ရှမ်းပြည်နယ်တောင်ပိုင်း ဆီဆိုင်၊ ဟိုပုံးနှင့် ပင်လောင်းမြို့နယ်တို့တွင် လက်နက်ကိုင်ပဋိပက္ခများကြောင့် နှစ်လနီးပါးအတွင်း စစ်ဘေးရှောင်ဦးရေ တစ်သိန်းကျော် ရှိလာပြီး အရပ်သား ၄၉ ဦး သေဆုံးကာ ၆၄ ဒဏ်ရာရရှိခဲ့ကြောင်း ပအိုဝ်းလူငယ် အစည်းအရုံး(PYO) က သတင်းထုတ်ပြန်သည်။
ပြီးခဲ့သည့် ဇန်နဝါရီ ၂၁ ရက်မှ မတ် ၁၆ ရက်အထိ ရှမ်းပြည်နယ် တောင်ပိုင်း ဆီဆိုင်မြို့နယ်၊ ဟိုပုံးမြို့နယ်နှင့် ပင်လောင်းမြို့နယ်တို့တွင် တိုက်ပွဲများဖြစ်ပွားသည့်အခြေအနေများကို စစ်တမ်းကောက်ယူပြီး ပအိုဝ်းလူငယ် အစည်းအရုံး(PYO) က ထုတ်ပြန်ရာတွင် အထက်ပါအချက်ကို ထည့်သွင်းဖော်ပြထားခြင်းလည်း ဖြစ်သည်။
ရှမ်းပြည်နယ် တောင်ပိုင်း ဆီဆိုင်မြို့နယ်တွင် စစ်ဘေးရှောင်ဦးရေ ၆၅၉၀၀၊ ဟိုပုံးမြို့နယ်တွင် စစ်ဘေးရှောင်ဦးရေ ၁၈၆၀၀ နှင့် ပင်လောင်းမြို့နယ်တွင် စစ်ဘေးရှောင်ဦးရေ ၁၇၃၀၀ ရှိကြောင်း ပအိုဝ်းလူငယ် အစည်းအရုံး(PYO) ၏ ထုတ်ပြန်ချက်တွင် ဖော်ပြထားသည်။
စစ်ဘေးရှောင်ဦးရေ တစ်သိန်းကျော်ရှိသည့်အနက် လူဦးရေ ၂၃၀၀၀ ကျော်မှာ ၂၀၂၂-၂၀၂၃ ခုနှစ်ကတည်းက ကယားပြည်နယ်မှ ရှမ်းပြည်နယ် တောင်ပိုင်းသို့ စစ်ရှောင်လာသူများဖြစ်ကြောင်း ပအိုဝ်းလူငယ် အစည်းအရုံး(PYO) က ဆိုသည်။
ရှမ်းပြည်တောင်ပိုင်းတွင် တပ်မတော်၊ ပအိုဝ်းပြည်သူ့စစ်(PNA) ပူးပေါင်းတပ်နှင့် ပအိုဝ်း အမျိုးသားလွတ်မြောက်ရေးတပ်မတော် (PNLA) မဟာမိတ်တပ်တို့အကြား လက်နက်ကိုင်ပဋိပက္ခများကြောင့် အရပ်သား ၄၉ ဦး သေဆုံးပြီး ၆၄ ဒဏ်ရာရရှိခဲ့ကြောင်း ပအိုဝ်းလူငယ် အစည်းအရုံး(PYO) ၏ ထုတ်ပြန်ချက်တွင် ဖော်ပြထားသည်။
အရပ်သားများ ထိခိုက်သေဆုံးဒဏ်ရာရသည့် အကြောင်းရင်းများထဲတွင် လေကြောင်းတိုက်ခိုက်မှု၊ လက်နက်ကြီးပစ်ခတ်မှုနှင့် ဒရုန်းနှင့် ဗုံးကြဲမှုများ ပါဝင်ကြောင်း ပအိုဝ်းလူငယ် အစည်းအရုံး(PYO) က ဆိုသည်။
ရှမ်းပြည်နယ်တောင်ပိုင်း လက်နက်ကိုင်ပဋိပက္ခအတွင်း လေကြောင်းတိုက်ခိုက်မှု ၄၂၅ ကြိမ်၊ လက်နက်ကြီးပစ်ခတ်မှု ၂၁၂၀ ကြိမ်၊ အဆောက်အအုံ ထိခိုက်ပျက်စီးမှု ၄၂၉ လုံးရှိကြောင်း ပအိုဝ်းလူငယ် အစည်းအရုံး(PYO) ၏ ထုတ်ပြန်ချက်တွင် ဖော်ပြထားသည်။
အဆောက်အအုံ ထိခိုက်ပျက်စီးမှု၏ ၉၀ ရာခိုင်နှုန်းသည် လေကြောင်းတိုက်ခိုက်မှု၊ လက်နက်ကြီးပစ်ခတ်မှုနှင့် ဒရုန်းနှင့် ဗုံးကြဲမှုများကြောင်းဖြစ်ကြောင်း ပအိုဝ်းလူငယ် အစည်းအရုံး(PYO) က ပြောကြားသည်။
ပအိုဝ်းလူငယ် အစည်းအရုံး(PYO) အနေဖြင့် လက်လှမ်းမှီရရှိသည့် မြေပြင်သတင်းအချက်အလက်များနှင့် အွန်လိုင်းသတင်းအချက်အလက်များအပေါ်တွင် အခြေခံ၍ ထုတ်ပြန်ခြင်းဖြစ်ပြီး မြေပြင်တွင် ယင်းကိန်းဂဏန်းများထက် ပိုမိုများပြားနိုင်ကြောင်း ပအိုဝ်းလူငယ် အစည်းအရုံး(PYO) က ဆိုသည်။
ဆီဆိုင်မြို့နယ်တွင် လက်နက်ကိုင်ပဋိပက္ခများ ပြင်းထန်နေသောကြောင့် ဒေသခံများအနေဖြင့် မြို့အတွင်းသို့ ဝင်ရောက်ခြင်း၊ နေအိမ်ပြန်ကြည့်ခြင်းများ မပြုလုပ်ရန်နှင့် လက်နက်ကိုင်ပဋိပက္ခများနှင့် ကင်းဝေးသည့် နေရာများတွင် ယာယီခိုလှုံနေထိုင်ကြရန် PNLA ဘက်က ထုတ်ပြန်ထားသည်။
