တင်းမာသော၊ ထက်မြက်သော၊ လိမ္မာပါးနပ်သော နရင်ဒရာမိုဒီသည် လမ်းများပေါ်၌ တိုက်ပွဲဝင်ရာမှ အိန္ဒိယ၏ အကျော်ကြားဆုံး၊ သဘောထား အစွန်းနှစ်ဖက် ကွဲပြားအောင် အပြုလုပ်နိုင်ဆုံး ဝန်ကြီးချုပ်တစ်ဦး  ဖြစ်လာခဲ့သည်။

သူ့အား လေးစားသူများနှင့် သူ၏ ရန်သူများအကြား ပြေလည်နိုင်စရာ လမ်းမရှိသည့် မိုဒီသည် ယခုအခါ သက်တမ်းဒုတိယအကျော့အဖြစ် ထပ်မံယှဉ်ပြိုင်၍နေသည်။  မိုဒီသည် အမျိုးသားရေးဝါဒီ နိုင်ငံရေးသမား ဖြစ်မလာမီ ရထားဘူတာရုံရှိ လက်ဖက်ရည်ဆိုင်ကလေးတွင် ဖခင်ဖြစ်သူကို ကူညီခဲ့ရသူဖြစ်သည်။

အသက် ၆၈ နှစ်အရွယ်ရှိ မိုဒီသည် ပင်ကိုယ်သဘာဝအရ မိမိကိုယ်မိမိ များစွာနှိမ့်ချတတ်သူဖြစ်သော်လည်း အိန္ဒိယ၏ အမျိုးသားလုံခြုံရေးနှင့် ဟိန္ဒူစံတန်ဖိုးများကို ကာကွယ်နေသည့် တင်းမာသော ပုဂ္ဂိုလ်အဖြစ် မိမိကိုယ်မိမိ အရှက်မရှိပုံဖော်ခဲ့သူ လည်းဖြစ်သည်။

မိုဒီ၏ စီးပွားရေးပြုပြင်ပြောင်းလဲမှုများနှင့် ပတ်သက်၍ လူထုက သံသယများကို ထုတ်ဖော်ပြသလျက်ရှိပြီး မှောင်ခိုစျေးကွက် စီးပွားရေးကို တိုက်ဖျက်ရန်အတွက် ၂၀၁၆ ခုနှစ်တွင် တန်ဖိုးမြင့်ငွေစက္ကူများကို ရုတ်တရက် ဖျက်သိမ်းခဲ့မှုနှင့် ပတ်သက်၍ လုပ်ငန်းများက ယခုအထိ မကျေမနပ်ဖြစ်နေဆဲ ဖြစ်သည်။

အိမ်နီးချင်းပါကစ္စတန်နှင့် အတိုက်အခံကွန်ဂရက်ပါတီ (အထူးသဖြင့် ရာဟူးဂန္ဓီ) တို့ကို ကျွမ်းကျင်စွာ ရန်စနေသော်လည်း မိုဒီ၏ ဂုဏ်သတင်းမှာ ထိခိုက်မှုနည်းပါးပြီး အိန္ဒိယ၏ အမျိုးသားရေးအာဂျင်ဒါကို မောင်းနှင်နေသူအဖြစ် အငြင်းပွားမှုလည်း နည်းပါးသည်။

ပရိသတ်များက မိုဒီ၏အမြင်ကို နှစ်သက်နေကြပြီး သူ၏ Twitter အကောင့်မှာ Follower ၄၆ သန်းကျော် ရှိလျက် သူသည် ကမ္ဘာ့နောက်လိုက်အများဆုံး ခေါင်းဆောင်တစ်ဦးဖြစ်ကြောင်း ပြသနေသည်။

