အင်တာမီလန်အသင်းသည် မန်စီးတီးအသင်းမှ အာဂျင်တီးနားတိုက်စစ်မှူး အဂွဲရိုးကို လာမည့်နှစ်တွင် ပြောင်းရွှေ့ကြေးအလွတ်ဖြင့် ခေါ်ယူရန် ချိန်ရွယ်နေကြောင်း သိရသည်။
အဂွဲရိုးသည် ၂၀၂၁ နွေရာသီတွင် မန်စီးတီးအသင်းနှင့် စာချုပ်သက်တမ်းကုန်ဆုံးမည်ဖြစ်ပြီး မန်စီးတီးအသင်းက သက်တမ်းတိုးရန် အလားအလာနည်းပါးနေသည်။
ထို့ကြောင့် ခေါ်ယူလိုသော ပြည်ပကလပ်အသင်းများအနေဖြင့် လာမည့် ဇန်နဝါရီအပြောင်းအရွှေ့တွင် စတင်ဆွေးနွေးနိုင်မည်ဖြစ်ပြီး ကြိုတင်သဘောတူညီမှု ရယူနိုင်မည်ဖြစ်သည်။
အဂွဲရိုးသည် အသက် (၃၂)နှစ်ရှိပြီဖြစ်သော်လည်း ခြေစွမ်းပြနေဆဲဖြစ်သောကြောင့် ပြောင်းရွှေ့ကြေးအလွတ်ဖြင့် ခေါ်ယူနိုင်မည့် အခွင့်အရေးကို အင်တာမီလန်အသင်းက အရယူရန် ဆန္ဒရှိနေခြင်းဖြစ်ပြီး တစ်နှစ်လစာပေါင်(၆.၃၅)သန်း နှင့် (၇.၂၅)သန်းကြားပမာဏဖြင့် ကမ်းလှမ်းသွားရန် စီစဉ်နေကြောင်းလည်း သိရသည်။
အင်တာမီလန်အသင်းသည် တိုက်စစ်မှူး လော်တာရိုမာတီနက်ဇ်ကို လာမည့်ရာသီတွင် ဆက်လက်ထိန်းသိမ်းထားနိုင်ရန် မလွယ်ကူခြင်းကြောင့်လည်း အဂွဲရိုးကို ပစ်မှတ်ထားနေပြီး (၂)နှစ်စာချုပ်ဖြင့် ကမ်းလှမ်းဖွယ်ရှိကြောင်း Calcio Mercato သတင်းဌာနက ဖော်ပြခဲ့သည်။
အဂွဲရိုးသည် ၂၀၁၁ ခုနှစ်တွင် အက်သလက်တီကိုအသင်းမှ မန်စီးတီးအသင်းသို့ ရောက်ရှိခဲ့သူဖြစ်ပြီး ပြီးခဲ့သည့်ရာသီကလွဲလျှင် အသင်း၏ ဂိုးသွင်းအများဆုံးကစားသမားအဖြစ် ရာသီတိုင်းတွင် ရပ်တည်နိုင်ခဲ့သူဖြစ်သည်။
သို့သော် မန်စီးတီးအသင်းက ၎င်း၏နေရာတွင် အစားထိုးရန် စီစဉ်နေပြီဖြစ်ကြောင်းလည်း သတင်းထွက်နေသည်။
