မြန်မာ့လက်ရွေးစင်အသင်းသည် ၂၀၂၂ ကမ္ဘာ့ဖလားနှင့် ၂၀၂၃ အာရှဖလားပြိုင်ပွဲ ဒုတိယအဆင့်ခြေစစ်ပွဲ အုပ်စုအဖွင့်ပွဲအဖြစ် မွန်ဂိုလီးယားလက်ရွေးစင်အသင်းနှင့် အဝေးကွင်းပွဲယှဉ်ပြိုင်ကစားရန် တရုတ်နိုင်ငံမှ မွန်ဂိုလီးယားနိုင်ငံသို့ မနေ့ကထွက်ခွာသွားကြောင်း သိရသည်။

မြန်မာ့လက်ရွေးစင်အသင်းသည် သြဂုတ် ၃၀ ရက်တွင် တရုတ်လက်ရွေးစင်အသင်းနှင့် ခြေစမ်းပွဲကစားပြီးနောက် မွန်ဂိုလီးယားနိုင်ငံသို့ ထွက်ခွာသွားခြင်းဖြစ်သည်။ မြန်မာ့လက်ရွေးစင်အသင်းသည် မွန်ဂိုလီးယားနိုင်ငံ၌ လေးရက်ကြာလေ့ကျင့်မှုပြုလုပ်ရန် ကြိုတင်သွားရောက်ခြင်းဖြစ်ပြီး အုပ်ချုပ်/နည်းပြ အဖွဲ့ဝင်ရှစ်ဦး၊ ကစားသမား ၂၃ ဦး လိုက်ပါသွားသည်။

မြန်မာအသင်းယှဉ်ပြိုင်မည့် ၂၀၂၂ ကမ္ဘာ့ဖလား ဒုတိယအဆင့်ခြေစစ်ပွဲကို စက်တင်ဘာ ၅ ရက်တွင် စတင်ကျင်းပမည်ဖြစ်ပြီး ၂၀၂၀ ပြည့်နှစ် ဇွန်အထိ ကျင်းပမည်ဖြစ်သည်။ မြန်မာအသင်းသည် စက်တင်ဘာတွင် ကမ္ဘာ့ဖလားခြေစစ်ပွဲနှစ်ပွဲ ယှဉ်ပြိုင်ကစားရမည်ဖြစ်ပြီး အဖွင့်ပွဲအဖြစ် မွန်ဂိုလီးယားအသင်းနှင့် အဝေးကွင်းယှဉ်ပြိုင်ကစားရခြင်းဖြစ်သည်။

မြန်မာအသင်းသည် စက်တင်ဘာတွင်ကစားမည့် ကမ္ဘာ့ဖလားခြေစစ်ပွဲအတွက် သြဂုတ် ၁၉ ရက်မှစ၍ ပဏာမကစားသမား ၃၅ ဦးဖြင့် လေ့ကျင့်ပြင်ဆင်ခဲ့ပြီး သြဂုတ် ၃၀ ရက်တွင် တရုတ်လက်ရွေးစင်အသင်းနှင့် ခြေစမ်းပွဲယှဉ်ပြိုင်ကစားရာ (၁-၄) ဂိုးဖြင့် ဂိုးပြတ်ရှုံးနိမ့်ခဲ့သည်။