အာဖရိကဘောလုံးအဖွဲ့ချုပ် (CAF) မှ ကြီးမှူးကျင်းပသည့် ၂၀၂၄ အာဖရိကအကောင်းဆုံးဘောလုံးသမားဆုပေးပွဲ အခမ်းအနားကို လာမည့် ဒီဇင်ဘာလ ၁၆ ရက်တွင် မော်ရိုကိုနိုင်ငံ၌ ပြုလုပ်မည်ဖြစ်ကြောင်း သိရသည်။
အကောင်းဆုံးဘောလုံးသမားဆုအတွက် ဆန်ခါတင်ငါးဦးစာရင်းကို ထုတ်ပြန်ခဲ့ရာ ဟာကီမီ(PSG၊ မော်ရိုကို)၊ အာဒင်ဂရာ(ဘရိုက်တန်၊ အိုင်ဗရီကို့စ်)၊ ဂီဟာဆီ(ဒေါ့မွန်၊ ဂီနီ)၊ လွတ်ခ်မန်း(အတ္တလန်တာ၊ နိုင်ဂျီးရီးယား)၊ ဝီလီယံစ်(ဆန်ဒေါင်းစ်၊ တောင်အာဖရိက)တို့ ရွေးချယ်ခံခဲ့ရသည်။
CAF သည် အကောင်းဆုံးဘောလုံးသမားဆုအတွက်သာမက အကောင်းဆုံးလူငယ်ဘောလုံးသမားဆု၊ ဒေသတွင်းအကောင်းဆုံး ဘောလုံးသမားဆု၊ အကောင်းဆုံးနည်းပြဆု၊ အကောင်းဆုံးဂိုးသမားဆု၊ အကောင်းဆုံး လက်ရွေးစင်အသင်းဆုများအတွက်လည်း ဆန်ခါတင်စာရင်းများ ထုတ်ပြန်ခဲ့ကြသည်။
ယခု ဆန်ခါတင်စာရင်းဝင်ခဲ့သူ ငါးဦးမှာမူ အာဖရိကအကောင်းဆုံးဘောလုံးသမားဆုကို ယခင်က တစ်ကြိမ်မျှ ရရှိဖူးခြင်းမရှိသည့် သူများဖြစ်ပြီး ဟာကီမီမှာမူ ယမန်နှစ်ဆုပေးပွဲအခမ်းအနားတွင် အိုဆင်မန်၏နောက် ဒုတိယနေရာ ရရှိခဲ့သည်။
