မြန်မာနိုင်ငံနှင့် ပြည်ပနိုင်ငံများအကြား တရားမဝင်ငွေလွှဲလုပ်ငန်းများ လျော့နည်းပြီး တရားဝင်ငွေလွှဲလုပ်ငန်းများ ပေါ်ပေါက်လာစေရန် နိုင်ငံတော်ဗဟိုဘဏ်က ပြည်ပ ငွေလွှဲလုပ်ငန်းလိုင်စင်များ ခွင့်ပြုမည်ဖြစ် ၍ဗဟိုဘဏ်၏ လိုင်စင်လျှောက်ထားခြင်း အတွက် သတ်မှတ်ချက်များနှင့်အညီ လာရောက်လျှောက်ထားနိုင်ကြောင်း မြန်မာနိုင်ငံတော်ဗဟိုဘဏ်က အမိန့်ကြော်ငြာစာ အမှတ် ၂၁/၂၀၁၉ ဖြင့် အသိပေးကြေညာထားသည်။

ပြည်ပငွေလွှဲလုပ်ငန်းလိုင်စင်ရရှိသူသည် လုပ်ငန်းအာမခံငွေ (Security Deposit) အဖြစ် ကျပ်သန်း ၁၀၀ အပ်နှံထား ရှိရမည်ဖြစ်ပြီး လုပ်ငန်းပမာဏကြီးမားမှုကြောင့် လုပ်ငန်းအာမခံငွေ ကျပ်သန်း ၁၀၀ ထက် ထားရှိရန်လိုအပ်သည်ဟု ဗဟိုဘဏ် ညွှန်ကြားပါက လိုင်စင်ရရှိသူက ညွှန်ကြား ချက်နှင့်အညီ ဆောင်ရွက်ရမည်။ လုပ်ငန်း တွင်းလှည့်လည်သုံးစွဲငွေ (Revolving Fund) ကို AD လိုင်စင်ရဘဏ်တစ်ခုခုတွင်  သီခြားစားရင်းဖွင့်လှစ်ထည့်သွင်းရမည်ဖြစ်ပြီး ဘဏ်စာရင်းတစ်ခုချင်းစီ၏ ဘဏ်စာရင်း ရှင်းတမ်း (Bank Statement) ကို တစ်လတစ်ကြိမ် ဗဟိုဘဏ်သို့ တင်ပြရမည်ဖြစ်သည်။

ပြည်ပငွေလွှဲလုပ်ငန်းလိုင်စင်ရရှိသူ လိုက်နာရမည့်အချက်များမှာ မြန်မာနိုင်ငံနှင့် ပြည်ပနိုင်ငံများအကြားငွေလွှဲလုပ်ငန်း (Inward and Outward Remittance Business) ကိုသာ ဆောင်ရွက်ခွင့်ရှိပြီး ငွေ လွှဲပြောင်းရန် ရည်ရွယ်ချက်ဖြင့်သာ ငွေလက် ခံရမည်၊ ပြည်ပငွေလွှဲလုပ်ငန်းများဆောင် ရွက်ရာတွင် ပြည်ပသို့ငွေလွှဲပေးပိုရန် ငွေ ကြေးလက်ခံခြင်း၊ လက်ခံရရှိသည့်ငွေလွှဲ အား မြန်မာနိုင်ငံအတွင်း ငွေထုတ်ပေးခြင်း တို့ကို မြန်မာကျပ်ငွေဖြင့်သာဆောင်ရွက်ရ မည်၊ ပြည်ပငွေလွှဲလုပ်ငန်းများအား လိုင်စင်တွင်ပါရှိသော ခွင့်ပြုသည့်နေရာတွင်သာ လုပ်ကိုင်ဆောင်ရွက်ရမည်၊ ငွေလွှဲများ၏ စာရင်းရှင်းလင်းမှုဆောင်ရွက်ချက် (Back End Transaction) များကို ပြည်တွင်းဘဏ်စာ ရင်းနှင့် ပြည်ပတွင် ဖွင့်လှစ်ထားသည့် ကိုယ် ပိုင်ဘဏ်စာရင်း သို့မဟုတ် ကိုယ်စားလှယ် သို့မဟုတ် ရုံးခွဲဘဏ်စာရင်း သို့မဟုတ် အကျိုးတူပူးပေါင်းသူ၏ ဘဏ်စာရင်းတို့အကြား အသုတ် (Batch) အလိုက် စုပေါင်းဆောင် ရွက်ချက် (Bulk Transaction) အနေဖြင့် အသားတင်စာရင်း (Netting) ပြုလုပ်၍ AD လိုင်စင်ရဘဏ်များမှတစ်ဆင့် ငွေလွှဲ ဆောင်ရွက်ရမည်၊ ငွေလွှဲဆောင်ရွက်သည့် လုပ်ငန်း၏ ပြည်ပတွင်ဖွင့်လှစ်ထားသော ငွေစာရင်း၏ ဘဏ်စာရင်းရှင်းတမ်းကို တစ် လတစ်ကြိမ် မြန်မာနိုင်ငံတော်ဗဟိုဘဏ်၊    နိုင်ငံခြားသုံးငွေစီမံခန့်ခွဲမှုဌာနသို့ တင်ပြရ မည်ဖြစ်ပြီး နိုင်ငံတော်ဗဟိုဘဏ်ထံ ပေးပို့ ရန်သတ်မှတ်ထားသော စာရင်းဇယားများ ကို သတ်မှတ်ထားသည့် အချိိန်ဇယားများ အတိုင်းပေးပို့ရမည်ဖြစ်သည်။

