အင်္ဂလန်လက်ရွေးစင်အသင်းသည် ကိုရိုနာဗိုင်းရပ်စ်ရောဂါ ခြိမ်းခြောက်မှုကြောင့် ယခုလအတွင်းကစားရန်ရှိသည့် UEFA Nations League ပွဲစဉ်များအတွက် စိုးရိမ်စရာအခြေအနေရှိခဲ့သော်လည်း အသင်းမှကစားသမားများအား ဆေးစစ်ဆေးမှု တွင် ရောဂါပိုးတွေ့ရှိသူ တစ်ဦးတစ်ယောက်မှမရှိခဲ့ကြောင်း သိရှိရသည်။



အင်္ဂလန်အသင်းသည် ယခုစနေနေ့ (စက်တင်ဘာ ၅ ရက်)တွင် အိုက်စလန်အသင်းနှင့်လည်းကောင်း၊ (၈)ရက်နေ့တွင် ဒိန်းမတ်အသင်းနှင့်လည်းကောင်း UEFA Nations League ပွဲစဉ်များ ကစားရန်ရှိနေပြီး အင်္ဂလန်လက်ရွေးစင်အသင်းနည်းပြ ဆောက်ဂိတ်က ယင်းပွဲများအတွက် လက်ရွေးစင်အသင်းလူစာရင်းကို သြဂုတ်လကုန်ပိုင်းတွင် ရွေးချယ်ခဲ့သည်။



ပြီးခဲ့သည့်နွေရာသီအားလပ်ရက်ကာလအတွင်း အင်္ဂလန်လက်ရွေးစင်ကစားသမား အတော်များများမှာ ပြည်ပနိုင်ငံများသို့ အပန်းဖြေခရီး ထွက်ခွာခဲ့၍ ယင်းခရီးမှအပြန်တွင် ဗြိတိန်အစိုးရ၏စည်းမျဉ်း သတ်မှတ်ချက်များအတိုင်း Quarantine ဝင်ခဲ့ရသည်။ 



အထူးသဖြင့် ရောဂါပိုးကူးစက်မှုအတွက်စိုးရိမ်ရသောအခြေအနေရှိသည့် ဂရိကျွန်းများသို့လည်ပတ်ခဲ့သော မေဆန်မောင့်၊ အေဘရာဟမ်အစရှိသည့် အင်္ဂလန်ကစားသမားများမှာ  Quarantine ဝင်ခဲ့ရပြီး ကိုရိုနာဗိုင်းရပ်စ်ကူးစက်မည်ကို စိုးရိမ်ရသောအခြေအနေတွင် ရှိခဲ့သည်။



သို့ဖြစ်ရာ အင်္ဂလန်နည်းပြဆောက်ဂိတ်မှာ Quarantine ဝင်ရသော ကစားသမားများနှင့် ရောဂါပိုးကူးစက်ခံရဖွယ်ရှိသော ကစားသမားများ၏ အခြေအနေများကြောင့် အပိုကစားသမားများအဖြစ် အာဆင်နယ်ကွင်းလယ်လူ မိန့်လန်းနိုင်းစ်၊ ဝုလ်ဗ်နောက်ခံလူ ကိုအာဒီတို့ကို အသင်းတွင်ထည့်သွင်းရွေးချယ်ခဲ့ရသည်။



ပြီးခဲ့သည့် အင်္ဂါနေ့က အသင်းတွင်ရွေးချယ်ထားသော အင်္ဂလန်လက်ရွေးစင်ကစားသမားများအား ကိုရိုနာဗိုင်းရပ်စ်စစ်ဆေးခဲ့ရာ ရောဂါပိုးတွေ့ရှိသူ (Positive) တစ်ဦးတစ်ယောက်မှ မရှိခဲ့ကြောင်း သိရှိရသည်။ 



သို့ဖြစ်ရာ ၂၀၂၀-၂၁ UEFA Nations League အုပ်စုပွဲစဉ်များကို စတင်ဆင်နွှဲမည့် အင်္ဂလန်လက်ရွေးစင်အသင်းအတွက် နည်းပြဆောက်ဂိတ်မှာ စိတ်သက်သာရာရရှိစေခဲ့ကြောင်း Daily Mail သတင်းစာက ဖော်ပြခဲ့သည်။