ဆူခိုထိုင်းအသင်း နောက်ခံလူ ဇော်မင်းထွန်းသည် ဘူရီယမ်အသင်းအား ဂိုးပြတ်ရှုံးနိမ့်ခဲ့သောပွဲစဉ်တွင် တိုက်ရိုက်အနီကတ်ပြသခံရကာ ထုတ်ပယ်ခံခဲ့ရကြောင်း သိရသည်။
ဇော်မင်းထွန်းသည် ပွဲကစားချိန် (၈၈)မိနစ်တွင် ဘူရီယမ်အသင်း၏ ထိုင်းလက်ရွေးစင်ကစားသမား ဆူပါချိုင်းအား ဖျက်ထုတ်ပုံကြမ်းခဲ့ခြင်းဖြစ်သည်။ ယင်းဖြစ်ရပ်အပေါ် ကွင်းလယ်ဒိုင်က VAR ကြည့်ရှုကာ ဆုံးဖြတ်ခဲ့ခြင်းဖြစ်ကာ ဇော်မင်းထွန်းအား တိုက်ရိုက်အနီကတ်ပြသပြီး ကွင်းအတွင်းမှ ထုတ်ပယ်ခဲ့ခြင်းဖြစ်သည်။
ယင်းဖြစ်စဉ်နှင့်ပတ်သက်ပြီး ဆူခိုထိုင်းနောက်ခံလူ ဇော်မင်းထွန်း က "ကျွန်တော့်ရဲ့ အနီကတ်အတွက် ပရိသတ်တွေနဲ့ အသင်းဖော်တွေကို တောင်းပန်ပါတယ်။ ဒီအနီကတ်အတွက် ကျွန်တော့်မှာ ရည်ရွယ်ချက်မရှိခဲ့ပါဘူး" ဟု ဇော်မင်းထွန်းက သူ၏လူမှုကွန်ရက်စာမျက်နှာတွင် ဖော်ပြခဲ့သည်။
ဇော်မင်းထွန်းသည် ဆူခိုထိုင်းအသင်းနှင့် ပြီးခဲ့သည့် အောက်တိုဘာလတွင် စာချုပ်သက်တမ်းကုန်ဆုံးခဲ့သူဖြစ်သော်လည်း အသင်းဘက်မှ စာချုပ်သက်တမ်း (၂)လ ဆက်လက်တိုးမြှင့်ထားခြင်းဖြစ်သည်။
