လီဗာပူးလ်အသင်းခေါင်းဆောင် ဟန်ဒါဆန်သည် အာဆင်နယ်အသင်းနှင့်ကစားမည့် ပရီးမီးယားလိဂ်ပွဲစဉ်ကို လွဲချော်မည်ဖြစ်ကြောင်း အသင်းနည်းပြ ကလော့ပ်က အတည်ပြုပြောကြားခဲ့သည်။
ဟန်ဒါဆန်သည် စက်တင်ဘာ (၂၀)ရက်က ကစားခဲ့သည့် ပရီးမီးယားလိဂ်ပွဲစဉ် ချယ်လ်ဆီး (၀-၂) လီဗာပူးလ်ပွဲတွင် ပေါင်ခြံဒဏ်ရာ ရရှိခဲ့ပြီး ဒုတိယပိုင်းတွင် သီယာဂိုနှင့် လူစားလဲခဲ့ရသည်။
ကလော့ပ်က "မာတစ် လေ့ကျင့်ခန်း မဆင်းနိုင်သေးသလို၊ ဟန်ဒါဆန်ကလည်း အာဆင်နယ်နဲ့ပွဲမှာ ပါဝင်နိုင်မှာ မဟုတ်ပါဘူး။ ဒီပွဲက သူ့အတွက် စောလွန်းနေပါသေးတယ်"ဟု အာဆင်နယ်နှင့်ကစားမည့် ပွဲကြိုသတင်းစာရှင်းလင်းပွဲတွင် ပြောကြားခဲ့သည်။
အာဆင်နယ်နှင့်ပွဲတွင် ဟန်ဒါဆန် မပါနိုင်သဖြင့် ၎င်းနေရာတွင် ကစားသမားသစ် သီယာဂို ပွဲထွက်လာဖွယ်ရှိနေကြောင်းလည်း ကလော့ပ်က အရိပ်အမြွက်ပြောကြားခဲ့သည်။
ကလော့ပ်က "ပွဲက တနင်္လာနေ့မှာ ကစားမှာဆိုတော့ ကျွန်တော်တို့အနေနဲ့ ရက်အနည်းငယ်လေ့ကျင့်ဖို့ အချိန်ရပါသေးတယ်။ တချို့ကောင်လေး(ကစားသမား)တွေက လေ့ကျင့်ခန်းပြန်ဆင်းဖို့ ရှိနေပြီး ကျွန်တော်တို့အနေနဲ့ စောင့်ကြည့်ရဦးမှာပါ။ ကျွန်တော်အနေနဲ့ စိတ်ကူးထားတာ ရှိပါတယ်။ ဒါပေမဲ့ အချိန် ရှိပါသေးတယ်။ သီယာဂိုဟာ အသင်းနဲ့အတူ ရှိနေပါတယ်။ ဘယ်လိုပွဲထွက်လာမယ်ဆိုတာကို စောင့်ကြည့်ကြတာပေါ့"ဟု ပြောကြားခဲ့သည်။
လီဗာပူးလ်အသင်းသည် ပရီးမီးယားလိဂ်ပွဲစဉ် (၃)အဖြစ် စက်တင်ဘာ (၂၈)ရက်တွင် အာဆင်နယ်အသင်းကို အိမ်ကွင်း အန်ဖီးလ်၌ လက်ခံကစားရမည်ဖြစ်သည်။
