တရုတ်နိုင်ငံ ဟူပေ့ပြည်နယ် ဝူဟန်မြို့တွင် ဖြစ်ပွားလျက်ရှိသည့် 2019 Novel Coronavirus (2019-nCoV) ရောဂါပိုးမှာ လက်ရှိတွင် ကမ္ဘာ့ကျန်းမာရေးအဖွဲ့က ဂရုပြုလာရသည့် ရောဂါပိုးတစ်မျိုးဖြစ်သည်။ ယင်းရောဂါပိုးကြောင့် တရုတ်နိုင်ငံတွင် 2019 Novel Coronavirus (2019-nCoV) ဓာတ်ခွဲအတည်ပြုလူနာ ၂၇၈ ဦးရှိကြောင်းသိရပြီး Hubei Provience တွင် ၂၅၈ ဦး၊ Guangdong Province တွင် ၁၄ ဦး၊ Beijing Municipa Lity တွင်ငါးဦး၊ Shanghai Municipa တွင် တစ်ဦးတို့ဖြစ်ကြောင်းနှင့် ဓာတ်ခွဲအတည်ပြုရောဂါပိုး တွေ့ရှိရသူများအနက် ၅၁ ဦးမှာ ရောဂါပြင်းထန်လျက်ရှိပြီး ၁၂ ဦးမှာ စိုးရိမ်ရသည့် အခြေအနေတွင်ရှိနေသည်။ ယင်းသို့အခြေအနေများတွင် ရောဂါစတင်ဖြစ်ပွားရာ ဝူဟန်မြို့အား တရုတ်အာဏာပိုင်များက အဆက်အသွယ်များ ဖြတ်တောက်ထားလျက်ရှိသည်။ ယင်းမြို့ရှိ ဝူဟန်နည်းပညာတက္ကသိုလ်တွင် တက်ရောက်နေသည့် မြန်မာကျောင်းသားများလည်း ရှိနေသည်။ ယင်းတို့အနက် ဝူဟန်နည်းပညာတက္ကသိုလ်တွင် Environmental Engineering နဲ့ Master တက်ရောက်နေသည့် ကိုစည်သူထွန်းနှင့် ဆက်သွယ်မေးမြန်းခဲ့ပါသည်။

 “ ဝူဟန်မြို့က လေယာဉ်တွေကို မြန်မာပြည် အဝင်မခံဖို့ပါပဲ။ Zero Budget သမားတွေအများဆုံး လာတတ်တာမို့ အဲဒီထဲမှာလည်း သက်ကြီးရွယ်အိုတွေ အများဆုံးပါပါတယ်။ ဒီမှာသေဆုံးတာအများစုကလည်း ၆၀ ကျော်တွေပါပဲ။ မြန်မာပြည်မှာ out break ဖြစ်ရင် လွယ်မှာမဟုတ်တဲ့ အတွက် သတိထားစေချင်ပါတယ်။

၁။      ။ဝူဟန်မြို့မှာ ဗိုင်းရပ်စ်ပိုး ဘယ်အချိန်က စပြီးတွေ့တာလဲခင်ဗျ။ ဘယ်သူ့ဆီက စတွေ့တာလို့ ကြားမိပါသလဲ။

ဖြေ။      ။ စဖြစ်တာက ဒီဇင်ဘာလကုန်လောက်ကတည်းကပါ။ ပင်လယ်စာ ရောင်းတဲ့စျေးက စျေးသည်တွေဆီကလို့ သိရပါတယ်။

၂။      ။ ဝူဟန်မြို့မှာ လက်ရှိအခြေအနေဘယ်လိုများရှိပါသလဲခင်ဗျ။ အဲဒီမှာ နေထိုင်တဲ့ မြန်မာလူမျိုးတွေက ဘယ်လောက်ရှိပါသလဲခင်ဗျ။

ဖြေ။         ။ လက်ရှိက မြို့ကို အဝင်အထွက် ပိတ်ထားပါတယ်။ ညနေ လေယာဉ်နဲ့ ဆေးဖြန်းမယ်လည်း ပြောပါတယ်။ မြန်မာတွေ အကုန်လုံးက ပညာတော်သင် ကျောင်းသားတွေချည်းပါပဲ။ စုစုပေါင်း ၁၃၀ ကျော်ရှိပြီး ကျောင်းပိတ်ရက် အိမ်ပြန်သွားကြတာက တစ်ဝက်လောက်ရှိပါတယ်။ ကျန်နေတဲ့ ကျနော်တို့က သုသေတန လုပ်နေလို့ ကျန်ခဲ့တာပါ။

၃။      ။ လက်ရှိ ဝူဟန်မြို့တွင်း အခြေအနေကရော ဘယ်လိုရှိပါသလဲခင်ဗျ။ အဲဒီမြို့က လူဘယ်လောက်များ ခန့်မှန်းခြေနေထိုင်ကြပါသလဲခင်ဗျ။

ဖြေ။      ။ လူဦးရေ အတိအကျတော့ ကျနော်မသိဘူးဗျ။ မြို့တွင်းအခြေအနေကတော့ ကားတွေ ရထားတွေကအစ အကုန်ရပ်ထားတယ်။ အိမ်ကားတွေလောက်ပဲ သွားနေကြတယ်။ ဆိုင်တော်တော်များများလည်း ပိတ်ထားတယ်။

