တက္ကသိုလ်ဝင်တန်းစာမေးပွဲ အောင်စာရင်းများ ထုတ်ပြန်ကြေညာမှုအရ သိပ္ပံဘာသာတွဲဖြင့် တစ်နိုင်ငံလုံးအမှတ်အများဆုံးရရှိသူ ၁၂ ဦးရှိခဲ့ပြီး တစ်နိုင်ငံလုံးအမှတ်အများဆုံးဖြင့်အောင်မြင်ခဲ့သူမှာ မန္တလေး အမှတ် ၁၆ အခြေခံပညာအထက်တန်းကျောင်းမှ ကျောင်းသူတစ်ဦးဖြစ်ကြောင်းသိရသည်။
အမှတ် ၁၆ အခြေခံပညာအထက်တန်းကျောင်းတွင် တက်ရောက်သင်ကြားကာ ၂၀၂၁-၂၂ တက္ကသိုလ်ဝင်တန်းစာမေးပွဲအား ချမ်းအေးသာစံမြို့နယ် အထက ၁၆ စာဖြေဌာနတွင် ဖြေဆိုခဲ့သော ကျောင်းသူ မအိမ့်မှူးခင် မှာ ၆ ဘာသာဂုဏ်ထူးဖြင့်အောင်မြင်ခဲ့ပြီး စုစုပေါင်းရမှတ် ၅၅၈ မှတ်ဖြင့် တစ်နိုင်ငံလုံးတွင် အမှတ်အများဆုံးရရှိခဲ့ခြင်းဖြစ်ကြောင်းသိရသည်။
"၂၀၂၁-၂၂ တက္ကသိုလ်ဝင်တန်းစာမေးပွဲမှာ အ.ထ.က ၁၆ ကနေ အယောက် ၁၀၀ တိတိဝင်ဖြေခဲ့တယ်။ အဲသည်ထဲမှာမှ ဒီနေ့အောင်စာရင်းရလာဒ်မှာ ဘာသာစုံဂုဏ်ထူးရှင် ၄ ယောက် ၅ဘာသာဂုဏ်ထူးရှင် ၃ ယောက်ပါပါတယ်။ အဲသည်ထဲမှာမှ ကျောင်းအတွက် ၊ မြို့နယ်နဲ့ မန္တလေးတိုင်းအတွက် ဝမ်းသားစရာ Top 1 ရခဲ့တယ်ပေါ့။ ဒါက ကျွန်တော်တို့ကျောင်းရဲ့သမိုင်းမှာလည်းမရှိသေးဘူး ပထမဆုံးဖြစ်တာကြောင့် ဂုဏ်ယူစရာပါ။ အခုလို ရတဲ့ကျောင်းသူသမီးအတွက်လည်း ဂုဏ်ယူပါတယ်။ ဒါက ကျောင်းအတွက် ခွန်အားတစ်ခု ရသွားတာပေါ့"ဟု အထက ၁၆ ကျောင်းအုပ်ဆရာကြီး ဒေါက်တာသန်းထိုက်စိုးက ပြောကြားသည်။
တစ်နိုင်ငံလုံး အမှတ်အများဆုံးရရှိခဲ့သည်ကျောင်းသူမှာ အထက ၁၆ တွင် Grade 1 ကတည်းက စတင်ပညာသင်ကြားလာသည့်ကျောင်းသူဖြစ်ကြောင်းသိရသည်။ယခုနှစ်တွင် အထက ၁၆ ကျောင်း၏ အောင်ချက်ရာခိုင်နှုန်းမှာ ၆၇ ရာခိုင်နှုန်းရှိပြီး အောင်မြင်သူများထဲမှ ဂုဏ်ထူးဖြင့်အောင်မြင်သူ ၃၄ ယောက်ရှိခဲ့ကြောင်းသိရသည်။
၂၀၂၁- ၂၂ ပညာသင်နှစ် တွင် မန္တလေးတိုင်းဒေသကြီးမှ တက္ကသိုလ်ဝင်တန်းစာမေးပွဲဝင် ရောက်ဖြေဆိုခဲ့သူဦးရေစုစုပေါင်း ၃၃၅၄၈ ဦးရှိခဲ့ရာ အောင်မြင်သူ ဦးရေ စုစုပေါင်း ၁၆၇၄၇ ဦးရှိခဲ့ ကြောင်းသိရသည်။
