အင်တာမိုင်ယာမီအသင်းနည်းပြဖြစ်သူ အာဂျင်တီးနားနိုင်ငံသား မာတီနိုသည် ရာထူးမှ နုတ်ထွက်ခဲ့ပြီဖြစ်ကြောင်း သိရသည်။

မာတီနိုအနေဖြင့် ပုဂ္ဂိုလ်ရေးအကြောင်းပြချက်ဖြင့် နုတ်ထွက်ခဲ့ခြင်းဖြစ်သည်ဟု အင်တာမိုင်ယာမီအသင်း၏ သတင်းရင်းမြစ်တစ်ခုက AFP သို့ ပြောကြားခဲ့သည်။

မာတီနိုသည် ၂၀၂၃ ခုနှစ် ဇွန်လက အင်တာမိုင်ယာမီအသင်းကို စတင်ကိုင်တွယ်ခဲ့ပြီး သူ၏လက်ထက်တွင် အသင်းသမိုင်းတစ်လျှောက် ပထမဆုံးဆုဖလားဖြစ်သည့် Leagues Cup အပြင် Supporters's Shield ကိုလည်း ရယူပေးခဲ့သည်။

ပြီးခဲ့သည့် မေဂျာလိဂ် Regular Season တွင် ပြိုင်ပွဲသမိုင်းတစ်လျှောက် စံချိန်တင်ရမှတ်ဖြင့် ထိပ်ဆုံးတွင် ရပ်တည်နိုင်အောင် စွမ်းဆောင်ပေးခဲ့သော်လည်း Playoffs ပထမအဆင့်တွင်ပင် အတ္တလန်တာယူနိုက်တက်အသင်းကို မထင်မှတ်ဘဲအရေးနိမ့်ကာ ပြိုင်ပွဲမှ ထွက်ခဲ့ရသည်။

အင်တာမိုင်ယာမီအသင်းသည် ၂၀၂၅ ကလပ်ကမ္ဘာ့ဖလားပြိုင်ပွဲကိုလည်း ဝင်ခွင့်ရရှိခဲ့သည်။