၄။      ။ မြို့ကို ချက်ချင်းအဆက်အသွယ် ဖြတ်တောက်လိုက်တော့ ဘာတွေအခက်အခဲတွေ့နေလဲ ခင်ဗျ။ အခုလက်ရှိ တွေ့ကြုံရတဲ့ အခြေအနေတွေကိုလည်း တချက်လောက်ပြောပြပေးပါဦး။

ဖြေ။      ။ အဓိကက အစားအသောက်နဲ့ ဆေးဝါး အခက်အခဲရှိတယ်ဗျ။ Chinese New Year ကြောင့် ပုံမှန်ဆိုင်တွေ ပိတ်တယ်။ ဒီရောဂါဖြစ်တော့ ကြောက်ပြီး ထပ်ပိတ်ကြတယ်ထင်တယ်။ ကျနော်တို့ ဘာမှ မဝယ်လိုက်ရဘူး ရက်ကြာမယ်ဆိုရင်တော့ အခက်အခဲရှိတယ်။

၅။      ။ လက်ရှိ ကျောင်းတက်နေတဲ့ မြန်မာကျောင်းသားတွေအနေနဲ့ အဆက်အသွယ်များ ရှိကြလားခင်ဗျ။ အကိုတို့လို မြန်မာကျောင်းသားတွေအနေနဲ့ရော အခုချိန်မှာ ဘာတွေများ စီစဉ်ထားပါသလဲခင်ဗျ။ ဘယ်အချိန်မြို့ကို ပြန်ဖွင့်မှန်းမသိတော့ အဓိကအခက်အခဲဖြစ်နေတာနဲ့ ပတ်သက်ပြီးတော့ ဘာတွေများ စီစဉ်ထားပါသလဲခင်ဗျ။ သံရုံးတွေရော အကြောင်းကြားထားတာရှိပါသလား။

ဖြေ။    ။ ကျွန်တော့်ကျောင်းမှာတော့ ငါးယောက်ရှိတယ်ဗျ။ အစားအသောက် share ဖို့တော့ ပြောထားကြတယ်။ အခြားမြို့က မြန်မာကျောင်းသားတွေကလည်း ကူညီမယ်ပြောကြပါတယ်။ သံရုံးကတော့ ဘာအဆက်အသွယ်မှ မရပါဘူး။။

၆။       ။ တရုတ်အာဏာပိုင်တွေဘက်ကရော ရောဂါနဲ့ ပတ်သက်ပြီး မြို့ပေါ်မှာ ဘာတွေလုပ်ထားတာကို တွေ့ရသလဲခင်ဗျ။

ဖြေ။     ။ ဒီညနေ ငါးနာရီ လေယာဉ်နဲ့ မြို့ကို ဆေးဖြန်းမယ်ပြောတယ်ဗျ။ Alcohol 75% တွေလည်း ကျောင်းတွေမှာ လိုက်ဖြန်းပေးထားတယ်။

၇။    ။ ဒါဆိုရင်တော့ လက်ရှိအခြေအနေမှာတော့ ဝူဟန်မြို့ပေါ်မှာ နေတဲ့သူတွေကတော့ ဒီမြို့ကလည်း ထွက်ခွင့်မရ ပိတ်မိနေတဲ့အနေအထားမှာ ဖြစ်နေတာပေါ့။

ဖြေ။   ။ ဟုတ်တယ်ဗျ။

၈။     ။ အခုဖြစ်နေတာတွေနဲ့ ပတ်သက်ပြီး မြန်မာအစိုးရဘက်ကိုရော ဘာများပြောချင်ပါသလဲခင်ဗျ။ လက်ရှိ ပိတ်မိနေတဲ့ကျောင်းသားတွေရဲ့ အခြေအနေနဲ့ ပတ်သက်ပြီး။

ဖြေ။     ။ ဒီမှာ မြန်မာကျောင်းသားတွေရှိတယ်ဆိုတာ သိစေချင်တယ်ဗျ။ ပြီးတော့ တစ်ခုခု ဆက်သွယ်လာတာမျိုးလည်း ဖြစ်စေချင်ပါတယ်။ အခုက ဖြစ်လာရင် ကျွန်တော်တို့မှာ အားကိုးစရာ မရှိဘူးဖြစ်နေတယ်။

၉။    ။ ဖြည့်စွက်ပြောချင်တာများ ရှိပါသလား ခင်ဗျ။

ဖြေ။     ။ ဆန္ဒပြုချင်တာ တစ်ခုကတော့ ဝူဟန်မြို့က လေယာဉ်တွေကို မြန်မာပြည် အဝင်မခံဖို့ပါပဲ။ Zero Budget သမားတွေ အများဆုံး လာတတ်တာမို့ အဲဒီထဲမှာလည်း သက်ကြီးရွယ်အိုတွေ အများဆုံးပါပါတယ်။ ဒီမှာသေဆုံးတာအများစုကလည်း ၆၀ ကျော်တွေပါပဲ။ မြန်မာပြည်မှာ out break ဖြစ်ရင် လွယ်မှာမဟုတ်တဲ့အတွက် သတိထားစေချင်ပါတယ်။

ကျေးဇူးတင်ပါတယ်။ ခင်ဗျ။