သေသပ်သည့် မုတ်ဆိတ်ဖြူများထားခြင်း၊ ခေါင်းဆောင်းအများအပြား စုဆောင်းခြင်းတို့နှင့်အတူ မိုဒီသည် လွန်ခဲ့သည့် နှစ်ပေါင်း ၇၀ ၌ လွတ်လပ်ရေးရခဲ့ပြီးနောက်ပိုင်း အိန္ဒိယကို လွှမ်းမိုးထားခဲ့သည့် ပျက်စီးနေသော နိုင်ငံရေးမင်းဆက်ဝင် ရာဟူးဂန္ဓီနှင့် မိမိကိုယ်မိမိ နှိုင်းယှဉ်လျက် သူ၏ မြေကြီးနှင့် တစ်သားတည်းရှိပုံအကြောင်းများကို ပြောပြရင်း မဲဆွယ်ပွဲများ၌ လူထုကို ရွှင်မြူးစေသူ ဖြစ်သည်။

“ကျွန်တော့်ရဲ့ နိမ့်ကျတဲ့ ဇာစ်မြစ်ကြောင့် သူတို့က ကျွန်တော့်ကို မကြိုက်ပါဘူး။ ပါတီတစ်ခုဟာ အဲဒီလောက် အောက်တန်းကျသလား” ဟု သူက မဲဆွယ်ပွဲတစ်ခု၌ ပြောကြားခဲ့သည်။

“ဟုတ်ပါတယ်။ ဆင်းရဲတဲ့ မိသားစုတစ်စုက လူတစ်ဦးဟာ ဝန်ကြီးချုပ်ဖြစ်လာပါတယ်။ ဒီအချက်အတွက် သူတို့ရဲ့ အထင်သေးစိတ်ကို ဖုံးကွယ်ဖို့ သူတို့ မပျက်ကွက်ခဲ့ပါဘူး။ ဟုတ်ပါတယ်။ ကျွန်တော် လက်ဖက်ရည် ရောင်းခဲ့ပါတယ်။ ဒါပေမဲ့ ကျွန်တော် နိုင်ငံကို ရောင်းမစားခဲ့ပါဘူး” ဟု မိုဒီက ပြောကြားခဲ့သည်။

မစ္စတာ ၅၆ လက်မ

နရင်ဒရာ ဒါမိုဒါဒက်မိုဒီသည် အသက်ရှစ်နှစ်အရွယ်၌ သဘောထားတင်းမာသည့် ဟိန္ဒူ အမျိုးသားရေးဝါဒီ အုပ်စုဖြစ်သော ရက်ရှ်ထရီယာဆွာရမ်ဆီဗက်ဆင်း RSS သို့ ဝင်ခဲ့သည်ဟု ဆိုကြသည်။ မိုဒီသည် RSS တက်ကြွလှုပ်ရှားသူတစ်ဦး ဖြစ်လာရန်အတွက် မိသားစုက စီစဉ်ထားသည့် အိမ်ထောင်ပြုရမည့်ကိစ္စကို ငြင်းပယ်လျက် ဆယ်ကျော်သက်အရွယ်၌ပင် အိမ်မှ ထွက်ခွာလာခဲ့သူဖြစ်သည်။

စေ့စေ့စပ်စပ်နှင့် အလုပ်ကြိုးစားသူဖြစ်သော မိုဒီသည် RSS နှင့် ယင်း၏ မိတ်ဖက်ပါတီ BJP တို့၌ တစ်ဆင့်ပြီးတစ်ဆင့် မြင့်မားလာခဲ့ပြီး ၂၀၀၁ ခုနှစ်တွင် ဇာတိပြည်နယ်ဖြစ်သော ဂူဂျာရက်တွင် ပြည်နယ်ဝန်ကြီးချုပ် ဖြစ်လာခဲ့သည်။

