မြန်မာ့လက်ရွေးစင်အသင်း နည်းပြချုပ် ဦးမျိုးလှိုင်ဝင်းက ဒဏ်ရာရကစားသမားအချို့ ရှိနေသော်လည်း လက်ဘနွန်နှင့်ပွဲတွင် ရလဒ်ကောင်းမည်ဟု ယုံကြည်ကြောင်း ပွဲကြိုသတင်းစာရှင်းလင်းပွဲတွင် ပြောကြားခဲ့သည်။

ဦးမျိုးလှိုင်ဝင်းက ''ပြိုင်ဘက်လက်ဘနွန်က ဒီကိုမလာခင် ထိုင်းအသင်းနဲ့ ခြေစမ်းခဲ့ပြီး ဂိုးမရှိသရေကျထားပါတယ်။ အဲဒီပွဲကို ကျွန်တော်တို့ Video Analysis သေချာလုပ်ကြည့်ပြီးတော့ နည်းစနစ်ပိုင်း ပြင်ဆင်ထားပါတယ်။ လက်ဘနွန်က အရပ်အမောင်းမြင့်မားပြီး ကြံ့ခိုင်မှုလည်း ကောင်းပါတယ်။ သူတို့နဲ့ ခြေစမ်းရတာ ကျွန်တော်တို့အတွက် အများကြီးအကျိုးရှိပါတယ်။ အာဆီယံချန်ပီယံရှစ် ပွဲဦးထွက်မှာ အင်ဒိုနဲ့တွေ့ရမှာဆိုတော့ သူတို့နဲ့ ခြေစွမ်းသိပ်မကွာတဲ့ လက်ဘနွန်အသင်းနဲ့ ခြေစမ်းရတာ အာဆီယံချန်ပီယံရှစ်အတွက် ကောင်းမွန်တဲ့ ပြင်ဆင်မှုပါ။ အသင်းမှာ ဒဏ်ရာရကစားသမားတချို့ ရှိနေသေးပေမဲ့ ပွဲထွက်ကစားနိုင်မယ့် ကစားသမားတွေအားလုံး ရလဒ်ကောင်းတစ်ခုရအောင် လုပ်နိုင်မယ်လို့ ယုံကြည်ပါတယ်''ဟု ပြောကြားခဲ့သည်။

မြန်မာ့လက်ရွေးစင်အသင်းနှင့် လက်ဘနွန်လက်ရွေးစင်အသင်းသည် နိုဝင်ဘာ (၁၉) ရက်(ယနေ့) ညနေ(၅) နာရီတွင် ရန်ကုန်မြို့၊ သုဝဏ္ဏကွင်း၌ ဖီဖာအသိအမှတ်ပြု နိုင်ငံတကာခြေစမ်းပွဲအဖြစ် ယှဉ်ပြိုင်ကစားကြမည်ဖြစ်သည်။

မြန်မာအသင်းနှင့် လက်ဘနွန်အသင်းသည် နိုဝင်ဘာနိုင်ငံတကာရက်သတ္တပတ်တွင် ဒုတိယမြောက် ခြေစမ်းပွဲကစားခြင်းဖြစ် ပြီး နိုဝင်ဘာ(၁၄) ရက်တွင် မြန်မာအသင်းက စင်ကာပူအသင်းနှင့် အဝေးကွင်း၊ လက်ဘနွန်အသင်းက ထိုင်းအသင်းနှင့် အဝေးကွင်းယှဉ်ပြိုင်ကစားခဲ့ခြင်းဖြစ်သည်။