အယ်လ်ဗာရိုဂွန်ဇာလက်ဇ်က နေမာသည် အဆိုပါ ပွဲစဉ်တွင် မိမိအား တစ်ပွဲလုံးရန်စနေခဲ့ပြီး ဝင်ငွေရရှိမှုကိုနှိုင်းယှဉ်ကာ ပြက်ရယ်ပြုခဲ့ကြောင်း စပိန်ရေဒီယို Onda Cero သို့ ပြောကြားခဲ့သည်။
မာဆေးလ်နောက်ခံလူ အယ်လ်ဗာရိုဂွန်ဇာလက်ဇ်က နေမာသည် မိမိအား မိမိတစ်နှစ်လုံးရှာဖွေသည့်ဝင်ငွေကို သူက တစ်ရက်တည်းဖြင့် ရှာနိုင်သည်ဟု ပြောဆိုခဲ့ကြောင်း ဖွင့်ဟခဲ့သည်။
စက်တင်ဘာ (၁၃)ရက်က ကစားခဲ့သည့် ပြင်သစ်လီဂူးပွဲစဉ် PSG (ဝ-၁) မာဆေးလ်ပွဲတွင် နှစ်ဖက်ကစားသမားများအကြား အငြင်းပွားမှုများ ဖြစ်ပွားခဲ့ပြီး ကစားသမား (၅)ဦးအထိ ထုတ်ပယ်ခံခဲ့ရသည်။
ယင်းပွဲအပြီးတွင် PSG တိုက်စစ်မှူး နေမာက မာဆေးလ်နောက်ခံလူ အယ်လ်ဗာရိုဂွန်ဇာလက်ဇ်သည် သူ့အား လူမျိုးရေးခွဲခြားမှုများ ပြုလုပ်ခဲ့ကြောင်း စွပ်စွဲပြောကြားခဲ့သည်။
သို့သော် အယ်လ်ဗာရိုဂွန်ဇာလက်ဇ်က နေမာသည် အဆိုပါ ပွဲစဉ်တွင် မိမိအား တစ်ပွဲလုံးရန်စနေခဲ့ပြီး ဝင်ငွေရရှိမှုကိုနှိုင်းယှဉ်ကာ ပြက်ရယ်ပြုခဲ့ကြောင်း စပိန်ရေဒီယို Onda Cero သို့ ပြောကြားခဲ့သည်။
"နေမာက မင်း တစ်နှစ်လုံး ရှာတဲ့ငွေကို ငါ တစ်ရက်တည်းနဲ့ ရှာနိုင်တယ်လို့ ကျွန်တော့်ကို ပြောပါတယ်။ ဒါက အမှန်ပါပဲ။ ဒါပေမဲ့ ငါ ရတဲ့ လစာနဲ့ ငါပျော်တယ်လို့ နေမာကို ကျွန်တော် ပြန်ပြောခဲ့ပါတယ်။ အဲဒီနေ့က ကျွန်တော့်အတွက် ကံမကောင်းတဲ့နေ့ဖြစ်ပြီး နေမာဟာ တစ်ပွဲလုံး ရန်စနေခဲ့တာပါ။ ပြီးတော့ သူစွပ်စွဲသလို သူ့ကို လူမျိုးရေးခွဲခြားခဲ့တာမျိုးမရှိပါဘူး။ ကျွန်တော့်ဘဝကို အဲဒါတွေကြောင့် အပျက်မခံနိုင်ပါဘူး။ နေမာဟာ ကျွန်တော့်အတွက်တော့ လေးစားမှုတွေနဲ့ထိုက်တန်သူတစ်ဦး မဟုတ်ပါဘူး"ဟု အယ်လ်ဗာရိုဂွန်ဇာလက်ဇ်က ပြောကြားခဲ့သည်။
ထို့ပြင် အယ်လ်ဗာရိုဂွန်ဇာလက်ဇ်က နေမာနှင့် ပြဿနာဖြစ်ခဲ့ခြင်းကြောင့် သူနှင့် သူ၏မိသားစုမှာ အသက်အန္တရာယ်ခြိမ်းခြောက်မှုများနှင့် ရင်ဆိုင်ခဲ့ရပြီး နေအိမ်အပြင်ထွက်ရန်ပင် ကြောက်ရွံ့ခဲ့ရကြောင်းလည်း ပြောကြားခဲ့သည်။
