PSG အသင်း၏ အားကစားဒါရိုက်တာဖြစ်သူ လီယိုနာဒိုက ၀ါရင့်ကစားသမားများဖြစ်သည့် ကာဗာနီနှင့် သီယာဂိုဆေးလ်ဗားတို့အား ပြောင်းရွှေ့ကြေးအလွတ်ဖြင့် ထွက်ခွာခွင့်ပေးခဲ့ခြင်းမှာ မှားယွင်းကြောင်း ဝန်ခံပြောကြားခဲ့သည်။ 

PSG အသင်းသည် ၂၀၁၉-၂၀ ရာသီကုန်တွင် အသင်းနှင့် စာချုပ်သက်တမ်းကုန်ဆုံးခဲ့သည့် ဥရုဂွေးတိုက်စစ်မှူး ကာဗာနီနှင့် ဘရာဇီးလ်နောက်ခံလူ သီယာဂိုဆေးလ်ဗားတို့ကို စာချုပ်သစ်ကမ်းလှမ်းခြင်းမရှိဘဲ ပြောင်းရွှေ့ကြေးအလွတ်ဖြင့် ထွက်ခွာစေခဲ့သည်။ 

PSG အသင်းနှင့် လမ်းခွဲပြီးနောက် သီယာဂိုဆေးလ်ဗားသည် ချယ်လ်ဆီးအသင်းသို့ ပြောင်းရွှေ့ခဲ့ပြီး ကာဗာနီမှာ မန်ယူအသင်းသို့ ပြောင်းရွှေ့ကစားခဲ့သည်။ 

လီယိုနာဒိုက မိမိအနေဖြင့် ကာဗာနီနှင့် သီယာဂိုဆေးလ်ဗားတို့ကို စာချုပ်သစ်ချုပ်လိုခဲ့သော်လည်း ဘဏ္ဍာရေးအကျပ်အတည်းကြောင့် လက်လွှတ်ခဲ့ရသည်ဟု ပြောကြားခဲ့သည်။ 

"ကာဗာနီ၊ သီယာဂိုဆေးလ်ဗားတို့ကို လက်လွှတ်ခဲ့ရတာ ကျွန်တော်တို့ရဲ့ အမှားပါပဲ။ ကျွန်တော်တို့အနေနဲ့ ကပ်ဘေးကြောင့် ဘဏ္ဍာရေးအကျပ်အတည်းတွေနဲ့ ရင်ဆိုင်ခဲ့ရပြီး သူတို့ လိုချင်တာတွေကို ပေးနိုင်တဲ့အနေအထား မရှိခဲ့ပါဘူး။ ဒါကြောင့် သူတို့ကို လက်လွှတ်ခဲ့ရတာပါ။ အခုအချိန် နောက်တန်းမှာ မာကင်ဟို့စ်နဲ့ ကင်ပမ်ဘေတို့ပဲ ရှိပြီး သူတို့ကို ကျွန်တော်တို့ အားကိုးနေရပါတယ်"ဟု လီယိုနာဒိုက ပြောကြားခဲ့သည်။ 

သီယာဂိုဆေးလ်ဗားမှာ ချယ်လ်ဆီးအသင်းအတွက် ခြေစွမ်းပြကစားနေပြီး ကာဗာနီမှာလည်း ပြီးခဲ့သည့်စနေနေ့က ကစားခဲ့သည့် အဲဗာတန် (၁-၃) မန်ယူပွဲတွင် မန်ယူကစားသမားဘဝ ပထမဆုံးဂိုးကို သွင်းယူနိုင်ခဲ့သည်။