ဘင်္ဂါလီ မွတ်စလင်များအား ဖိနှိပ်မှုကို ကာကွယ်ရန် “ချက်ချင်းအရေးယူ ဆောင်ရွက်မှု” ပြုရန် နိုဘယ်ငြိမ်းချမ်းရေးဆုရှင် မာလာလာယူဆွတ်ဇိုင်က ဇွန် ၈ ရက်တွင် မြန်မာခေါင်းဆောင်များကို မေတ္တာရပ်ခံခဲ့သည်။ အမျိုးသမီးများ အခွင့်အရေးအတွက် စည်းရုံးလှုံ့ဆော်မှုဖြင့် ပါကစ္စတန်တွင် စစ်သွေးကြွတို့၏ ပစ်သတ်မှုနှင့် ကြုံခဲ့ရသော အသက် ၁၇ နှစ်အရွယ် မာလာလာက ဘင်္ဂါလီမွတ်စလင်များသည် “တန်းတူညီမျှ အခွင့်အရေးနှင့် အခွင့်အလမ်း” ရထိုက်ကြောင်း ပြောကြားခဲ့ပြီး ၎င်းတို့ကို မြန်မာနိုင်ငံနှင့် ပေါင်းစည်းပေးရန် တောင်းဆိုခဲ့သည်။“မြန်မာနိုင်ငံရဲ့ ဘင်္ဂါလီမွတ်စလင်တွေကို လူမဆန်စွာဖိနှိပ်မှု ရပ်တန့်ဖို့ မြန်မာခေါင်းဆောင်တွေနဲ့ ကမ္ဘာကို ကျွန်မ မေတ္တာရပ်ခံပါတယ်” ဟု မာလာလာက ပြောကြားခဲ့သည်။“သူတို့မွေးဖွားပြီး မျိုးဆက်များစွာ နေထိုင်ခဲ့တဲ့ နိုင်ငံမှာ သူတို့ဟာ နိုင်ငံသားဖြစ်ထိုက်ပါတယ်” ဟု ဆယ်ကျော်သက် နိုဘယ်ဆုရှင်က ထပ်မံပြောကြားခဲ့သည်။မာလာလာသည် ၂၀၁၂ ခုနှစ် အောက်တိုဘာက ပါကစ္စတန်တာလီဘန်တို့၏ လုပ်ကြံမှုကို ခံရပြီးနောက် ဗြိတိန်တွင် သွားရောက်ဆေးကုသခဲ့ရပြီး ဗြိတိန်တွင် မိသားစုနှင့်အတူ နေထိုင်နေသည်။တစ်ချိန်တည်းမှာပင် ပါကစ္စတန်တာလီဘန်တို့က မြန်မာအစိုးရကို ဂျီဟတ်ဆင်နွှဲရန် မြန်မာနိုင်ငံတွင်းရှိ မွတ်စလင်များအား လှုံ့ဆော်တိုက်တွန်းခဲ့သည်။ ပါကစ္စတန်တာလီဘန်အဖွဲ့ Tehreek-e-Taliban Pakistan (TTP) ၏ သဘောထားတင်းမာသော အဖွဲ့ခွဲ Jamaat-ul-Ahrar မှ ပြောခွင့်ရပုဂ္ဂိုလ် အာဆန်နူလာအာဆန်က အတိဒုက္ခရောက်နေသော ဘင်္ဂါလီမွတ်စလင်တို့၏ ကြေကွဲမှုကို ၎င်းတို့က ဝေမျှယူကြောင်း ပြောကြားခဲ့သည်။“မြန်မာလူငယ်တွေကို ကျွန်တော်ပြောပါမယ်။ ဖန်ဆင်းရှင်ရဲ့ လမ်းကြောင်းအတိုင်း ဓားဆွဲကိုင်ပြီး သတ်ပါ။ သံသယ မရှိပါနဲ့။ ဖန်ဆင်းရှင်ဟာ ကျွန်တော်တို့နဲ့အတူ ရှိနေပါတယ်” ဟု မီဒီယာကို ပေးပို့ခဲ့သော အသံမှာကြားမှုတွင် အာဆန်က ပြောကြားခဲ့သည်။“ကျွန်တော်တို့ရဲ့ လေ့ကျင့်ရေးစင်တာတွေ၊ ရင်းမြစ်တွေ၊ လေ့ကျင့်သင်ကြားမှု၊ လူ၊ အစစအရာရာ ခင်ဗျားတို့အတွက် အထောက်အပံ့အဖြစ် ပေးနိုင်ပါတယ်” ဟု အာဆန်က ပြောကြားခဲ့သည်။ပါကစ္စတန်တာလီဘန်အဖွဲ့ TTP သည် ၂၀၀၇ ခုနှစ်မှစပြီး ပါကစ္စတန်အစိုးရကို အကြမ်းဖက်ဆန့်ကျင်နေပြီး လူအမြောက်အမြား သတ်ဖြတ်ခဲ့ပြီးဖြစ်သည်။ သို့သော်လည်း ၎င်းတို့၏တိုက်ပွဲကို ပါကစ္စတန်နိုင်ငံ ပြင်ပသို့ ရောက်ရှိရန် စိတ်ဝင်စားမှု မပြသခဲ့ပေ။ သို့သော်လည်း ဘင်္ဂါလီအရေးသည် ပါကစ္စတန်တွင် လူထုစိတ်ဝင်စားမှု စတင်ရရှိလာနေသည်။ဘင်္ဂါလီတို့ကို ကူညီနိုင်မှုများအား အကြံပြုရန် ဝန်ကြီးချုပ် နဝပ်ရှရစ်က အထူးကော်မတီတစ်ရပ် ထူထောင်ထားသည်ဟု ဆိုသည်။ ထို့ပြင် ဆန္ဒပြသူများသည် ဇွန် ၇ ရက်က ပါကစ္စတန်အလယ်ပိုင်း မာတန်မြို့တွင် မြန်မာနိုင်ငံအလံကို မီးရှို့ဖျက်ဆီးခဲ့ကြသည်။ဆန္ဒပြကန့်ကွက်မှုများ၊ စီတန်းလှည့်လည်မှုများ၊ ချီတက်မှုများ၊ ရှုတ်ချသည့် ကြေညာချက်များသည် သက်ရောက်မှု အနည်းငယ်သာရှိကြောင်း၊ မြင့်မြတ်သောစစ် “ဂျီဟတ်” သည်သာ မြန်မာအုပ်စိုးသူများကို ဂရုပြုမိစေမည်ဖြစ်ကြောင်း အာဆန်က ပြောကြားခဲ့သည်။ပါကစ္စတန်စစ်တပ်သည် ယမန်နှစ်ဇွန်က တာလီဘန်တို့၏ လျှို့ဝှက်ပုန်းခိုရာ နေရာများကို ထိုးစစ်ဆင်ခဲ့ပြီးနောက် TTP သည် နောက်ပြန်ဆုတ်နေရသည်။ မကြာသေးမီနှစ်များအတွင်း အစ္စလာမ္မစ် အစွန်းရောက်အဖွဲ့များသည် ဘင်္ဂါလီတို့ကို ထောက်ခံကြောင်း ထုတ်ဖော်ခဲ့ကြပြီး ဂျီဟတ်ဆင်နွှဲရန် လှုံ့ဆော်ခဲ့ကြသည်။ သို့သော် ဘင်္ဂါလီတို့သည် အစွန်းရောက်တို့၏ လုပ်ရပ်များ၊ အကြမ်းဖက်ပြောဆိုမှုများကို လက်သင့်ခံကြောင်း ယခုချိန်ထိ မပြသသေးပေ။