကာ ဓားပြတိုက်ခဲ့ကြောင်းသိရသည်။
အဆိုပါ ဓါးပြတိုက်ခဲ့သည့် အမည်မသိအမျိုးသားနှစ်ဦးသည် စက်မှု(၁)စျေးအတွင်းမှ ခြေလျင်လျှောက်လာကာ ၎င်းတို့တွင်ပါလာသော သေနတ်အတိုဖြင့် ဆိုင်နံရံအား ပစ်ခတ်ခဲ့ပြီး ဓားတိုတစ်ချောင်းဖြင့် မှန်ကောင်တာအား ထုခွဲ၍ ကောင်တာတွင်းရှိ ရွှေဆွဲကြိုး၊ ရွှေနားကပ် ၊ ရွှေနားဆွဲများ စုစုပေါင်းခန့်မှန်းတန်ဖိုး ကျပ်သိန်း ၂၅၀၀ ခန့်အား ယူဆောင်ထွက်ပြေးသွားခဲ့ကြောင်းသိရသည်။
