ဥရောပမှ ထိပ်တန်းကစားသမားများနှင့် နည်းပြများကို ခေါ်ယူခဲ့သည့် ဆော်ဒီလိဂ်သည် ဥရောပမှ ထိပ်တန်းဒိုင်လူကြီးများကိုလည်း ထပ်မံခေါ်ယူရန် စီစဉ်နေကြောင်း သိရသည်။
ဆော်ဒီဘောလုံးလောကမှ တာဝန်ရှိသူများသည် ၎င်းတို့၏ လိဂ်ပြိုင်ပွဲကို ကမ္ဘာ့အဆင့် ထိပ်တန်းလိဂ်ပြိုင်ပွဲတစ်ခု ဖြစ်လာစေရန်အတွက် ငွေကြေးများစွာအကုန်အကျခံ၍ ကစားသမားသစ်များ၊ နည်းပြသစ်များ ခေါ်ယူနေသည့်နည်းတူ ၎င်းတို့၏ အဆင့်အတန်းနှင့် လိုက်လျောညီထွေဖြစ်စေမည့် ဒိုင်လူကြီးများကိုလည်း ခေါ်ယူရန် စီစဉ်လာခြင်းဖြစ်သည်။
ဆော်ဒီလိဂ်သည် ကစားသမားနှင့် နည်းပြများအား လစာမက်လုံးဖြင့် ခေါ်ယူခဲ့သကဲ့သို့ ဒိုင်လူကြီးများကိုလည်း မြင့်မားသည့် လစာနှုန်းထားဖြင့် ကမ်းလှမ်းမှုပြုလုပ်သွားရန် စီစဉ်နေပြီး ပရီးမီးယားလိဂ်မှ ဒိုင်လူကြီးများကို ဦးစားပေးပစ်မှတ်ထားနေကြောင်း သိရသည်။
ဆော်ဒီလိဂ်သည် လက်ရှိအချိန်တွင် နိုင်ငံတကာမှ ထိပ်တန်းဒိုင်လူကြီးများကို တစ်ပွဲချင်းအခကြေးငွေပေးချေသည့်ပုံစံဖြင့် ခေါ်ယူအသုံးပြုမှုရှိနေသော်လည်း လာမည့်ရာသီမှစ၍ ပုံသေအသုံးပြုနိုင်မည့်ဒိုင်လူကြီးများ ခန့်အပ်သွားရန် ရည်ရွယ်နေခြင်းဖြစ်ကြောင်း သိရသည်။