ဂူဂျာရက်ပြည်နယ်၏ စီးပွားရေးကို မြှင့်တင်နိုင်ခဲ့ခြင်းနှင့် ထောက်ခံမှုရရှိသည့် ပွင့်လင်းစွာ ပြောဆိုတတ်သော အမျိုးသားရေးဝါဒီဖြစ်ခြင်းတို့က မိုဒီအား BJP ပါတီကို ဦးဆောင်လျက် ၂၀၁၄ ခုနှစ် အထွေထွေရွေးကောက်ပွဲသို့ဝင်ရန် ဖြစ်လာစေခဲ့သည်။ အိန္ဒိယနိုင်ငံသည် မိုဒီ၏ ဘဝဇာတ်ကြောင်းဖြင့် ဆွဲဆောင်ခံရပြီး BJP ပါတီသည် အိန္ဒိယသမိုင်းတစ်လျှောက် အပြတ်သားဆုံးနိုင်ပွဲကို ရရှိကာ ကွန်ဂရက်ပါတီကို သိမ်ငယ်သွားစေခဲ့သည်။

၂၀၀၂ ခုနှစ်က ဟိန္ဒူဘုရားဖူးများကို တင်ဆောင်လာသည့် ရထားတစ်စင်း မီးလောင်ပြီး လူပေါင်း ၆၀ ခန့် သေဆုံးခဲ့ရပြီးနောက် အဓိကရုဏ်းများ ဖြစ်ပွားကာ မွတ်စလင်အများစုဖြစ်သော လူပေါင်း ၁၀၀၀ ထက်မနည်း သေဆုံးခဲ့ရသည်။ ထိုစဉ်က မိုဒီသည် အဓိကရုဏ်းများကို လှု့ံဆော်သူအဖြစ် စွဲချက်တင်ခံရသော်လည်း တရားရုံးနှစ်ခုက  တရားစွဲဆိုရန် အထောက်အထား ရှာမတွေ့ခဲ့ပေ။

တစ်ခါတစ်ရံတွင် မိုဒီ၏ မှတ်ချက််များက သူ၏ ချောက်ချားမှုကို ပြန်လည်ဖော်ပြလျက်ရှိသည်။

၂၀၁၄ ခုနှစ်၌ မဲဆွယ်စဉ်အတွင်း မိုဒီက မာကျောသည့် ဆုံးဖြတ်ချက်များချရန်အတွက် သူ့တွင် ၅၆ လက်မ ရှိသည့် ရင်အုပ်ကြွက်သားများရှိသည်ဟု ပြောကြားခဲ့သည်။ 

မိုဒီသည် ဝန်ကြီးချုပ်တစ်ဦးအဖြစ် သတင်းစာရှင်းလင်းပွဲကို မည်သည့်အခါမျှ ပြုလုပ်ခြင်းမရှိသည့်အတွက် ဂျာနယ်လစ်များအနေဖြင့် ခက်ခဲသည့် ကာလတစ်ရပ်ရှိခဲ့ပြီး သူ၏ ရှားရှားပါးပါး ရုပ်သံအင်တာဗျူးများသည် အကျအန ဆင်ရိုက်ထားခြင်းဖြစ်သည်ဟု ဝေဖန်သူများက ဆိုသည်။

ရာဟူးဂန္ဓီက မိုဒီကို အာဏာရပြီးနောက် သက်ဦးဆံပိုင်စနစ်ဆန်ပြီး လူထုဝေဖန်မှုများကို ဖြစ်စေသူဟု ပုံမှန်တိုက်ခိုက်မှုများ ပြုလုပ်ခဲ့သည်။

နေရူးဝါဒ ကိုင်တွယ်မှု

“မစ္စတာမိုဒီဟာ ဗြိတိသျှတွေ ယုံကြည်ခဲ့သလိုမျိုးပဲ သူဟာ အိန္ဒိယရဲ့ အရှင်သခင်လို့ ယုံကြည်နေတာပါ” ဟု ရာဟူးဂန္ဓီက ဆိုသည်။