ငွေလွှဲလက်ခံမှု သို့မဟုတ် ငွေလွှဲပေးပို့ မှု တစ်ကြိမ်လျှင် အများဆုံးလွှဲပြောင်းနိုင် သည့် ပမာဏမှာ အမေရိကန်ဒေါ်လာ ၁၀၀၀ နှင့်ညီမျှသော ပမာဏဖြစ်ပြီး ပုဂ္ဂိုလ်တစ်ဦး အတွက် ငွေလွှဲလက်ခံမှု သို့မဟုတ် ငွေလွှဲ ပေးပို့မှု ပြုနိုင်သည့် ပမာဏသည် တစ်လလျှင် အမေရိကန်ဒေါ်လာ ၅၀၀၀ နှင့်ညီမျှသော ပမာဏထက် မပိုစေရန် ဗဟိုဘဏ်က ကန့် သတ်ထားသည်။

ပြည်ပငွေလွှဲလုပ်ငန်းလိုင်စင်ရရှိသူ သည် ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေးနှင့်စပ် လျဉ်း၍ လိုက်နာရမည့်ကိစ္စရပ်များရှိပြီး ငွေ လွှဲပြောင်းမှုတွင် သံသယဖြစ်ဖွယ်လွှဲပို့မှုများ တွေ့ရှိပါက သတင်းပေးပို့ရမည်ဖြစ်ပြီး အဆို ပါမှတ်တမ်းကို အနည်းဆုံးငါးနှစ် ထိန်းသိမ်း ထားရှိရမည်ဖြစ်သည်။

ပြည်ပငွေလွှဲလုပ်ငန်းဆောင်ရွက်ရန် ကနဦးလိုင်စင်ကြေးကို ကျပ်တစ်သန်း၊ နှစ်စဉ်ကြေးကို ကျပ်တစ်သိန်းသတ်မှတ်ထားပြီး လိုင်စင်သက်တမ်း သုံးနှစ်ခွင့်ပြုထားကာ သတ်မှတ်ထားသည့်အတိုင်း လိုင်စင်သက် တမ်းတိုးလျှောက်ထားနိုင်သည်။ ပြည်ပငွေလွှဲလုပ်ငန်းလိုင်စင်ရရှိသူသည် ဗဟိုဘဏ်က သတ်မှတ်ထားသည့် စည်းမျဉ်းစည်းကမ်းများ ဖောက်ဖျက်ကျူးလွန်ပါက လိုင်စင် ဆိုင်းငံ့ထားခြင်း သို့မဟုတ် ပြည်လည်ရုပ်သိမ်းခြင်း အထိ အရေးယူခံရမည်ဖြစ်ပြီး သတ်မှတ်ထားသော ညွှန်ကြားချက်များနှင့် လမ်းညွှန်ချက်များကို လိုက်နာရန် ပျက်ကွက်ပါက ပျက်ကွက်မှုတစ်ခုစီအတွက် ကျပ် ၁၀ သန်းထက် မနည်းသော ဒဏ်ငွေ ကျခံရမည်ဖြစ်ကြောင်း သိရသည်။