ဂျူဗပ်တပ်စ်တိုက်စစ်မှူး စီရော်နယ်လ်ဒိုသည် Ballon d'Or ဆုကို ခြောက်ကြိမ်မြောက် ဆွတ်ခူးနိုင်မည်ဟု ၎င်းအနေဖြင့် မျှော်လင့်ထားသည်ဟု အသင်းနည်းပြ ဆာရီက ပြောကြားခဲ့သည်။

ဒီဇင်ဘာလ ၂ ရက်၌ ပြုလုပ်မည့် Ballon d'Or ဆုပေးပွဲအခမ်းအနားတွင် စီရော်နယ်လ်ဒို၏အဓိကပြိုင်ဘက် မက်ဆီမှာ အကောင်းဆုံးဆုကို ရရှိလိမ့်မည်ဟု သတင်းများက အတိအလင်းဖော်ပြနေချိန် တွင် ဆာရီမှ အံ့အားသင့်ဖွယ်သုံးသပ်ခဲ့ခြင်းဖြစ်သည်။

ထို့ပြင် အက်သလက်တီကိုအသင်းအား (၁-၀) ဂိုးဖြင့် အနိုင်ရခဲ့သည့်ချန်ပီယံလိဂ် ပွဲစဉ်တွင် ဒူးဒဏ်ရာမှပြန်လည်သက်သာလာပြီး မိနစ် ၉၀ အပြည့်ကစားနိုင်မှုအတွက် စီရော်နယ်လ်ဒိုအား ဆာရီက ချီးကျူးမှုများလည်း ပြုလုပ်ခဲ့သည်။

Ballon d'Or ဆုပေးပွဲအခမ်းအနားတွင် အသက် ၂၁ နှစ်အောက်ကစားသမားများကို ချီးမြှင့်သည့် Kopa Trophy ဆုကို အသင်းနောက်ခံလူ ဒီလစ် ရရှိလိမ့်မည်ဟု သုံးသပ်ခဲ့ပြီး ဒီဘားလားမှာ အနာဂတ်တွင် အကောင်းဆုံးကစားသမားဖြစ်လာနိုင်သူဟုလည်း ချီးကျူးခဲ့သည်။