“သူဟာ အမြင့်ဆုံးတရားရုံးကို ဘေးဖယ်ထားနိုင်တယ်။ သူဟာ သူလိုချင်သလောက် ပိုက်ဆံကို ဘယ်ကုမ္ပဏီကနေမဆို ညှစ်ယူနိုင်တယ်။ ရွေးကောက်ပွဲကော်မရှင်ကို ဘေးဖယ်ပြီးတောင် သွားချင်ရာသွား၊ လုပ်ချင်ရာ လုပ်နိုင်တယ်” ဟု ရာဟူးဂန္ဓီက ဝေဖန်ခဲ့သည်။

မိုဒီ၏ ပုဂ္ဂိုလ်ရေးဆန်သည့် နိုင်ငံရေးသည် အိန္ဒိယရွေးကောက်ပွဲနှင့် ပတ်သက်သော အဆုံးအဖြတ် အကြောင်းအရာဖြစ်နေသည်ဟု သူ၏ ပါတီကပင်လျှင် ဝန်ခံခဲ့ပြီး ကျွမ်းကျင်သူများစွာက မိုဒီသည်သာ သူ၏ ပါတီကို ရွေးကောက်ပွဲတစ်လျှောက် သယ်ဆောင်သွားလိမ့်မည်ဟု ဆိုကြသည်။

“မိုဒီကို ခေါ်သွားလိုက်ပါ။ အတိုက်အခံ ခေါင်းဆောင်တွေရဲ့ မိန့်ခွန်း ရာခိုင်နှုန်း ၉၀ ဟာ အလကားဖြစ်သွားမှာပဲ” ဟု ဘဏ္ဍာရေးဝန်ကြီး အေရမ်ဂျိတ်တလေက Indian Express သတင်းစာနှင့် အင်တာဗျူး၌ ပြောကြားခဲ့သည်။

စကားအပြန်အလှန်ပြောဆိုမှုအပေါ် သြဇာလွှမ်းမိုးနိုင်စွမ်း၌ မိုဒီအား အိန္ဒိယနိုင်ငံကို ထူထောင်ခဲ့သည့် ဝန်ကြီးချုပ် ဂျဝါဟာလာနေရူးနှင့် နှိုင်းယှဉ်နိုင်သည်ဟု လန်ဒန်ရှိ ကင်းကောလိပ်မှ နိုင်ငံတကာဆက်ဆံရေးဌာန ပါမောက္ခဟက်ရှ်ပန့်က ဆိုသည်။

“မိုဒီဟာ မက်ဆေ့ချ်ပေးရာမှာ သူမတူတဲ့ နည်းလမ်းတစ်မျိုးနဲ့ လွှမ်းမိုးနိုင်ပါတယ်။ လူငယ်တွေက သူ့ဘဝအကြောင်းတွေကြောင့် သူ့နောက်ကို လိုက်ကြတယ်။ ကျွန်တော် လုပ်မယ်၊ ခင်ဗျားလည်း လုပ်နိုင်တယ်။ သူက နေရူးဝါဒ ကိုင်တွယ်ပုံမျိုးပဲ” ဟု ဟက်ရှ်ပန့်က ဆိုသည်။

“1ပုံမှန်အားဖြင့်တော့ အိန္ဒိယနိုင်ငံရေးမှာ လက်ရှိအာဏာရကို ဆန့်ကျင်တဲ့ဘက်က အားကောင်းတတ်တာပါပဲ။ ဒါပေမဲ့ အခု အခါမှာတော့ လူထုက မိုဒီဆီကနေ ဆုတ်ခွာမယ့် ဘာအရိပ်အယောင်မှမရှိပါဘူး” ဟုလည်း သူက ဆိုသည်။

သို့သော် မိုဒီအနေဖြင့် ဒုတိယသက်တမ်းအဖြစ် စိတ်ချလက်ချ အပြည့်အဝ အာဏာရသွားမှသာလျှင် မိုဒီ၏ အမှန်တကယ် ရိုက်ခတ်ချက်များကို ဖော်ထုတ်နိုင်လိမ့်မည်ဟု ပန့်နှင့် အခြားကျွမ်းကျင်သူများက ပြောကြားခဲ့ကြသည်။