အောင်မင်္ဂလာအဝေးပြေးအနီးတွင် YBS ယာဉ်တစ်စီး ဘရိတ်ပေါက်ပြီး လမ်းဘေးအလှူခံမဏ္ဍပ်အား ဝင်တိုက်မိသဖြင့် အမျိုးသားတစ်ဦး သေဆုံးမှု နိုဝင်ဘာ ၁၇ ရက် နံနက်ပိုင်းက ဖြစ်ပွားခဲ့ကြောင်း သိရသည်။
နိုဝင်ဘာ ၁၇ ရက် နံနက် ၁၁ နာရီခန့်တွင် ထောက်ကြန့်ဘက်မှ အောင်မင်္ဂလာအဝေးပြေးဘက်သို့ မောင်းနှင်လာသည့် YBS ၉၂ ယာဉ်မှာ ဘရိတ်ပေါက်ပြီး လမ်းဘေးရှိ အလှူခံမဏ္ဍပ်နှင့် အငှားယာဉ်တစ်စီးအား ဝင်တိုက်မိခဲ့ကြောင်း သိရသည်။
“ဘရိတ်ပေါက်ပြီး မှတ်တိုင်နားက အလှူခံမဏ္ဍပ်ကို ဝင်တိုက်တာပါ။ အငှားယာဉ်ကိုလည်း တိုက်တယ်။ မဏ္ဍပ်ထဲမှာထိုင်နေတဲ့ အမျိုးသားက ကားနဲ့ ချိတ်မိပြီး ကြိတ်မိသလိုဖြစ်ပြီး သေဆုံးသွားပါတယ်။ ယာဉ်မောင်းကို ဖမ်းမိပါတယ်” ဟု ပုလဲအရန်မီးသတ်တပ်ဖွဲ့မှ ကိုထင်လင်းအောင်က ပြောကြားသည်။
သေဆုံးသူအမျိုးသားမှာ အသက် ၆၀ အရွယ်ဖြစ်ပြီး အခင်းဖြစ်နေရာ၌ သေဆုံးသွားခဲ့ကာ အခြားလေးဦးခန့် ဒဏ်ရာရရှိခဲ့ကြောင်း သိရသည်။
