(၅)ကြိမ်မြောက်ကျင်းပမည့် မြန်မာ့ရိုးရာလက်ဝှေ့ကမ္ဘာ့ချန်ပီယံပြိုင်ပွဲတွင် ထွန်းထွန်းမင်းနှင့် ရွှေရာမာန်တို့၏တွဲဆိုင်းကို အဓိကတွဲဆိုင်းအဖြစ် ထည့်သွင်းထားကြောင်း သိရသည်။
ယင်းမြန်မာ့လက်ဝှေ့ စိန်ခေါ်ပွဲကို ဒီဇင်ဘာ (၆)ရက်တွင် ရန်ကုန်မြို့၌ ကျင်းပသွားမည်ဖြစ်ပြီး SkyNet ရုပ်သံလိုင်းမှ တိုက်ရိုက်ပြသသွားမည်ဖြစ်သည်။
ယင်းပြိုင်ပွဲကို ပရိသတ်မပါဘဲကျင်းပသွားရန် စီစဉ်ထားပြီး ရုပ်သံမှသာ တိုက်ရိုက်ပြသသွားမည်ဖြစ်သည်။
ယခုကျင်းပမည့်ပြိုင်ပွဲတွင် အဓိကတွဲဆိုင်းအဖြစ် ထွန်းထွန်းမင်းနှင့် ရွှေရာမာန်တို့ ထိုးသတ်မည်ဖြစ်ပြီး တွဲဆိုင်းစုစုပေါင်း (၆)ပွဲ ပါဝင်မည်ဖြစ်သည်။
ဒု-ခေါင်ပွဲအဖြစ် ဗျ ဂ္ဃနှင့် စောထိန်လင်းတို့ ယှဉ်ပြိုင်ထိုးသတ်မည်ဖြစ်ပြီး အခြားပွဲစဉ်များအဖြစ် ကျားသွေးနှင့် သားဒိန်၊ စောရွှေလေးနှင့် အဖိုးသွေး၊ စောအရိုင်းနှင့် ဓနအောင်၊ ကနောင်သွေးနှင့် ပိုင်သက်အောင်တို့ ယှဉ်ပြိုင်ထိုးသတ်မည်ဖြစ်သည်။
ယခုတွဲဆိုင်းများအနက် စောအရိုင်းနှင့် ဓနအောင်တို့၏ တွဲဆိုင်းကိုသာ (၄)ချီယှဉ်ပြိုင်စေမည်ဖြစ်ပြီး ကျန်တွဲဆိုင်းများအားလုံးကို (၅)ချီ အလဲထိုးစနစ်ဖြင့် ပြုလုပ်မည်ဖြစ်သည်။
(၅)ကြိမ်မြောက် ကျင်းပမည့် မြန်မာ့ရိုးရာလက်ဝှေ့ကမ္ဘာ့ချန်ပီယံပြိုင်ပွဲတွင်ပါဝင်မည့် လက်ဝှေ့သမားများ၊ ဒိုင်များ၊ အကူလူများအပါအဝင် ပါဝင်ပတ်သက်မည့်သူများအားလုံးကို Quarantine ထားရှိပြီး ရောဂါပိုးစစ်ဆေးရာတွင် အားလုံး Negative အဖြေထွက်ပေါ် ခဲ့ကြောင်း တာဝန်ရှိသူတစ်ဦးက အတည်ပြုပြောကြားခဲ့သည်။
ယခုပြိုင်ပွဲမှာ COVID-19 ကာလအတွင်း ပြည်တွင်း၌ ပထမဆုံးကျင်းပခွင့်ရသည့် မြန်မာ့လက်ဝှေ့ပြိုင်ပွဲဖြစ်ပြီး ကျန်းမာရေးနှင့် အားကစားဝန်ကြီးဌာန၏ ခွင့်ပြုချက်ဖြင့် ကျင်းပခြင်းဖြစ်ကြောင်း သိရသည်။
